30-СОНЛИ ДАВЛАТ МАКТАБГАЧА ТАЪЛИМ ТАШКИЛОТИДА ЎТКАЗИЛГАН "ХАЙР, БОҒЧА, САЛОМ МАКТАБ" ТАДБИРИ МАРОҚЛИ ТААССУРОТЛАРГА БОЙ БЎЛДИ
Чойкўл овулида жойлашган Амударё тумани Мактабгача ва мактаб таълими бўлими тасарруфидаги 30-сонли давлат мактабгача таълим ташкилоти ҳудуд аҳолисининг мушкулини осон қилиб, фарзандларига намунали таълим-тарбия бераётганидан ота-оналар мамнун. Чунки давлат идораларида, ҳудуддаги фермер хўжаликларида, турли соҳаларда фаолият олиб борувчи ота-оналар ўз иш жараёнларини бехавотир амалга оширишларида мазкур муассаса тарбиячи-педагогларининг ҳиссаси катта.
Муассасада болажонларнинг яйраб ўсишлари учун барча шароитлар яратилган. 1989 йилда қурилиб, фойдаланишга топширилган, лойиҳадаги қуввати 50 ўринга мўлжалланган муассаса биноси 2019 йилда "Обод қишлоқ" дастури доирасида сифатли таъмирланиб, теварак-атрофи ободонлаштирилди. Муассаса ходимлари ва ота-оналарнинг ўзаро ҳамжиҳатликлари боис, ташкилот ҳудуди кўкаламзорлаштирилди ва гулзорлар барпо қилинди. Айни пайтда ям-яшил табиат бағридаги ушбу сўлим болалар масканида 3 та асосий гуруҳда 75 нафар кичкинтойлар тарбияланмоқда.
Муассасада фаолият олиб борувчи 22 нафар ходимларнинг 10 нафари ўз касбининг билимдонлари бўлган тарбиячи-педагоглардир. Мусиқа, спорт, хорижий тиллар йўналишларидаги педагогларнинг 3 нафари олий, 3 нафари ўрта махсус маълумотга эга малакали мутахассислар бўлиб, улар томонидан олиб бориладиган машғулотларнинг барчаси тарбияланувчиларнинг ёш тоифаларига мутаносиб равишда, интерфаол усулларда ўтказилгани боис, болажонлар учун жуда қизиқарли ва мароқли.
Айниқса, мактабга тайёрлов гуруҳи тарбияланувчиларининг нутқий, ақлий ва жисмоний ривожланишишини таъминлашга қаратилган инновацион лойиҳалар асосидаги таълимий ва тарбиявий машғулотларнинг узвийлиги туфайли 6-7 ёшдаги болажонлар орасида интилувчанлик, мактаб ҳаётига қизиқиш, билимга чанқоқлик хислатларининг шаклланишига эришилмоқда.
Муассасада жорий йилги таълим-тарбия жараёнида 25 нафар тарбияланувчи мактабга тайёрлов гуруҳи учун белгиланган режавий-машғулотларни тўлиқ ўзлаштирдилар ва 18 июль санасида ўқишга, илм олишга иштиёқманд 25 нафар жажжи болажонлар учун муассасада "Хайр, боғча, салом мактаб!" мавзусида адабий-мусиқий хайрлашув тадбири ўтказилди. Тадбирда кичкинтойларнинг ота-оналари, муассаса тарбиячи-педагоглари иштирок этдилар. Болажонлар бир неча йил давомида ўзлари учун қадрдон бўлиб қолган "боғча опалари"га миннатдорчилик рамзи сифатида шеърлар айтиб беришди, мусиқа тўгарагида ўрганган ашула ва рақсларини ижро этишиб, ота-оналарини қувонтиришди. Хорижий тил, спорт тўгаракларида шуғулланиш орқали ўзлаштирган янги сўзлари, спорт машқларини амалда намойиш қилиб бердилар. Албатта, фарзандларининг хорижий тил ўрганишга бўлган интилишлари, спортга қизиқишларидан ота-оналар мамнун бўлдилар.
Тадбир давомида сўзга чиққан ота-оналар, тарбиячи-педагоглар болажонларга мактаб таълимини пухта ўзлаштириш, келажакда она Ватанга муносиб фарзандлар сифатида вояга етишларида эзгу тилакларини билдирдилар ва уларга ўзларининг совғаларини топширдилар. Шу куни бири-биридан мароқли таассуротларга бой тарзда ўтган тадбир якунида муассасанинг 25 нафар мактабга тайёрлов гуруҳи тарбияланувчилари қувноқ мусиқа садолари остида тантанали равишда мактаб таълими сари кузатиб қўйилди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
