52-сонли мактабни 40 йил аввал тамомлаган синфдошлар учрашуви бўлиб ўтди

Инсон ҳаётида ҳеч қачон хотирадан ўчмайдиган дамларни ато этувчи энг нурли ва гўзал ошён – бу мактабдир. Гўзал ва бетакрор табиати ниҳоятда ёқимли, бағрида болаликнинг ўйинқароқ, шўхликларга бой лаҳзаларини, ўсмирликнинг бири-биридан сирли орзулари ва ширин дамларини абадий муҳрлаган бу муқаддас даргоҳ, инсон неча ёшда бўлишидан қатъий назар, оҳанрабодек ўзига тортаверади. Бу даргоҳ ҳар биримиз учун қадрли, азиз. Шунинг учун ҳам бизга оқ-қорани танитиб, катта ҳаёт сари учирма қилган ана шу қутлуғ макон олдида ўзимизни қарздор ҳис қилиб яшаймиз. Ҳар гал жонажон мактабимиз олдидан ўтганимизда қалбларимизда ҳаяжон, ажиб соғинч ҳисси билан болаликдаги қадрдон дўстлар ва азиз устозлар билан боғлиқ эзгу хотираларни ёдга оламиз.

Амударё туман Мактабгача ва мактаб таълими бўлими тасарруфидаги 52-сонли умумтаълим мактабини бундан роппа-роса 40 йил аввал 42 нафар ёшлар битиришди. Устозлари, Аллоҳ раҳмат қилсин, синф раҳбари Тўлибой Юсупов, айни пайтда кексалик гаштини сураётган Зулфия Бекжонова, Гулбаҳор Искандарова, Саъдулла Абдуллаев, Бозорбой Ўрозбоевлар таҳсилини олган ёшлар ҳаётда ўз ўринларини топиб, бугунги кунда кўпчилиги таълим-тарбия соҳаси фидойилари, эл-юртга камарбаста. оилапарвар, ватанпарвар, обрў-эътиборли инсонлар бўлиб етишганлар.

Ҳамиша бири-бирини қадрлаб, ўрталаридаги болаликнинг ўзига хос меҳрини ардоқлаб яшаётган собиқ синфдош дўстлар яқинда ўзлари таълим-тарбия олган 52-сонли умумтаълим мактабига 40 йилдан сўнг ташриф буюрдилар.

Ёшлари олтмишни қоралаб қолган, чеҳраларида нуронийлик акс этиб турган қадрдон дўстлар болалик ва ўсмирликнинг бетакрор онларига гувоҳ бўлган синф хоналарига киришиб, бир неча дақиқа яна ўқувчилик мақомида устозлари таҳсилини олдилар.

Синф журнали саҳифаларини очган устозлари шогирдларига разм солиб, йўқлама қилишди. Ҳаёт қонуни – бемаврид вафот этган собиқ ўқувчиларини ёдга олишиб, улар билан боғлиқ хотиралар ҳақида сўз юритдилар. Шогирдларининг ҳаётда эришган ютуқлари, уларнинг фарзандлари ва неваралари тўғрисидаги ҳикояларидан мамнун бўлдилар.

Учрашув тадбири давомида собиқ синфдош дўстлар қадрдон мактаб ҳаёти билан яқиндан танишдилар ва бугунги кунда мамлакатимизда таълим-тарбия соҳасида амалга оширилаётган ислоҳотлар, ўқувчи-ёшлар учун яратилган шарт-шароитлар соҳани тубдан ўзгартириб юборганини мамнуният билан таъкидладилар.

Шу билан бирга ҳозиргидай шароитлар мукаммал бўлмаган даврда ҳам устозлари фидойилик намуналарини кўрсатиб ишлаганларини ва ана шу фидойи устозлар меҳнати туфайли ўзлари яхши таълим-тарбия олишиб, ҳаёт синовларини мардона енгиб яшашга ўрганганларини алоҳида эътироф этишиб, устозларига миннатдорлик рамзи сифатида совғалар тақдим қилдилар.

Болаликнинг бетакрор дамларидан то бугунгача давом этиб келаётган ва ўзлари билан бирга улғайиб, янада мустаҳкам риштага айланган қадрдонлик туйғулари билан йўғрилган учрашув тадбири Манғит шаҳридаги ҳашаматли “Diamond” ресторанида янада жўшқинлик билан давом этди.

Учрашув тадбирида сўзга чиққан собиқ устозлари 40 йиллик қадрдон дўстларнинг ҳар бирига келгуси ҳаётларида мустаҳкам соғлик, оилавий бахт-саодат тиладилар. Файзли дастурхон атрофида бири-бирининг дийдоридан мамнун собиқ синфдошлар қалбларидаги самимият ва меҳр туйғулари уларни янада яқинлаштирди. Ширин суҳбатлар рақсларга уланиб, устозлар ва дўстлар даврасига янада кўркамлик ва файз бағишлади. Собиқ синфдошларнинг 40 йилдан кейинги дийдорлашув кечаси ҳар бир иштирокчи учун бетакрор ва гўзал таасуротларни ато этди.

РОБИЯ ЙЎЛДОШЕВА.