Сайёр суд мажлисида савдо ва хизмат кўрсатиш қоидаларини бузган шахсларга нисбатан маъмурий жазолар қўлланилди

25 апрель куни жиноят ишлари бўйича Амударё тумани суди томонидан туман Солиқ инспекцияси биносининг мажлислар залида очиқ ва сайёр суд мажлиси ўтказилди.

Жиноят ишлари бўйича Амударё тумани судининг тергов судьяси Донахон Юсупова ҳамда судья ёрдамчиси Элёр Жуманиёзов иштирокида ўтказилган мазкур сайёр ва очиқ суд мажлисида туман Солиқ инспекцияси томонидан тақдим этилган жами 15 та маъмурий ҳуқуқбузарликка оид иш кўриб чиқилди.

Жумладан, Ўзбекистон Республикаси Маъмурий жавобгарлик тўғрисидаги Кодексининг 164-моддаси 1-қисмида назарда тутилган савдо ёки хизмат кўрсатиш қоидаларини бузиш ҳолатлари бўйича 12 нафар шахсга нисбатан иш материаллари кўриб чиқилди. Ушбу шахслардан 11 нафари томонидан йўл қўйилган бузилишлар ҳуқуқбузарлик аниқланган пайтдан бошлаб ўттиз кунлик муддат ичида ихтиёрий равишда бартараф этилгани ва етказилган моддий зарарнинг ўрни қоплангани инобатга олиниб, уларга нисбатан иш юритиш тугатилди. Қолган бир нафар шахсга эса маъмурий жарима жазоси тайинланди.

Шунингдек, Ўзбекистон Республикаси Маъмурий жавобгарлик тўғрисидаги Кодексининг 176-моддаси 1-қисмида назарда тутилган ҳуқуқбузарликни содир қилган, яъни тадбиркорлик фаолиятини давлат рўйхатидан ўтмасдан амалга оширган 2 нафар шахсга нисбатан иш материаллари ҳам кўриб чиқилди. Суд томонидан уларга нисбатан маъмурий жарима жазоси тайинланди ҳамда иш юзасидан олинган ашёвий далиллар давлат фойдасига мусодара қилиниши тўғрисида қарор қабул қилинди.

Бундан ташқари, Ўзбекистон Республикаси Маъмурий жавобгарлик тўғрисидаги Кодексининг 175-моддаси 1-қисмида назарда тутилган солиқ солиш объектларининг ҳисобини ва ҳисоботини юритишнинг белгиланган тартибини, шунингдек, тўлов интизомини бузиш ҳолатлари бўйича ҳам иш материаллари кўриб чиқилди. Мазкур ишлар юзасидан ҳуқуқбузар деб топилган шахсларга нисбатан қонун доирасида белгиланган жазолар тайинланди ва қонуний, адолатли қарорлар қабул қилинди.

Суд мажлиси давомида иштирокчиларга маъмурий ҳуқуқбузарликларнинг олдини олиш, қонунларга риоя этиш ва солиқ интизомини мустаҳкамлаш бўйича зарур тушунтиришлар берилди. Шу билан бирга, судья Донахон Юсупова томонидан ҳуқуқбузарликларнинг давлат ва жамият учун салбий оқибатлари — иқтисодий барқарорликка путур етказиши, давлат бюджети тушумларининг камайиши, умумий ҳуқуқий муҳитнинг заифлашувига олиб келиши ҳақида ҳам фикр-мулоҳазалар билдирилди.

Очиқ ва сайёр суд мажлисида кўрилган ишлар юзасидан қонун ва адолат принципларига асосланган ҳолда қарорлар қабул қилинди. Бундай тадбирлар келгусида ҳуқуқбузарликларнинг олдини олиш, аҳоли ўртасида ҳуқуқий онг ва ҳуқуқий маданиятни оширишга хизмат қилади.

Донахон Юсупова, жиноят ишлари бўйича Амударё туман судининг теров судьяси.