Амударё туманида пахта етиштириш жараёнлари тўлиқ назорат остида

Қишлоқ хўжалиги соҳасида мавсумий агротехник тадбирларнинг ўз вақтида, сифатли амалга оширилиши юқори ҳосил олишдан ташқари, экин майдонларининг сифати ва самарадорлигини ҳам ошириш имконини беради.  Айниқса, пахта экиладиган майдонларда   тупроқ эрозиясининг олдини олиш, ернинг ҳаддан ташқари шўрланиши ёки тупроқнинг ҳосилдор қатлами зарарланиб, чим босиб кетиши нафақат экинлар ҳосилдорлигининг камайишига, балки ернинг маълум маънода яроқсиз ҳолатга келиб қолишига сабаб бўлади. 

Бундай кўнгилсиз ҳолатларнинг олдини олиш мақсадида моҳир деҳқонлар, фермерлар экин майдонларининг ҳосилдорлигини оширишнинг барча чораларини кўрадилар. Хусусан, деҳқончилик маданиятини ошириш мақсадида барча мавсумий ишларни агротехника талаблари даражасида амалга ошириш, айниқса, пахтачиликда соҳага илғор тажрибаларни кенг жорий этиш орқали малакали мутахассислар билан ҳамкорликда иш юритишлари туфайли юқори натижаларга эришадилар.

Амударё туманида жорий йилги пахта мавсумида 13 минг гектар ер майдонига пахта экилди. Ҳозирги кунда далаларда сувдан кейинги шудгорлаш, озиқлантириш ва чилпиш ишлари агротехника қоидаларига мувофиқ сифатли амалга оширилмоқда. Ушбу жараёнлар устидан Агроинспекция томонидан тўлиқ назорат ўрнатилган бўлиб, ишларнинг самарали ва ўз вақтида бажарилиши мунтазам равишда мониторинг қилиб борилмоқда.

Мутахассисларнинг таъкидлашича, сувдан кейинги шудгорлаш жараёни тупроқнинг донадорлигини ошириб, ерни юмшатиш, бегона ўтларни йўқотиш ҳамда намни сақлаш орқали ўсимликнинг соғлом ривожланишига хизмат қилади. Шу боис, тумандаги барча фермер хўжаликларида мавсумнинг бу муҳим ишларини белгиланган муддат ва агротехник талаблар асосида бажаришга асосий эътибор қаратилмоқда.

Айниқса, далаларда чилпиш ишларини сифатли амалга ошириш жуда катта аҳамиятга эга. Чунки бу жараён пахта ўсимлигининг соғлом ривожланишини таъминлашдан ташқари, ҳосил нишоналарининг сонини кўпайтиради ва келгусида ҳосилдорликка ижобий таъсир кўрсатади.

Бундан ташқари, мавсумий агротехник тадбирлар – ўғитлаш, ғўзани бегона ўтлардан тозалаш, зараркунанда ҳашоратларга қарши кимёвий ишлов бериш ишлари ҳам тизимли равишда олиб борилмоқда. Амалга оширилаётган агротехник чора-тадбирларнинг барчаси юқори ҳосил олиш ва пахтанинг сифат кўрсаткичларини яхшилашга қаратилган.

Шу билан бирга, Агроинспекция мутахассислари томонидан туман ҳудудидаги фермер хўжаликлари далаларида етиштирилаётган пахта ҳосилини чамалаш ишларига ҳам алоҳида эътибор қаратилмоқда. Унга кўра, далалардаги ўсимликларнинг ривожланиш ҳолати, гуллаш даражаси ва ҳосил тугиш кўрсаткичлари ўрганилиб, кутилаётган ҳосил ҳажми бўйича дастлабки таҳлилий ва тахминий ҳисоб-китоблар қилинмоқда. Бу борадаги маълумотлар келгуси йиғим-терим мавсумига пухта тайёргарлик кўриш имконини беради.

Агроинспекция мутахассислари томонидан олиб борилаётган ўрганишлар бўйича тақдим этилган хулосаларга кўра, далаларда қатъий узвийлик асосида амалга оширилган мавсумий агротехник тадбирлар —  чилла сувига қондириб суғорилган ғўза қатор ораларини шудгорлаш, чилпиш, зараркунанда ҳашоратларга қарши кимёвий курашиш ва ҳосилни чамалаш ишларининг пухта олиб борилиши туфайли Амударё туманида бу йил ҳам юқори ҳосил олиш учун мустаҳкам замин яратилмоқда.

Равшан Баҳромов.