"ДОЛЗАРБ 90 КУН" ЛОЙИҲАСИ ДОИРАСИДА АМУДАРЁЛИК ЁШЛАРГА ТЕРМИЗ ШАҲРИДАГИ "ЁШ ЧЕГАРАЧИЛАР" АКАДЕМИК ЛИЦЕЙИ ҲАҚИДА МАЪЛУМОТЛАР БЕРИЛДИ
Барчамизга маълумки, 2025 йил 15 май куни Президентимиз раҳбарлигида мактаб таълими тизимидаги ислоҳотларга бағишланган видеоселектор йиғилиши бўлиб ўтди. Унда таълимнинг барча босқичларига замонавий ёндашувларни жорий этиш, ёшлар тарбияси ва уларнинг салоҳиятини рўёбга чиқариш бўйича устувор вазифалар белгилаб берилган эди.
Ушбу видеоселектор йиғилишида Президентимиз томонидан ёшларнинг бўш вақтини мазмунли ташкил этишга қаратилган “Долзарб 90 кун” дастури эълон қилиниб, мазкур дастур ёшларда ижтимоий фаолликни ошириш, уларнинг билим ва кўникмаларини ривожлантириш, маданий-маънавий савиясини юксалтиришга хизмат қилиши таъкидланиб, шу муносабат билан ёзги таътил пайтида оромгоҳларда дам олаётган, "Баркамол авлод" болалар марказлари ҳамда ҳудудлардаги маданият муассасалари ҳузуридаги тўгаракларда шуғулланаётган турли ёш тоифасидаги ўқувчи-ёшлар ўртасида спорт-соғломлаштириш тадбирларини ташкил этиш, миллий-маънавий руҳдаги давра суҳбатлари, улар қалбида ватанпарварлик, миллатлараро тотувлик туйғуларини шакллантиришга хизмат қилувчи учрашувлар ўтказиш, бу учрашувларга Миллий армиямиз зобитларини, таниқли ёзувчи ва шоирларни, ўзларининг юксак билим ва қобилиятларини амалда намоён этиб, тенгдошларига намуна бўлаётган ёшларни таклиф этиш уларнинг ҳаётий тажрибаларини кенг тарғиб қилиш кўзда тутилган эди.
Мазкур вазифалар ижросини таъминлаш мақсадида жорий йилнинг 25 июль санасида Амударё тумани Маданият маркази биносида туман ёшлари иштирокида "Долзарб 90 кун" доирасида тарғибот ва ташвиқот тадбири ўтказилди.
Тадбирда Термиз шаҳрида жойлашган Давлат хавфсизлик хизмати Чегара қўшинларига қарашли "Ёш чегарачилар" ҳарбий академик лицейи директори Музаффар Норқобилов, ДХХ чегара қўшинларининг Қорақалпоғистон Республикаси ҳудудидаги ҳарбий қисмлари зобитлари, Халқ депутатлари туман Кенгаши котибияти мудири Мансур Ўразбоев, "Ёш чегарачилар" ҳарбий академик лицейининг амударёлик намунали ўқувчиси Миржалол Маратов ҳамда туман ёшлари иштирок этишди.
Тадбирда сўзга чиққан Термиз шаҳрида жойлашган "Ёш чегарачилар" ҳарбий академик лицейи директори Музаффар Норқобилов ва бошқалар қаердаки ватанпарварлик, халқпарварлик, миллатлараро тотувлик туйғулари кучли бўлса, ўша жамият ҳар томонлама равнақ топишини, ҳеч қандай ташқи таъсирлар бу маънавий бирликка путур етказмаслигини алоҳида таъкидладилар. Шу билан бирга, ёшларни илм олишга, касб-ҳунар ўрганишга даъват этдилар. Айниқса, "Ёш чегарачилар" ҳарбий академик лицейи директори Музаффар Норқобиловнинг ҳарбий академик лицейда яратилган шарт-шароитлар, қабул квотаси, кириш имтиҳонлари, ҳарбий академик лицей битирувчилари орасидан етишиб чиққан жасоратли Ватан ҳимоячилари, уларнинг Она Юрт сарҳадларини ҳимоя қилиш борасидаги қаҳрамонликлари ҳақидаги сўзлари ёшларда катта таассуротлар қолдирди.
Тадбир давомида "Ёш чегарачилар" ҳарбий академик лицейи фаолияти, лицей ўқувчилари учун яратилган шарт-шароитлар, таълим-тарбия ва ҳарбий- амалий машғулотлар, лицейда режавий-жадвал асосида ўтказиладиган маънавий-маърифий тадбирлар хусусида ҳикоя қилувчи видеоролик ҳам намойиш этилди. Видеоролик намойишидан сўнг ёшлар ўзларини қизиқтирган саволлар билан мурожаат қилдилар ва барча саволларига масъуллар томонидан жавоблар олдилар.
Бўлиб ўтган мазкур тадбир ёшлар қалбида ватанпарварлик, халқпарварлик, миллий-маънавий қадриятларга муҳаббат туйғуларини шакллантиришга ҳамда уларнинг ижтимоий фаоллигини оширишга хизмат қилгани билан муҳим аҳамият касб этди.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
