АМУДАРЁ ТУМАНИДАГИ 56-СОНЛИ МАКТАБДА “ЖАСОРАТ СИНФИ” ТАШКИЛ ЭТИЛДИ

Эсини таниган ўғил бола борки, улғайгач, албатта ҳарбий либос кийишни, қўлида қурол тутиб, она Ватан ҳимоячиси деган шарафли номга эга бўлишни орзу қилади. Мамлакатимизда ана шундай улуғвор туйғулар оғушида, қалбларида ҳарбий ҳаётга бўлган меҳр ва интилиш билан яшаётган ёш авлодни қўллаб-қувватлаш, уларнинг эзгу орзуларини рўёбга чиқаришларида кўмаклашиш мақсадида амалга оширилаётган чора-тадбирлар эса ватанпарвар, миллий-маънавий қадриятларга садоқатли, ҳарбий бўлиш, она Ватанга сидқидилдан хизмат қилишни ўзлари учун юксак шон-шараф деб билгувчи Янги Ўзбекистоннинг оловқалб ёшларини кашф этиш имконини бермоқда.

Президентимиз раҳбарлигида 2023 йилнинг 13 январь куни ўтказилган Ўзбекистон Республикаси Хавфсизлик Кенгашининг кенгайтирилган йиғилишида Ўзбекистоннинг давлат суверенитети, дахлсизлиги ва ҳудудий яхлитлигини таъминлаш – тарих ва келажак авлодлар олдидаги муқаддас бурч экани таъкидланиб, қатор вазифалар қўйилган эди.

Ушбу йўналишдаги ишларни янада такомиллаштириш мақсадида 2024 йилнинг 15 ноябрь санасида Ўзбекистон Республикаси Президентининг “Ўқувчи-ёшларни чақирувга қадар бошланғич тайёрлаш тизимини янги босқичга олиб чиқиш чора-тадбирлари тўғрисида”ги 393-сонли қарори қабул қилинди ва ушбу Қарор билан мамлакатимизнинг барча ҳудудларида “Жасорат мактаблари”, ҳар бир туманда эса Мактабгача ва мактаб таълими бўлими тасарруфидаги умумтаълим мактабларидан бирида “Жасорат синфлари”ни ташкил этиш белгилаб берилди.

“Жасорат мактаблари”ни ташкил этишдан мақсад ўсиб келаётган ёш авлодни ҳарбий-ватанпарварлик, миллий ва умуминсоний қадриятларга ҳурмат, юксак маънавий-ахлоқий фазилатлар руҳида тарбиялаш, уларнинг онгига тинчлик ва миллатлараро тотувликни кўз қорачиғидек асраб-авайлаш зарурлигини чуқур сингдириш, ёшларнинг барча йўналишларда билим ва кўникмаларини ошириш, “Ўзбекистон—2030” стратегиясида мамлакатимизни ҳар томонлама ривожлантириш бўйича белгиланган кенг кўламли вазифаларни самарали амалга ошириш орқали ўқувчи-ёшларни чақирувга қадар бошланғич тайёрлаш тизимини янги босқичга олиб чиқишдан иборат.

Ушбу кенг кўламли вазифаларни амалга ошириш мақсадида Ўзбекистон Республикаси Мактабгача ва мактаб таълими Вазирлиги ҳамда Мудофаа Вазирлигининг 2025 йил 23 майдаги қўшма Қарори асосида “Умумий ўрта таълим муассасаларидаги “Жасорат мактаблари”га ўқувчиларни қабул қилиш ва ўқув-тарбиявий жараёнини ташкил этиш тартиби тўғрисида”ги Низом тасдиқланди.

Ушбу Низом талабларидан келиб чиқиб, ана шундай “Жасорат мактаби”нинг илк “Жасорат синфи” Амударё туман Мактабгача ва мактаб таълими бўлими тасарруфидаги 56-сонли умумтаълим мактабида ҳам ташкил этилиб, жорий йилнинг 2 июнь санасидан мазкур синфга ўқувчиларни қабул қилиш жараёни бошланди.

Мазкур Низом талабига кўра, “Жасорат синфи”га умумтаълим мактабларининг 4-синфини битирган ўқувчилар 5-синф учун қабул қилинади ва ўқиш муддати 7 йилдан иборат бўлади.

Таълим жараёнлари 5-11-синфларда кундузги таълим шаклида, умумтаълим муассасалари учун белгиланган давлат таълим мезонларига мувофиқ амалга оширилади ва “Жасорат синфи”га 26 нафар ўқувчи шаффофлик асосида ташкиллаштириладиган тест синовлари орқали танлаб олинади. Синфда математика, чақирувга қадар бошланғич тайёргарлик, тарих, жисмоний тарбия, чет тили ва физика фанлари чуқурлаштирилган тарзда ўқитилади. Ўқув йили давомида икки марта ҳарбий полигонларда, ҳар чоракда бир марта ҳарбий қисмларда машғулотлар олиб борилади. Шунингдек, 9-синфни битирган ўқувчиларга таянч ўрта таълим тўғрисидаги, 11-синфни якунлаганларга умумий ўрта таълим тўғрисидаги шаҳодатнома берилади.

“Жасорат мактаблари”ни аъло баҳоларга битирган ва “Ватан таянчи” отрядининг аъзоси бўлган бир нафар ўқувчига Мудофаа Вазирлиги томонидан олий ҳарбий ва ҳарбийлаштирилган ҳамда юридик таълим муассасаларига ўқишга кириш учун имтиёзли тавсиянома тақдим этилади.

Амударё туманидаги 56-сонли умумтаълим мактабида ташкил этилган илк “Жасорат синфи”га қабул жараёнининг биринчи кунидаёқ 10 нафардан зиёд ўқувчилар келажакда она Ватан ҳимоячиси бўлиш истагини билдириб, ҳужжат топширишди.

Айни пайтда мактабга қабул жараёни уюшқоқлик билан давом этмоқда. Ўз фарзандларининг орзу-интилишларини қўллаб-қувватлаш истагида бўлган ота оналар таълим-тарбия ишлари яхши йўлга қўйилган 56-сонли мактаб негизида илк фаолиятини бошлаётган “Жасорат синфи” ўқувчилари келажакда ҳақиқий ватанпарвар, жасоратли инсонлар бўлиб вояга етишларига катта ишонч билдиришмоқда. Зеро, ватанпарварлик – халқимиз учун олий қадрият, ана шу қадриятга содиқлик эса чинакам жасорат тимсолидир.

РОБИЯ ЙЎЛДОШЕВА.