Давлат хавфсизлик хизмати кубоги спорт мусобақаларининг туман босқичи ғолибларини тақдирлаш маросими бўлиб ўтди

Бугунги кунда мамлакатимизда ёш авлодни ҳар томонлама соғлом, ақлан ва жисмонан етук этиб вояга етказиш масаласи давлат сиёсатининг устувор йўналишларидан бири ҳисобланади. Спорт ва жисмоний тарбия баркамол авлодни шакллантиришда муҳим аҳамият касб этади. Спорт инсон саломатлигини мустаҳкамлаш, соғлом турмуш тарзини шакллантириш, мақсад сари интилиш, ирода, сабр-тоқат ва жамоада ишлаш кўникмаларини ривожлантиришда муҳим восита бўлиб хизмат қилади. Айнан спорт орқали ёшлар ўзларида қатъият, интизом, масъулият ва ватанпарварлик туйғуларини шакллантиради.

Шу сабабли ҳам соҳа ривожига алоҳида эътибор қаратилиб, Президентимиз ташаббуси билан жойларда замонавий спорт иншоотлари, болалар спорт мактаблари, стадион ва спорт заллари қурилмоқда. Бу эса ёшлар учун спорт билан мунтазам шуғулланишга кенг имконият яратмоқда.

Давлат хавфсизлик хизмати раиси кубоги спорт мусобақалари ҳам баркамол авлодни вояга етказишдек хайрли ишларга ҳисса қўшиш мақсадида ташкил қилинган бўлиб, айни кунларда жойларда мазкур мусобақаларнинг туман босқичлари якунланиб, иштирокчилар кейинги босқичга тайёргарлик кўрмоқдалар. 21 май куни мазкур мусобақаларнинг Амударё туман босқичи ғолибларини тақдирлаш маросими тантанали тарзда ўтказилди. Туман Хотира майдонида маросим учун катта тайёргарлик кўрилиб, байрам дастури ташкил этилди.

Тадбирда туман ҳокими Собир Хўжаметов бошчилигидаги раҳбарлар, жамоатчилик фаоллари, спортчи ёшлар ҳамда аҳоли вакиллари иштирок этди. Тадбирда мусобақанинг туман босқичида ғолибликни қўлга киритган маҳаллалар жамоалари медаль, диплом, кубок ҳамда қимматбаҳо совғалар билан тақдирланди.

Маросимда туман ҳокими Собир Хўжаметов сўзга чиқиб, юртимизда ёш авлодни ҳар томонлама соғлом, маънавий етук ва ватанпарвар қилиб тарбиялаш устувор йўналишларидан эканлиги, бу борада амалга оширилаётган кенг кўламли ислоҳотлар қаторида спорт мусобақалари, хусусан, Давлат хавфсизлик хизмати раиси кубоги учун ўтказилаётган беллашувларнинг ўрни ва аҳамияти беқиёс эканлиги хусусида сўз юритди. Шунингдек, ғолиб ёшларни муваффақият билан табриклади ва кейинги босқичларда юқори натижаларни кўрсатишда уларга юксак ишонч билдирди.

Мусобақанинг туман босқичида мини футбол бўйича ўғил болалар ўртасида фахрли 1-ўринни Фаровон маҳалласи жамоаси, 2-ўринни Ойбек ва 3-ўринни Хизр эли маҳалласи жамоалари эгаллади. Қизлар ўртасида эса фахрли 1-ўрин Холимбег овули, 2-ўрин Оқ олтин ва 3-ўрин Тўлқин овули жамоасига насиб этди.

Мусобақа доирасида футбол бўйича ўтказилган баҳслар ҳам муросасиз кечди. Жамоалар чемпионликни қўлга киритиш учун бор куч ва имкониятларини ишга солдилар. Футбол бўйича беллашувлар якуний натижаларига кўра Тўлқин овули жамоаси фахрли 1-ўринни, Куюк кўпир овули жамоаси 2-ўринни ва Қангли овули жамоаси 3-ўринни қўлга киритди. Ғолиб жамоалар кейинги босқич – Қорақалпоғистон Республикаси босқичи мусобақаларига йўлланма олди.

Таъкидлаш жоизки, мазкур мусобақалар ёшлар ўртасида соғлом турмуш тарзини тарғиб қилиш, жисмоний тарбия ва спортга бўлган қизиқишни ошириш, шунингдек, ҳарбий-ватанпарварлик руҳини мустаҳкамлашда муҳим аҳамият касб этмоқда.

Шунингдек, мусобақалар нафақат спортчилар ўртасида соғлом рақобат муҳитини шакллантиради, балки ёшларда жисмоний тайёргарликни ошириш, интизом, жамоавийлик, ирода ва қатъият каби фазилатларни камол топтиришга хизмат қилади. Айниқса, мусобақаларнинг ҳарбий-ватанпарварлик руҳида ўтиши ёшлар қалбида она Ватанга садоқат, фидойилик ва масъулият туйғуларини янада кучайтиради.

Қолаверса, бу мусобақалар орқали ёшлар ўзларининг спортга бўлган қобилиятларини намоён этиш, ўз устида ишлаш ва юқори натижаларга эришиш имкониятига эга бўлишади. Бу эса ўз навбатида, соғлом турмуш тарзининг жамиятда оммалашувига хизмат қилади.

Тақдирлаш маросими доирасида иштирокчилар ва меҳмонлар учун туман Маданият бўлими томонидан тайёрланган концерт дастури намойиш этилди. Бўлим хонандалари томонидан ижро этилган куй-қўшиқлар тадбирга байрамона руҳ бағишлади. Концертда туманимизнинг машҳур эстрада хонандалари, истеъдодли ижодкорлар чиқиш қилиб, томошабинларга кўтаринки кайфият улашди.

Давлат хавфсизлик хизмати раиси кубоги спорт мусобақалари баркамол авлодни шакллантириш, уларни жисмоний ва маънавий жиҳатдан комил инсонлар қилиб вояга етказиш йўлида муҳим воситалардан бири бўлиб хизмат қилмоқда. Бу каби ташаббуслар келажакда юртимиз довруғини дунёга ёядиган, ватанпарвар ёшлар етишиб чиқишига замин яратади.

Чарос Арслонова, туман ҳокимлигининг Ахборот хизмати раҳбари.