Амударё туманида инновацион ёндашув асосида темирчилик соҳаси ривожланмоқда

Мамлакатимизда тадбиркорликни ривожлантириш давлат сиёсатининг устувор йўналишларидан бири сифатида изчиллик билан амалга оширилмоқда. Хусусий секторни қўллаб-қувватлаш, эркин иқтисодий ва кичик саноат зоналари фаолиятини кенгайтириш, ишлаб чиқариш учун солиқ ва божхона имтиёзлари жорий этиш, инвестициявий муҳитни яхшилаш каби чоралар маҳаллий ишбилармонлар учун кенг имкониятлар яратмоқда.

Бу жараёнда нафақат пойтахт ёки йирик шаҳарларда, балки чекка ҳудудларда ҳам катта лойиҳалар амалга оширилмоқда. Хусусан, Амударё туманида фаолият олиб бораётган “Amu metal-kovka art” масъулияти чекланган жамияти мисолида буни яққол кўриш мумкин.

Тадбиркор Жасурбек Бобожоновнинг фаолиятида миллий ҳунармандчилик анъаналарининг замонавий саноат талаблари билан уйғунлиги акс этади. 2002 йилдан мустақил равишда иш бошлаган Бобожонов 2013 йилда “Жумамурод уста” оилавий корхонасини ташкил этди. 2022 йилдан фаолият янги босқичга кўтарилиб, оилавий корхона “Amu metal-kovka art” МЧЖ сифатида рўйхатдан ўтказилди.

Бугун ушбу корхона нафақат анъанавий темир маҳсулотларини ишлаб чиқариш, балки инновацион ёндашув асосида замонавий иситиш тизимларини тайёрлаш бўйича ҳам бозорда ўз ўрнига эга бўлиб улгурди.

Корхона томонидан ишлаб чиқарилаётган “Аму тепло” брендидаги иситиш қозонлари ўзининг самарадорлиги, энергия тежамкорлиги ва фойдаланишдаги хавфсизлиги билан ажралиб туради. Улар табиий газ ва қаттиқ ёқилғида ишлайди, шунингдек, бошқа қозонларга нисбатан 5–6 баравар арзонроқ харажатни талаб этади.

Масалан, битта хонадон ёки иссиқхонани камида 30–50 килограмм кўмир билан бутун сутка давомида иситиш мумкин. Бу нафақат иқтисодий жиҳатдан мақбул, балки экологик талабларга ҳам мос ечим ҳисобланади. Қозон эшикларининг сув, чанг ва ҳаводан ҳимояланганлиги, тутунни ташқи муҳитга чиқармаслиги унинг хавфсиз фойдаланишини таъминлайди.

Айни пайтда “Аму тепло” иситиш қозонлари нафақат Амударё туманида, балки Нукус, Қўнғирот, Тўрткўл каби туман ва шаҳарларда ҳам харидоргир маҳсулотга айланди. Шу билан бирга, корхонада темир эшик ва дарвозалар, миллий услубдаги декоратив темир маҳсулотлар ҳам буюртма асосида тайёрланмоқда. Мижоз эҳтиёжларига мос индивидуал ёндашув маҳсулотнинг рақобатбардошлигини оширмоқда.

Жасурбек Бобожонов раҳбарлигидаги жамиятда 10 нафар доимий ишчи, бир нечта мавсумий ходим ва бир неча нафар шогирд фаолият юритмоқда. Корхона нафақат иқтисодий фойда келтирмоқда, балки ҳудудий ижтимоий барқарорликка ҳам ҳисса қўшмоқда. Ёшларни касбга ўргатиш, уларга меҳнат маданиятини сингдириш орқали келажак авлодда ҳунар орқали ҳаёт қуриш тушунчаси шакллантирилмоқда.

Давлат томонидан яратилган имкониятларни тўғри баҳолаб, режали ва оқилона фаолият юритган ҳолда ҳар бир тадбиркор, ҳатто чекка ҳудудда ҳам, нафақат ўз турмуш шароитини яхшилаши, балки ҳудудни ижтимоий-иқтисодий ривожлантиришга муносиб ҳисса қўша олиши мумкин.

Жасурбек Бобожоновнинг тажрибаси ҳозирги замон тадбиркоридан фақат меҳнат ва ташаббус эмас, балки доимий изланиш, технологик саводхонлик талаб қилишини кўрсатади. Чунки муваффақиятли тадбиркор — бу фақат даромад манбаи эмас, балки жамиятда ижобий ўзгаришлар етакчиси ҳамдир.

Шоҳзод Қурбонбоев.