Энергия ресурсларидан оқилона фойдаланиш – қонунийлик ва барқарорлик кафолати

Энергия ресурсларидан самарали фойдаланиш мамлакат иқтисодий барқарорлиги ва аҳоли турмуш даражасини оширишда муҳим аҳамият касб этади. Электр энергияси ва табиий газнинг ноқонуний истеъмоли нафақат миллий ресурсларни талон-торож қилишга, балки бутун тизимнинг издан чиқишига ҳам сабаб бўлади. Шу боис, прокуратура органлари томонидан мазкур соҳада назорат кучайтирилиб, энергия ресурсларини тежамкорлик билан тақсимлаш ва улардан қонуний фойдаланишни таъминлаш мақсадида изчил ишлар олиб борилмоқда.

28 март куни Амударё тумани прокуратураси томонидан электр энергияси ва табиий газ истеъмоли бўйича назорат тадбирлари ташкил этилди.

Текширувлар давомида аниқланган қонунбузарлик ҳолатларини бартараф этиш юзасидан масъул ташкилотларга топшириқлар берилди. Жумладан, “Ҳудудий электр тармоқлари” акциядорлик жамиятига қарашли Амударё туман электр таъминоти корхонаси ва “Ҳудудгаз Қорақалпоғистон” акциядорлик жамиятига қарашли “Амударё тумангаз” газ таъминоти бўлими фаолияти ўрганилди. Электр ва газ таъминоти объектларининг ҳолати таҳлил қилиниб, мавжуд техник ва ташкилий муаммоларни ҳал қилиш чоралари кўрилди.

Шунингдек, диспетчерлик хизматлари, истеъмолчилар мурожаатларини қабул қилиш марказлари ва газ таъминоти инфратузилмаси текширувдан ўтказилди. Текширувлар давомида газ баллонларини тўлдириш ва тарқатиш шохобчаларидаги камчиликлар, табиий газ сақлаш захира омборларининг ҳолати ҳам таҳлил қилинди. Барча аниқланган камчиликлар бўйича зудлик билан чоралар кўрилди ва қонунийликни таъминлашга қаратилган ишларнинг самарадорлиги оширилди.

Шу куни туман Прокуратураси ташаббуси билан энергия таъминотини яхшилашга қаратилган аниқ чоралар ҳам амалга оширилди. Жумладан, Чордара маҳалласи ҳудудида жойлашган Қиличбой кўчасидаги эски ёғоч электр устунлари янги мустаҳкам устунларга алмаштирилди. Бу ҳудуд аҳолисининг электр таъминотидаги узилишларни бартараф этишга ва энергия таъминотининг барқарорлигини таъминлашга хизмат қилади.

Бундан ташқари, Арна бўйи маҳалла фуқаролар йиғини ҳудудида табиий газ истеъмолида икки босқичли тизимга ўтиш ишлари амалга оширилди. Бу тизим газ тақсимотини хавфсиз ва самарали йўлга қўйиш имконини бериб, ноқонуний уланишларнинг олдини олишга ҳам хизмат қилади.

Энергия ресурсларидан қонуний ва тежамкорлик билан фойдаланиш ҳар бир фуқаро ва тадбиркорнинг нафақат ҳуқуқий, балки ижтимоий масъулияти ҳамдир. Давлат идоралари ва ҳуқуқ-тартибот органлари томонидан олиб борилаётган чора-тадбирлар нафақат иқтисодий барқарорликни таъминлаш, балки ноқонуний фойдаланиш ҳолатларига қарши самарали курашишда ҳам муҳим аҳамият касб этади.

Электр энергияси ва табиий газ таъминоти бўйича мавжуд муаммоларни аниқлаш ва уларни ҳал этиш орқали аҳоли ҳаёти енгиллашади, ресурслардан оқилона фойдаланиш таъминланади. Бу эса ўз навбатида, мамлакатнинг энергетик хавфсизлигини мустаҳкамлаш ва барқарор ривожланишини таъминлашга хизмат қилади.

Ш. Жолдасов, Амударё туман прокурорининг катта ёрдамчиси.