“Саломатлик учун 5000 қадам” акцияси ва югуриш марафони бўлиб ўтди

Соғлом турмуш тарзини кенг тарғиб этиш, аҳоли ўртасида жисмоний фаолликни ошириш ҳамда оммавий спортни ривожлантириш борасида сўнгги йилларда мамлакатимизда кенг қамровли ислоҳотлар амалга оширилмоқда. Хусусан, Ўзбекистон Республикаси Президентининг 2021 йил 5 ноябрдаги “Юриш, югуриш, минифутбол, бадминтон, стритбол ва воркаут спорт турларини ривожлантириш чора-тадбирлари тўғрисида”ги Қарори ижросини таъминлаш мақсадида юртимиз бўйлаб турли спорт тадбирлари ташкил этилмоқда.

Бу каби ташаббуслар аҳолининг барча қатламларини қамраб олган ҳолда жисмоний фаолликни рағбатлантириш, соғлом ҳаёт тарзини кенг жорий этишга хизмат қилмоқда. Мазкур қарор ижроси доирасида республикамизнинг барча ҳудудларида оммавий спорт тадбирлари мунтазам равишда ўтказиб келинмоқда.

Жумладан, 7 май куни Амударё туманида Хотира ва қадрлаш куни муносабати билан аҳоли саломатлигини мустаҳкамлашга қаратилган “Саломатлик учун 5000 қадам” акцияси ва югуриш марафони бўлиб ўтди. “Саломатлик учун 5000 қадам” акцияси туманнинг Дўстлик маҳалласида жойлашган Болалар ва ўсмирлар спорт мактабининг марказий ўйингоҳида ўтказилди. Унда нуронийлар, жамоатчилик вакиллари, турли соҳаларда фаолият юритаётган ходимлар, ёшлар ҳамда спортчилар фаол иштирок этдилар.

Шу куни эрталабки бадантарбия машғулотлари ҳам ташкил этилди. Ушбу тадбирлар орқали жисмоний фаолликни ошириш, аҳолини ҳар кунлик фаол ҳаёт тарзига чорлаш, соғлом турмуш тарзини ҳаёт мезони сифатида жорий этиш мақсад қилинган.

Шунингдек, Хотира ва қадрлаш куни муносабати билан “Ватан равнақи, тинчлиги ва ҳимояси йўлидаги қаҳрамонлик унутилмайди” шиори остида 3 км масофага югуриш марафони ҳам ташкил этилди. Ватан ҳимояси йўлида жон фидо қилган мард ўғлонлар хотирасига бағишланган ушбу тадбир спорт орқали юртга муҳаббат ва қадриятларини улуғлаш билан бирга, аҳоли ўртасида соғлом рақобат ва ҳамжиҳатлик руҳини кучайтиришга хизмат қилди.

Марафоннинг старт нуқтаси Дўстлик маҳалласи ва Ўрта қалъа овулини боғловчи чорраҳада белгиланган бўлиб, финиш чизиғи туман ҳокимлиги биноси олдида жойлаштирилди. Мусобақа юқори ташкилотчилик даражасида ўтказилди. Унда 210 нафар иштирокчи, жумладан 70 нафар аёл-қиз спортчилар қатнашди. Мусобақа давомида иштирокчилар ўртасида соғлом рақобат муҳити яратилди.

Эркаклар ўртасида бўлиб ўтган марафон мусобақалари якунига кўра, Холимбег овулидан келган Алибек Ўразметов 1-ўринни эгаллаб, ўз маҳалласининг ишончини оқлади. 2-ўринни Алибекнинг ҳамқишлоғи, холимбеглик Жавоҳир Тоҳирбоев эгаллаган бўлса, Тўлқин овулидан Ренат Ғаипов 3-ўрин соҳиби бўлди.

Аёллар ўртасидаги беллашувлар ҳам жонли руҳда, ўзаро ҳурмат ва рақобат муҳитида кечди. Унда Манғит шаҳрининг Ойбек маҳалласидан Динора Озодова барча рақибларини ортда қолдириб, фахрли биринчиликни қўлга киритди. 2-ўрин Холимбег овули вакили Динора Матякубовага насиб этди, 3-поғонани эса Куюк кўпир овулидан Гулбону Ўринбоева эгаллади.

Тадбир якунида барча ғолиблар ва фаол иштирокчилар туман ҳокимлиги ва мутасадди ташкилотлар томонидан эсдалик совғалари ҳамда дипломлар билан тақдирланди.

Мазкур тадбирлар аҳоли, айниқса ёшлар ўртасида соғлом турмуш тарзи, спорт ва жисмоний фаолликнинг ҳаётий аҳамиятини тарғиб этишда муҳим аҳамият касб этмоқда. Бундай лойиҳалар орқали спорт маданиятини шакллантириш, миллий ва жаҳон миқёсида рақобатбардош спортчиларни тайёрлаш учун мустаҳкам замин яратилади.

Югуриш фақат масофани босиб ўтиш эмас, балки ирода, барқарорлик, бирдамлик ва соғлом ҳаёт сари ташланган қатъий қадамдир. Шу боис, бундай оммавий тадбирларнинг келгусида ҳам давом эттирилиши — соғлом жамият барпо этиш йўлидаги муҳим қадамдир.

Шоҳзод Қурбонбоев.