АМУДАРЁ ИХТИСОСЛАШТИРИЛГАН МАКТАБИДА “СЎНГГИ ҚЎНҒИРОҚ” ТАДБИРИ ЎТКАЗИЛДИ
Мактаб – буюк орзулар остонаси. Ана шу муқаддас маконда кечган ҳар бир кун инсонга эзгу хотиралар бахш этади. Болаликда уйғонган дўстлик, қадрдонлик туйғулари ҳеч қачон унутилмайди. Айниқса, илм олиш сари ташланган қадамларга, орзуларга гувоҳ бўлган жонажон мактаб инсоннинг шахс сифатида шаклланиш жараёнида энг самимий дўст, энг улуғ устоз каби азиз ва мукаррамдир. Шунинг учун ҳам мактаб таҳсилини тамомлаган ҳар бир вояга етган ўғил-қиз ўзларига оқ-қорани танитган муқаддас даргоҳ билан кўзларида ёш, қалбларида чексиз ҳаяжон, улуғвор орзулар ила хайрлашадилар.
Жорий 2024-2025 ўқув йили якунларига бағишланган “Сўнгги қўнғироқ” тадбирлари 24 май санасида бутун мамлакатимизда бўлгани каби Амударё туманида ҳам ҳаяжонли дақиқаларга, ёрқин таассуротларга бой тарзда кенг нишонланди. Шу куни тумандаги Амударё ихтисослаштирилган мактабининг байрамона безатилган ҳовлисида, “Илм – энг улуғ шараф!” шиори остида бўлиб ўтган “Сўнгги қўнғироқ” тадбири мактаб битирувчилари учун бири-биридан ширин, гўзал дақиқаларни ҳадя этди.
Муҳтарам Президентимизнинг битирувчиларга йўллаган табриги билан бошланган мазкур тадбирда ота-оналар, тадбирга ташриф буюрган Янгиобод маҳалла фуқаролар йиғини масъуллари ҳамда мактаб ўқитувчилари битирувчи ёшларга ўзларининг эзгу тилакларини билдирдилар.
Айниқса, Президентимизнинг табригидаги “Бугунги кунда биз ўз олдимизга қўяётган буюк мақсадларни амалга оширишда бутун халқимиз қатори, билимли, ҳунарли, тадбиркор ва ватанпарвар, ҳар томонлама етук ёшларга таянамиз. Сизлардек ўз кучига ишонган, қатъиятли ёшлардан қадрдон мактабингиз, азиз устозларингиз ва ота-оналарингиз, бутун халқимиз фақат эзгуликлар, ёрқин натижалар кутади” – деган сўзлари ёшлар қалбига даъваткор руҳ, ишонч ва қатъият бағишлади.
Тадбир давомида Амударё ихтисослашган мактаби ўқувчилари эришаётган ютуқлар тилга олиниб, мактаб ўқувчиларининг ОТМларга ўқишга кириш кўрсаткичлари йил сайин ортиб бораётгани алоҳида қайд этилди. Хусусан, жорий ўқув йилида мактабни битираётган 76 нафар ўқувчилардан 56 нафари миллий ва халқаро даражадаги сертификатлар эгалари бўлишди. Улардан 2 нафари фанлар олимпиадасининг туман ва Қорақалпоғистон Республикаси босқичларида ғолибликни қўлга киритишиб, мамлакат босқичида муваффақиятли иштирок қилдилар. Битирувчилардан Жаҳонгир Йўлдошев эса нуфузли хорижий ОТМларининг тест синовларидан муваффақиятли ўтиб, бир йўла 6та ОТМнинг тўлиқ грантларини ютиб олди.
“Сўнгги қўнғироқ” тадбирида сўзга чиққан ота-оналар ва тадбирнинг барча меҳмонлари мактабда ёш авлод таълим-тарбиясига қаратилаётган эътибор, яратилган шарт-шароитлар, ўқитувчи ва мураббийлар томонидан амалга оширилаётган бири-биридан қизиқарли дарс-машғулотлари, энг замонавий таълимий дастурлардан миннатдор эканликларини алоҳида эътироф этдилар ва мустақил ҳаётга қадам қўйиш арафасида турган фарзандларига ўзлари танлаган йўналишлар бўйича Президентимиз, халқимиз ишонган, она Ватанга садоқатли, муносиб мутахассислар бўлиб етишишларида самимий тилаклар тиладилар.
Тадбирнинг адабий-мусиқий қисмида “Илм – энг улуғ шараф!” шиори мазмун-моҳиятини ўзида мужассам этган концерт дастури намойиш этилиб, ёшлик, дўстлик илм-у зиё, Ватан ва устозларни шарафловчи куй-қўшиқлар янгради, гўзал рақслар ижро этилди.
Шундан сўнг рамзий сўнгги қўнғироқ жаранглаб, мактабнинг 76 нафар битирувчи ёшлари мустақил ҳаётнинг илк синовлари – давлат тест синовларини муваффақиятли топшириш сари дадил қадамларини қўйдилар.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
