ТУМАННИНГ ҚАТОР ҲУДУДЛАРИГА ИЧИМЛИК СУВИ ҚУВУРЛАРИ ТОРТИЛМОҚДА. СУВ ҚАЧОН КЕЛАДИ?
Сув – тирикликнинг асоси, у бор жойда ҳаёт қайнайди ва ривожланади. Бугунги экологик ҳолат ва дунёнинг айрим бурчакларида кузатилаётган тоза ичимлик суви танқислиги муаммоси бизни шукур қилишга ҳамда оби-ҳаётни тежаб ишлатишга чорламоқда. Чиндан-да, ҳар неъматнинг сўрови бор. Сув ҳам Яратганнинг бир неъмати, уни исроф қилиш катта гуноҳ бўлса, аксинча, тоза ичимлик суви етиб бормаган манзилларга сув етказиш, саратонда сувсираган бир жонзотга сув бериш савоб амаллардан биридир.
Бугунги кунда юртимизда сув таъминотини яхшилаш, аҳолини тоза ичимлик суви билан марказлашган ҳолда таъминлаш масалаларига алоҳида эътибор қаратилмоқда. Натижада юртимизнинг олис ҳудудларида ҳам сув таъминоти муаммолари ижобий ечим топмоқда. Олдингидай етти маҳалла наридан пақирда сув ташиш ҳолатлари аста-секин эртакка айланиб бормоқда.
Хабарингиз бор, Қорақалпоғистон Республикасининг Амударё, Беруний, Қораўзак, Қўнғирот, Нукус ва Мўйноқ туманларидаги аҳоли ва хўжалик юритувчи субъектларнинг сифатли ичимлик суви таъминотини янада яхшилаш мақсадида Ўзбекистон Республикаси ва Осиё тараққиёт банки ўртасида 2018 йил 28 декабрда “Ўзбекистоннинг ғарбий қисмида ичимлик суви таъминоти тизимларини ривожлантириш” лойиҳасини амалга ошириш учун қиймати 145 млн АҚШ доллари миқдорида қарз битими имзоланган эди. Ўзбекистон Республикаси Президентининг 2019 йил 9 апрелдаги Қарори асосида бу борадаги амалий ишлар бошлаб юборилди.
Лойиҳа доирасида Амударё туманида ҳам аҳолининг тоза ичимлик суви билан марказлашган ҳолда таъминланиш даражасини сезиларли даражада яхшилаш кўзда тутилган. Лойиҳани амалга ошириш учун Озарбайжоннинг “ArchiCO Engineering company” қурилиш корхонаси билан ҳамкорликда, қиймати 29 млн 30 минг АҚШ долларига тенг шартнома тузилди. Лойиҳага асосан туманимизнинг Навоий, Беруний ва Бобур номли, Бўстон, Чордара, Бой овул, Олмазор, Гулзор, Дўстлик, Арна бўйи, Жумур овул, Куюк кўпир, Тош ёп, Хизир эли, Қиличбой овул ва маҳаллаларида жами 300 км дан ортиқ узунликдаги ичимлик суви тармоқлари ҳамда 3 та ичимлик суви объекти қурилиши ва реконструкция қилиниши белгиланган.
Ҳозирги кунда пудратчи ташкилотнинг 12 та бригада таркибидаги 155 нафар ишчиси 30 та техника ёрдамида “РУ-1” насос станциясидан Қиличбой сув ростлаш узелига, шунингдек, туман марказига, Куюк кўпир овули ҳудудига ва Куюк кўпир овули ҳудудидан “Яримчи” насос станциясига полиэтилен қувурлар ётқизиб, қурилиш ва реконструкция ишларини амалга оширмоқда.
Айни кунларда туманимиздаги Хитой ва Куюк кўпир овуллари ҳудудида ҳамда Манғит шаҳрининг 1-қурилиш ҳудудида сув қувурларини тортиш жараёнлари узлуксиз давом эттирилиб, шу кунгача туман ҳудудида жами 180 минг 106 метр узунликда турли хил ўлчамдаги полиэтилен қувурлар ётқизилди.
Шу билан бирга, ишлар жадал суръатларда давом эттирилиб, “РУ-1” насос станциясида демонтаж ишлари олиб борилмоқда. Мазкур станциядаги 2 та 4 минг 300 метр куб сув сақловчи резервуарларни ташқи қоплама билан қоплаш ва бетонлаштириш ишларига ҳозирлик кўрилмоқда.
Қайд этиш керакки, ушбу лойиҳа амалга ошиши натижасида Амударё туманининг ичимлик суви билан таъминланганлик даражаси 48,5 фоиздан 80 фоизга етказилиши кўзда тутилган бўлиб, 2026 йил сентябргача юқорида тилга олинган ҳудудлар марказлашган сув таъминоти билан тўлиқ қамраб олинади.
Албатта, халқни рози қилиш йўлида амалга оширилаётган ислоҳотлар бугун фақатгина қоғозда эмас, амалда ҳам ўз ифодасини топмоқда. Биз эса, иссиқни иссиқ, совуқни совуқ демай, халқимизни оби-ҳаёт билан таъминлаш борасида фидойи меҳнат қилаётган соҳа ходимларининг хайрли ишларига унум ва барака тилаймиз.
Азиза МАДРАҲИМОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
