Амударё туманида Халқаро болаларни ҳимоя қилиш куни кенг нишонланди

1 июнь – Халқаро болаларни ҳимоя қилиш куни муносабати билан Амударё тумани Истироҳат боғида катта байрам тадбири бўлиб ўтди.

Байрам тадбирида туман ҳокими Собир Хўжаметов иштирок этиб, барча болажонларни ушбу қувончли кун билан самимий табриклади. У ўз табригида болалар келажагимиз эгалари экани, уларнинг соғлом ва бахтли улғайишлари учун барча шарт-шароитлар яратилаётгани хусусида сўз юритди.

Таъкидланганидек, юртимизда болалар манфаатларини ҳимоя қилиш, уларни ҳар томонлама қўллаб-қувватлаш давлат сиёсатининг устувор йўналишларидан биридир. Муҳтарам Президентимиз раҳбарлигида олиб борилаётган ислоҳотлар замирида ёш авлоднинг бахтли ва соғлом улғайишини таъминлаш, уларнинг ҳар томонлама камолотини қўллаб-қувватлашдек эзгу мақсадлар ётади. Ҳудудларда янгидан барпо этилаётган мактабгача таълим муассасалари, умумтаълим мактаблари, замонавий спорт майдончалари ва кутубхоналар фарзандларимизнинг баркамол авлод бўлиб вояга етишлари учун қаратилаётган эътибор намунасидир.

Байрам тадбири давомида тумандаги самарали фаолият олиб бораётган мактабгача таълим ташкилотлари жамоаларига ташаккурномалар топширилди. Бу орқали таълим-тарбия муассасаларининг болалар тарбиясига қўшаётган ҳиссаси юксак эътироф этилди.

Шунингдек, болажонлар учун ранг-баранг концерт дастурлари, саҳна кўринишлари, мусиқий чиқишлар, спорт ўйинлари ва ижодий танловлар ташкил этилди. Тумандаги мактабгача таълим ташкилотлари тарбияланувчилари бир-биридан ажойиб қувноқ рақслар, куй-қўшиқлар ижро қилдилар. Туман Маданият бўлими хонандалари томонидан куйланган шўх-шодон қўшиқлар барчага юқори кайфият бағишлади. Болалар байрамни катта хурсандчилик ва қувонч билан нишонлаб, эсдалик совғаларга эга бўлишди.

Айтиш жоизки, ҳар йили 1 июнь санасида дунё бўйлаб Халқаро болаларни ҳимоя қилиш куни кенг нишонланади. Бу сана – инсониятнинг энг нозик, энг мусаффо қалблари бўлган болалар ҳақидаги ғамхўрлик, меҳр ва эътибор байрамидир. Бу кун – фарзандларимизнинг бахтли болалиги, порлоқ келажаги ва ҳимояси учун ҳар биримиз масъул эканлигимизни яна бир бор эслатади.

Зеро, болалар – миллатнинг келажаги, ҳар бир халқнинг эртанги кундан умиди ва таянчидир. Уларнинг соғлом, билимли ва бахтли бўлиб вояга етишлари ҳар қандай жамият учун энг устувор вазифадир. Айнан шу сабабли, бу муҳим санада нафақат байрам тадбирлари, балки болаларнинг ҳуқуқлари, манфаатлари ва тарбиясига оид масалаларга алоҳида эътибор қаратилади.

1 июнь санаси 1950 йилдан бошлаб расмий равишда Халқаро байрам сифатида нишонлаб келинади. Бу ташаббус илк бор Бирлашган миллатлар ташкилоти томонидан илгари сурилиб, бутун дунё мамлакатларига болаларни ҳар томонлама асраб-авайлаш, уларни жисмоний ва маънавий жиҳатдан қўллаб-қувватлаш, болаларнинг ҳуқуқларини ҳимоя қилиш чораларини кўриш тавсия этилган. Бугунги кунга келиб, бутун дунё бўйлаб, жумладан, юртимизда ҳам байрам сифатида кенг нишонланади.

Ушбу сана фарзандларимизнинг бахтли болалиги, порлоқ келажаги ва ҳимояси учун ҳар биримиз масъул эканлигимизни яна бир бор эслатади. Бу кунда бутун мамлакатимиз бўйлаб байрам тадбирлари, концертлар, болалар учун турли кўнгилочар дастурлар ўтказилади. Болалар табассуми, уларнинг беғубор қувончи эса ҳар қандай инсонни меҳр ва эзгулик сари етаклайди.

Чарос Арслонова, туман ҳокимлигининг Ахборот хизмати раҳбари.