Талаба-ёшларнинг ёзги таътилини мароқли ўтказиш мақсадида қатор тадбирлар ўтказилмоқда

Мамлакатимизда ёшларнинг ҳар томонлама ривожланишига алоҳида эътибор қаратилаётган бир даврда, олий таълим муассасалари талаба-ёшларининг ёзги таътил вақтларини мазмунли ва самарали ташкил этиш ҳам муҳим аҳамият касб этмоқда. Шу мақсадда Қорақалпоғистон Республикаси Вазирлар Кенгаши ҳамда Олий таълим, фан ва инновациялар вазирлиги ташаббуси билан Ажиниёз номидаги Нукус давлат педагогика институтининг ўқув-дала амалиёти масканида “Талабалар ёзги оромгоҳи” ташкил этилди. Ушбу лойиҳа ёшларни спорт, маданий, интеллектуал ва ижтимоий фаол тадбирларга кенг жалб қилишга қаратилган бўлиб, уларнинг нафақат дам олиши, балки шахсий ва касбий кўникмаларини ривожлантириши учун ҳам кенг имкониятлар яратмоқда.

Оромгоҳ фаолиятининг асосий мақсади – талабаларнинг ёзги таътилни янги билимлар, кўникмалар ва дўстлик алоқалари билан бойитишини таъминлашдир. “Долзарб 90 кун” дастури доирасида оромгоҳда Қорақалпоғистон қишлоқ хўжалиги ва агротехнологиялар институти талаба-ёшлари ҳам фаол иштирок этмоқда. Улар учун қатор муҳим учрашувлар, маҳорат дарслари, спорт мусобақалари, театр ва кино кечалари, шунингдек, турли тўгарак машғулотлари мунтазам равишда ўтказилмоқда. Бундай тадбирлар талабаларнинг интеллектуал салоҳиятини оширишга ва ижтимоий фаоллигини кучайтиришга хизмат қилмоқда.

Оромгоҳнинг биринчи навбатига 130 нафарга яқин талаба қамраб олинган бўлиб, бу ерда уларнинг ҳордиқ чиқариши учун барча зарур шароитлар яратилган: замонавий овқатланиш жойлари, қулай дам олиш хоналари, ювиниш жойлари, спорт майдончалари, концерт ва томошалар саҳнаси, китобхон ёшлар учун махсус платформалар. Бу шароитлар талабаларнинг ўзини эркин ва қулай ҳис қилишини таъминлаб, уларнинг оромгоҳдаги фаолиятидан максимал даражада фойдаланишига ёрдам бермоқда.

Қорақалпоғистон қишлоқ хўжалиги ва агротехнологиялар институти жамоаси ҳам оромгоҳ фаолиятига ўз ҳиссасини қўшмоқда. Улар томонидан ташкил этилаётган муҳим учрашувлар, маҳорат дарслари ва спорт мусобақалари талабаларнинг касбий кўникмаларини ривожлантиришга, дунёқарашини кенгайтиришга ва бошқа олий ўқув юртларида таълим олаётган тенгдошлари билан дўстлик алоқаларини мустаҳкамлашга хизмат қилмоқда. Бундай ҳамкорлик талабалар ўртасида ўзаро тажриба алмашинувини рағбатлантириб, уларнинг келажакдаги фаолияти учун мустаҳкам пойдевор яратади.

Бу оромгоҳнинг яна бир муҳим жиҳати шундаки, у талабаларнинг ўзаро мулоқотини кучайтиради ва янги дўстлик ришталарини боғлашга ёрдам беради. Турли олий таълим муассасаларидан келган талабалар бир жойда жамланиб, биргаликда вақт ўтказиш, тажриба алмашиш ва келажакдаги режаларини муҳокама қилиш имкониятига эга бўладилар. Шунингдек, оромгоҳда ташкил этилаётган маҳорат дарслари ва тренинглар талабаларнинг танлаган соҳалари бўйича билимларини чуқурлаштиришга, янги кўникмаларни эгаллашга ва ўз салоҳиятларини тўлиқ намоён этишга шароит яратади. Бу дарслар назарий билимларни амалий кўникмалар билан уйғунлаштириб, талабаларни келажакдаги касбий фаолиятига самарали тайёрлайди.

Қорақалпоғистон қишлоқ хўжалиги ва агротехнологиялар институти томонидан амалга оширилаётган “Долзарб 90 кун” лойиҳаси ҳам талаба-ёшларнинг ёзги дам олиш вақтларини мазмунли ўтказиш, уларни турли тадбирларга жалб қилиш орқали ҳар томонлама ривожлантиришни мақсад қилган. Лойиҳа доирасида нафақат институт талабалари, балки ҳудудга яқин жойлашган маҳалла ёшлари ҳам фаол иштирок этмоқдалар. Бу эса ёшлар ўртасида соғлом турмуш тарзини тарғиб қилиш, уларнинг ижтимоий фаоллигини ошириш ва ўзаро дўстлик алоқаларини мустаҳкамлашга хизмат қилмоқда.

Лойиҳа доирасида институт ҳудудига яқин жойлашган маҳалла ёшлари ўртасида волейбол бўйича мусобақа ташкил этилди. Тадбирни институтнинг ёшлар билан ишлаш, маънавият ва маърифат ишлари бўйича биринчи проректори Муҳаммедали Даулетмуратов очиб берди. Мусобақа жуда қизиқарли ва руҳан кўтаринки руҳда ўтди. Ғолиб жамоалар институт томонидан диплом ва эсдалик совғалари билан тақдирланди. Бундай тадбирлар ёшларни янада руҳлантириб, уларни келажакда ҳам спорт ва бошқа ижтимоий тадбирларда фаол иштирок этишга ундайди.

Мамлакатимиз бўйлаб таълим муассасаларида “Долзарб 90 кун” лойиҳаси доирасида ўтказилаётган турли тадбирлар ёшларни соғлом турмуш тарзи ва дўстлик муҳитида тарбиялашга хизмат қилмоқда. Мусобақалар, викториналар, давра суҳбатлари ва бошқа тадбирлар ёшларнинг бўш вақтини мазмунли ўтказиш, уларни зарарли одатлардан асраш ва жамият учун фойдали шахслар бўлиб етишишига кўмаклашишда муҳим роль ўйнайди. Лойиҳанинг кенг қамровлилиги ва турли йўналишлардаги тадбирларни ўз ичига олиши унинг самарадорлигини оширмоқда ва ёшларнинг ҳар томонлама ривожланишига катта ҳисса қўшмоқда.