Амударё туман прокуратураси томонидан “Жамиятимизни коррупциядан биргаликда халос этайлик!” шиори остида тарғибот тадбири ўтказилди

Коррупцияга қарши курашишда давлат органлари, жамоатчилик ва фуқаролик жамияти институтларининг ҳамкорлиги муҳим ўрин тутади. Хусусан, жамоатчиликнинг хабардорлигини ошириш, соҳага оид ҳуқуқий билимларни кенг оммага етказиш, аҳоли, айниқса, давлат хизматчилари ўртасида ҳалоллик, масъулият ва жавобгарлик ҳиссини шакллантириш бугунги куннинг долзарб вазифаларидан бири ҳисобланади.

Масаланинг долзарблиги шундаки, жуда кўп ҳолатларда оддий фуқаролар ўзларининг ҳуқуқий жиҳатдан билимсизлиги натижасида билиб-билмай алдов, фирибгарлик, товламачилик, одам савдоси билан боғлиқ жиноятлар ва ҳуқуқбузарликлар қурбонига айланиб қолаётганидир. Шу боис ҳуқуқни муҳофаза қилиш органлари ходимлари томонидан давлат хизматчилари, жамоат ташкилотлари масъуллари ва аҳоли вакиллари билан жойларга чиққан ҳолда тушунтириш-тарғибот тадбирлари ўтказилиб, бу тадбирларда барча ёш тоифасидаги фуқароларнинг иштироки таъминланмоқда.

Ана шундай тадбирлардан бири Амударё туман электр таъминоти ва туман газ таъминоти корхоналарида ҳам ўтказилди. “Жамиятимизни коррупциядан биргаликда халос этайлик!” шиори остида Қорақалпоғистон Республикаси прокуратураси томонидан ишлаб чиқилган тадбирлар режаси асосида ташкил этилган мазкур тарғибот тадбирида туман электр ва газ таъминоти корхоналари ходимлари иштирок этди.

Тадбир ташкилотчилари дастлаб туман электр таъминоти корхонасида масъуллар, муҳандис-техник ходимлари ва ишчилари билан мулоқот ўтказдилар. Унда Амударё тумани прокурорининг катта ёрдамчиси Шарьяр Жолдасов тадбир иштирокчиларига коррупциянинг жамият ва давлат ривожига салбий таъсири, унинг ижтимоий ва иқтисодий оқибатлари, фуқароларнинг ҳуқуқий онги ва ҳуқуқий маданиятини ошириш масалалари хусусида батафсил маълумотлар берди. Шу билан бирга, ҳаётимизнинг барча жабҳаларидаги муаммоли масалаларни пора олди-бердиси, таниш-билишчилик ёки ошна-оғайнигарчилик орқали ҳал этишга йўл қўймаслик тўғрисида зарур тушунчаларни етказди.

Тадбирда сўзга чиққан Амударё тумани электр таъминоти корхонаси масъуллари жамиятимизда энг кўп учрайдиган коррупциявий ҳолатлар ҳамда уларнинг олдини олиш бўйича ўз фикрларини билдириб, атрофлича муҳокама олиб бордилар. Шунингдек, тадбир давомида иштирокчиларга коррупцияга қарши курашиш бўйича миллий қонунчилик ҳақида ҳам кенг турда маълумотлар берилди. Унда коррупцион ҳолатларнинг олдини олиш, манфаатлар тўқнашуви, шаффофлик ва жавобгарликни таъминлашга оид муҳим нормалар ўз ифодасини топган.

Шу куни “Жамиятимизни коррупциядан биргаликда халос этайлик!” шиори остида Амударё туман газ таъминоти корхонаси масъуллари, муҳандис-техник ходимлар ва ишчилари иштирокида ҳам давра суҳбати ташкил қилинди. Тадбирда сўзга чиққан корхона раҳбари Жасур Еримбетов ва бошқалар жамиятда коррупцияга нисбатан муросасиз муносабатни қарор топтириш, давлат хизматчиларининг ҳалоллик ва масъулиятни ўз вазифаларининг устувор тамойилига айлантириши — юртимизда ҳуқуқий демократик давлат ва кучли фуқаролик жамиятини барпо этишда муҳим аҳамият касб этишини таъкидладилар.

Айтиш жоизки, ушбу иллатга қарши курашишда нафақат давлат органлари, балки оммавий ахборот воситалари ҳамда фуқаролик жамиятининг бошқа институтлари ҳам фаол иштирок этмоқда. “Тараққиёт кўзгуси” газетаси ва Амударё телевидениеси таҳририятлари Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Биз коррупцияга қаршимиз!”, “Коррупция — давлат ва жамият тараққиётига таҳдид!” мавзуларидаги грант лойиҳалари доирасида ҳуқуқни муҳофаза қилиш органлари ходимлари билан ҳамкорликда амалга ошираётган тарғибот-ташвиқот тадбирлари ҳам ўзининг ижобий самарасини бермоқда.

Бу каби тарғибот-ташвиқот ишлари ва маънавий-маърифий тадбирларнинг аҳамияти беқиёс. Чунки барча бўғинлардаги давлат хизматчилари ва мансабдор шахсларнинг ўз хизмат вазифаларини ҳалол ва виждонан бажариши кўп жиҳатдан улар раҳбарлик қилаётган корхона ва ташкилотларда фаолият юритаётган ходимлар, қолаверса, оддий фуқароларнинг ҳам бу борада зарур ҳуқуқий билимга эга бўлишларига боғлиқ. Жамиятнинг барча бўғинларида фуқаролар онгида коррупцияга нисбатан муросасизлик туйғусини шакллантириш эса бугунги куннинг энг долзарб масаласидир.

Робия Йўлдошева