Жиноятчилик ва ҳуқуқбузарликларнинг олдини олиш борасида маҳаллаларда амалга оширилаётган ишлар ўрганилди

Сўнгги йилларда мамлакатимизда тинчлик ва осойишталикни таъминлашнинг мутлақо янги механизмларини жорий этиш, ҳуқуқбузарликни содир этишга сабаб бўлаётган ижтимоий-маиший муаммоларни ижтимоий профилактика чоралари тизими орқали ҳал этиш ҳамда аҳолида шахсий хавфсизлик ҳиссини шакллантириш борасида самарали чора-тадбирлар амалга оширилди.

Шу билан бирга маҳаллаларда хавфсиз муҳитни яратишнинг ташкилий-профилактик асосларини замон талабларига мослаштириш, содир этиладиган қонунбузилишларнинг асл омилларини ўз вақтида аниқлаш ва комплекс чора-тадбирлар билан манзилли бартараф этиш орқали жиноятчиликнинг барвақт олдини олиш тизимининг самарадорлигини янада ошириш долзарб вазифа сифатида намоён бўлмоқда.

Ушбу вазифаларни самарали амалга ошириш ҳамда давлат органлари ва ташкилотларининг республика маҳаллаларида ҳуқуқбузарликлар профилактикаси соҳасидаги фаолиятини 2025 йилда сифат жиҳатдан янги босқичга олиб чиқиш мақсадида 2025 йилнинг 3 январь санасида Ўзбекистон Республикаси Президентининг “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги 1-сонли қарори имзоланди.

Мазкур қарорнинг Амударё туманидаги ижроси билан танишиш мақсадида республика масъулларидан иборат ишчи гуруҳ туманимизда бўлди.

Ишчи гуруҳ вакиллари туманда ўтган давр мобайнида жиноятчилик ва ҳуқуқбузарликлар сонининг ошиши бўйича “қизил ҳудуд”га киритилган маҳаллалардаги вазият билан танишди. Хусусан, Бештом, Гулзор, Босув, Дўстлик, А.Навоий номли маҳаллаларда “еттилик” масъуллари билан суҳбатлар олиб борилди, бу борада амалга оширилган ишлар ҳолати ўрганилди ҳамда мавжуд камчиликларни бартараф қилиш бўйича тегишли тавсия ва кўрсатмалар берилди.

Ўрганишлар мобайнида аҳоли хонадонларида, айниқса, кўп қаватли уйларда хавфсизлик чоралари кўрилганлиги, яъни кузатув камераларининг ўрнатилганлиги кўздан кечирилди.

Шунингдек, туман Ички ишлар бўлими ходимларига давлатимиз раҳбарининг 1-сонли қарори билан белгилаб берилган жиноятчилик ва ҳуқуқбузарликларнинг олдини олишдаги устувор вазифалар хусусида тушунтириш-тарғибот ишлари олиб борилди.

Таъкидлаш жоизки, мазкур ҳужжат билан 2024 йилда жиноят содир этилган ҳар бир маҳаллада криминоген вазиятни барқарорлаштириш ҳамда жиноятларни барвақт профилактика қилишнинг маҳаллалар кесимида чораклик манзилли чора-тадбирларини белгилаган ҳолда маҳалла – туман – вилоят даражасида унинг ижроси учун бевосита масъул раҳбарларни бириктириш ва аниқ соҳавий жавобгарликни юклаш, криминоген вазият оғир маҳаллаларда илмий-амалий ёндашувлар асосида жойларга чиққан ҳолда мақсадли ўрганишларни ўтказиш орқали ҳуқуқбузарликларга сабаб бўлаётган асл омилларни аниқлаш ва барҳам бериш бўйича ташкилий-ҳуқуқий чораларни кўриш каби устувор вазифалар белгилаб берилган.

Ишчи гуруҳ вакиллари томонидан олиб борилган тарғибот ишлари мобайнида маҳаллаларда ёшлар, аёллар ва ишсизлар томонидан, шунингдек, оила-турмуш муносабатлари доирасида содир этиладиган жиноятларнинг олдини олишда “Маҳалла еттилиги” ҳар бир вакилининг аниқ масъулиятини белгилаш, ушбу тоифадаги ҳуқуқбузарликлар профилактикасига алоҳида ёндашиш зарурлиги, аҳолининг ҳуқуқий онги, ижтимоий фаоллиги ва фуқаролик масъулиятини ошириш, жиноят содир этилишига сабаб бўлиши мумкин бўлган ижтимоий муаммоларни ҳал этишга жамоатчилик вакиллари, нуронийлар ва маҳалла фаолларини кенг жалб этиб бориш лозимлиги тушунтирилди.

Қолаверса, маҳаллалар жамоат жойлари ва яшаш хонадонларида хавфсиз муҳит яратиш, фуқаролар ҳаёти, соғлиғи ва мол-мулкига ҳар қандай тажовузларнинг олдини олиш мақсадида ҳуқуқбузарликлар профилактикасига замонавий рақамли технологиялар ва техник воситаларни кенг жорий этиш зарурлиги таъкидланди.

Ишчи гуруҳ аъзолари туман ҳокимлигида жиноятчилик ва ҳуқуқбузарликларнинг олдини олиш борасидаги ишларни мувофиқлаштирувчи махсус штаб фаолияти билан танишди. Жараён мобайнида профилактика доирасида амалга оширилаётган ишлар таҳлил қилинди ҳамда аниқланган камчиликларнинг бартараф қилиш бўйича тегишли кўрсатмалар берилди.

Чарос Арслонова, туман ҳокимлигининг Ахборот хизмати раҳбари.