“ТАДБИРКОРЛАРГА ҲУҚУҚИЙ ЁРДАМ” АКЦИЯСИ ДОИРАСИДА ФЕРМЕР ВА ДЕҲҚОН ХЎЖАЛИКЛАРИ РАҲБАРЛАРИ ИШТИРОКИДА УЧРАШУВ ЎТКАЗИЛДИ

Мамлакатимизда иқтисодиётни янада либераллаштириш, тадбиркорлар ва ишбилармонларга берилаётган имкониятларни кенгайтириш, хусусий мулкни ҳар қандай тазйиқлардан ҳимоялаш, бизнес муҳитини турли босимлардан холи қилиш масалаларига алоҳида эътибор қаратилмоқда.

Хусусан, тадбиркорлик фаолиятининг ҳимоясини янада мукаммаллаштириш, ишбилармонларнинг ҳақ-ҳуқуқлари, хусусий мулк дахлсизлигини таъминлаш мақсадида тадбиркорларнинг мулкка доир ҳуқуқларини бузиш ҳолатларига йўл қўйган мансабдор шахсларга нисбатан чоралар кўрилиб, бўлар-бўлмас, ноқонуний текширишларга чек қўйилаётгани, ҳуқуқи бузилган тадбиркорларга масъуллар томонидан беғараз ҳуқуқий маслаҳат ва ёрдамлар тақдим этилаётгани бу борада ўзининг ижобий самарасини бермоқда.

Айниқса, масъул ташкилотларнинг етакчи мутахассислари томонидан ҳамкорликда ташкил этилаётган ҳуқуқий маслаҳат ва амалий ёрдам тадбирлари тадбиркорларнинг ўз фаолиятларини эмин-эркин адо этишларида муҳим аҳамият касб этмоқда. Бу борада Амударё туманида амалга оширилаётган тизимли ишлар эътиборга муносиб.

27 май куни Тадбиркорлар ва ишбилармонлар ҳаракати ­– Ўзбекистон Либерал-демократик партияси Амударё туман Кенгаши депутатлари, туман Адлия бўлими, Фермерлар, деҳқон хўжаликлари ва томорқа ер эгалари Кенгаши, туман Камбағалликни қисқартириш ва бандлик бўлими ҳамда Савдо-саноат палатаси масъул мутахассислари ҳамкорлигида ишбилармонлар билан учрашув ўтказилди. “Тадбиркорларга ҳуқуқий ёрдам” акцияси доирасида ташкил этилган учрашувда туманда фаолият олиб борувчи тадбиркорлар, фермерлар, деҳқон хўжаликлари раҳбарлари, намунали томорқа ер эгалари иштирок этдилар.

“Фермер ва деҳқон хўжаликларига ҳуқуқий ёрдам” мавзусидаги учрашувда тадбиркорларни қийнаб келаётган бир қатор муаммоли масалалар юзасидан ўзаро фикр алмашилиб, тадбиркорларга зарур маслаҳат ва тавсиялар берилди.

Учрашув давомида фермерларни қийнаб келаётган муаммолардан бири – фермер хўжаликлари ва кластер корхонаси ўртасида ҳар йилги ҳосил бўйича тузиладиган контрактация шартномаларининг айрим бандлари бўйича тушунтиришлар олиб борилди.

Шунингдек, тадбиркорлик субъектларига тааллуқли мулк дахлсизлигини таъминлаш, тадбиркор ва ишбилармонлар учун тақдим этилаётган солиқ имтиёзлари, иш берувчи ҳамда ишчи-ходимлар ўртасидаги меҳнат шартномасининг амал қилиш муддатлари ва меҳнат ҳақи тўлашнинг шакллари тўғрисида мутахассислар томонидан ҳуқуқий тушунчалар ва тавсиялар берилди.

Бундан ташқари, фермерлар ва тадбиркорлар томонидан тушган саволлар, уларнинг фаолиятида учраётган муаммоли масалалар ҳамда таклифлар масъуллар томонидан атрофлича ўрганилиб, тадбиркорлар билан биргаликда муҳокама қилинди ва бу бўйича тушунмовчиликлар учрашув жараёнида бартараф этилди.

Қизғин баҳс-мунозараларга бой, ҳуқуқий савол-жавоблар тарзида ўтган учрашувда ишбилармон ва тадбиркорлар ўзларини қийнаб келаётган муаммоли масалалар бўйича ҳуқуқий билимларини янада ошириш имконига эга бўлдилар.

Хулоса қилиб айтганда, туманимизда тадбиркорлик субъектларига қаритилаётган бу каби эътибор иқтисодиётни янада либераллаштириш, тадбиркорларнинг жамият тараққиётидаги ўрнини мустаҳкамлаш, ишбилармонларнинг ҳақ-ҳуқуқлари ҳамда самарали фаолиятини таъминлаш орқали аҳоли фаровонлигини янада ошириш имконини беради.

РОБИЯ ЙЎЛДОШЕВА.