МТТДА СЕМИНАР-ТРЕНИНГ: “ИЛК ҚАДАМ” ДАВЛАТ ДАСТУРИ АСОСИДАГИ МАВЗУЛИ ТАДБИРЛАР ҚАНДАЙ АМАЛГА ОШИРИЛАДИ?

Амударё туманида 5та давлат-хусусий шерикчилик асосидаги ҳамда 101та оилавий нодавлат мактабгача таълим ташкилотлари мавжуд бўлиб, уларга 3704 нафар тарбияланувчилар қамраб олинган. Мазкур мактабгача таълим муассасаларида таълим-тарбия ишларини ташкиллаштиришда “Илк қадам” давлат ўқув дастурида белгиланган талаблар асосида ўсиб келаётган ёш авлодни жисмонан ва ақлан, интеллектуал-маънавий ривожлантиришга алоҳида эътибор қаратилади. Бунда МТТларда болаларнинг нутқий жиҳатдан нуқсонсиз ўсиб-улғайишлари, жисмонан соғлом, ақлан етуклигини таъминловчи турли дидактик ўйинлар, бола хотирасини мустаҳкамлашга хизмат қилувчи интерфаол машқлар ўтказиш, шунингдек, педагог-тарбиячиларнинг билим ва малакаларини доимий равишда ошириб боришлари учун зарур шароитлар яратиш муҳим аҳамиятга эга.

Бу борада Амударё туман Мактабгача ва мактаб таълими бўлимининг Мактабгача таълим ташкилотлари фаолиятини мувофиқлаштириш шуъбаси услубчилари ва мутахассислари томонидан амалга оширилаётган чора-тадбирлар, семинар-тренинглар ўзининг ижобий самарасини бермоқда.

Шу мақсадда 4 март санасида 5-сонли Мактабгача таълим ташкилотида ўтказилган семинар-тренинг ҳам МТТ педагог-тарбиячиларининг касбий маҳоратини ошириш, ўзаро тажриба алмашиш борасидаги фикрларга бой тарзда ўтди.

Семинар-тренингда Амударё туман Мактабгача ва мактаб таълими бўлимининг Мактабгача таълим ташкилотлари фаолиятини мувофиқлаштириш шуъбаси услубчиси Сауле Патуллаева, Давлат хусусий шерикчилик асосидаги таълим ташкилотлари фаолиятини мувофиқлаштириш бўйича бош мутахассиси Абдурашид Насириллаев ҳамда ҳудудлардаги нодавлат мактабгача таълим ташкилотлари раҳбарлари ва педагог-тарбиячилари иштирок этишди.

Семинар-тренингда “Илк қадам” давлат ўқув дастурида белгиланган вазифалар ва давлат талаблари ҳақида, ташкилотлардаги марказларнинг жойлашиши ҳамда таълим-тарбия жараёнида қўлланиладиган болаларни ривожлантириш хариталарининг юритилиши бўйича соҳа мутахассислари томонидан атрофлича тушунчалар берилиб, керакли маълумотлар тақдим этилди.

Шунингдек, Ўзбекистон Республикаси Мактабгача ва мактаб таълими вазирлигининг тегишли буйруғи ижросини таъминлаш мақсадида иш ҳужжатларининг юритилиши юзасидан ҳам амалий-кўргазмали машғулотлар олиб борилиб, тушунтириш-тарғибот ишлари ҳам ўтказилди.

Семинар давомида болаларни ривожлантиришга қаратилган 5та асосий йўналиш қамраб олиниб, тегишли ўқув дастури асосида режавий-жадвалда белгиланган мавзуга мос интерфаол машқларни бажариш, дидактик материалларни қўллаш технологиялари, мавзуга мос ўйинларни ўтказиш услублари, болалар учун шеър ва қўшиқларни танлаш маҳорати тўғрисида мутахассислар томонидан “ўрган-ўргат” тамойили асосида тажриба алмашув соатлари ташкил этилди.

Шундан сўнг мазкур таянч мактабгача таълим ташкилоти услубчиси, тренер-ментор Гулчеҳра Йўлдошева томонидан мактабгача таълим ташкилотларида амалга ошириладиган йиллик мавзули иш режаси асосидаги ой ва ҳафта мавзулари бўйича слайдлар ёрдамида амалий машғулот ташкил этилиб, унда март ойининг биринчи ҳафта мавзуси ­– “8 март – Халқаро хотин-қизлар куни” муносабати билан болажонлар иштирокида ташкиллаштириладиган тадбирнинг бола тарбиясидаги аҳамияти юзасидан слайд намойиш қилинди.

Бундан ташқари, мавзу билан таништиришда кузатиш, кўргазмали воситаларни қўллаш, оғзаки ва амалий услублардан ҳамда тарқатма манбаларидан фойдаланиш бўйича назарий билимлар ҳам тақдим этилди.

Семинар-тренингда иштирокчилар учун “Мавсумий ўзгаришлар” мавзусида 5 та ривожланиш йўналиши асосида бири-биридан қизиқарли инновацион машғулотлар ҳам ташкиллаштирилди. Унга кўра, 5 та ривожланиш йўналиши асосида мақсадларни тўғри белгилаш ва уларни амалга ошириш усуллари, технологиялари, ушбу мавзуларда таълимий фаолиятда фойдаланиладиган кўргазмали жиҳозлар ва тарқатма воситаларини тайёрлаш бўйича ўтказилган амалий ва назарий машғулотлар орқали иштирокчиларнинг ўз касбий маҳоратларини ошириш имконияти ҳам яратилди.

РОБИЯ ЙЎЛДОШЕВА.