Қорақалпоғистон Республикаси Конституцияси қабул қилинган сана муносиб нишонланди

1993 йил 9 апрель санаси Қорақалпоғистон Республикаси тарихига муҳим сиёсий ва ижтимоий воқеа сифатида муҳрланган. Айнан шу куни Қорақалпоғистон Республикаси Олий Кенгашининг сессиясида Республиканинг асосий қонуни – Конституция қабул қилинган эди. Бу ҳужжат халқнинг суверенитетини, ҳуқуқий асосларини, инсон ҳуқуқ ва эркинликларини кафолатлайдиган мустаҳкам пойдевордир.

Бу йил Қорақалпоғистон Республикаси Конституцияси қабул қилинганига 32 йил тўлди. Бу муҳим сана ҳар йили республика миқёсида кенг нишонланиб, турли тадбирлар, давра суҳбатлари, ҳуқуқий-маърифий учрашувлар орқали ёшларга Конституциянинг моҳияти ва аҳамияти тушунтирилади.

Амударё тумани Маданият бўлимида сана муносабати билан байрам дастури ташкил қилинди. Унда туман ҳокими Собир Хўжаметов, ҳуқуқни муҳофаза қилувчи органлар раҳбарлари, ҳоким ўринбосарлари, корхона-ташкилотлар, таълим муассасалари масъуллари ҳамда аҳоли вакиллари иштирок этди.

Тадбир аввалида Ўзбекистон ва Қорақалпоғистон Республикалари давлат мадҳиялари янгради.

Байрам тадбирини туман ҳокими Собир Хўжаметов табрик сўзи билан очиб берди. У ўз сўзида Конституция давлатнинг асосий қонуни эканлигини таъкидлаб, унинг мамлакат сиёсий ҳаётида аҳамияти хусусида тўхталди ҳамда бутун халқимизни байрам билан табриклади. Шундан сўнг байрам тадбири туман Маданият бўлими хонандалари, умидли ижодкорларнинг бетакрор чиқишлар билан давом этди. Туманимизнинг истеъдодли хонандалари Ватан, тинчлик, дўстликни мадҳ этувчи дилтортар куй-қўшиқлар ижро қилиб, йиғилганларга юқори байрамона кайфият улашдилар.

Тадбирда сўзга чиққанлар таъкидлаганларидек, Конституция – халқ иродасининг тимсоли бўлиб, Қорақалпоғистон Республикаси Конституциясининг қабул қилиниши ҳуқуқий демократик жамият сари дадил қадам ташлаганидан далолат беради. Ушбу ҳужжат Қорақалпоғистоннинг сиёсий-ҳуқуқий мақомини, давлат бошқарувининг асосларини, фуқароларнинг ҳуқуқ ва эркинликларини белгилайди.

Дарҳақиқат, Конституция – ҳар бир давлат мустақиллигини, ҳуқуқий тизимини белгилаб берувчи энг олий ҳужжатдир. Қорақалпоғистон Республикаси Конституцияси ҳам ушбу мезонларга асосланиб ишлаб чиқилган бўлиб, у Ўзбекистон Республикаси Конституциясига уйғун ҳолда, шу билан бирга Қорақалпоғистон халқининг тарихий, маданий ва ижтимоий хусусиятларини ҳисобга олган ҳолда яратилган. Конституцияда фуқароларнинг ҳуқуқ ва эркинликлари, давлат тузилмаси, ҳокимият органлари ваколатлари ҳамда уларнинг ўзаро муносабатлари аниқ белгилаб берилган.

Хулоса қилиб айтганда, 1993 йил 9 апрель санаси бу нафақат ҳуқуқий ҳужжатнинг қабул қилинган куни, балки Қорақалпоғистон халқи учун ғурур ва ифтихор манбаи сифатида асосий байрам саналаридан бири ҳисобланади. Бу кун ҳар йили ўтмишга ҳурмат, келажакка ишонч билан қараш, миллий бирлик ва тараққиёт йўлида яна бир эсда қоларли сана сифатида нишонланади.

Чарос Арслонова, туман ҳокимлигининг Ахборот хизмати раҳбари.