“Agro-dizel” номли янги савдо шохобчаси ўз фаолиятини бошлади
Қишлоқ хўжалиги мамлакат иқтисодиётининг энг муҳим тармоқларидан бири ҳисобланади. Ерга уруғ қадаш, уни парвариш қилиш ва мўл ҳосил етиштиришда замонавий техникаларнинг ўрни беқиёс. Ҳар бир мавсумда деҳқон ва фермер хўжаликлари учун техника воситаларига бўлган эҳтиёж ортади. Айниқса, баҳорги экин мавсуми яқинлашар экан, қишлоқ хўжалиги техникаларини тайёр ҳолга келтириш муҳим вазифа ҳисобланади. Бундай шароитда соҳага ихтисослашган савдо шохобчалари деҳқон ва тадбиркорлар учун катта имконият яратади. Яқинда шундай қулайликлардан бири – Амударё туманининг Янгиобод маҳалласида “Agro-dizel” номли янги савдо шохобчаси фойдаланишга топширилди.
Тадбирда “Нуроний” жамғармасининг туман бўлими раиси Бекман Аллаберганов, маҳалла фаоллари, “Юсуф Эшон бобо” жоме масжиди имом-хатиби, тадбиркорлар ва кенг жамоатчилик вакиллари иштирок этишди. Сўзга чиққанлар бу каби лойиҳаларнинг аҳамиятини таъкидлаб, мамлакатимизда амалга оширилаётган ислоҳотлар халқ фаровонлигини оширишга хизмат қилиши эътироф этишди.
Тантанали очилиш маросимидан сўнг нуронийлар рамзий тасмани кесиб, савдо шохобчасидаги шароитлар билан танишдилар. Дўкон замонавий жиҳозланган бўлиб, мижозларга қулайлик яратиш учун барча шарт-шароитлар билан тахминланган. Маҳсулотларнинг кенг ассортименти, сифатли хизмат ва қулай жойлашув дўконни ҳудуд учун муҳим савдо нуқтасига айлантиради.
Мазкур лойиҳа тадбиркор Раҳматилло Ёқубовнинг ўз маблағлари ҳисобидан бунёд этилди. Дўкон 2 қаватдан иборат бўлиб, 1-қаватда савдо фаолияти олиб борилади, 2-қават эса офис сифатида хизмат қилади. Савдо шохобчаси фаолияти натижасида 6 нафар ёш иш билан таъминланди.
Бугунги кунда қишлоқ хўжалиги соҳасида техника ва эҳтиёт қисмларининг сифатли ҳамда кафолатли бўлиши деҳқон ва фермер хўжаликлари учун катта аҳамиятга эга. Хусусан, ишлаб чиқариш жараёнида техника узлуксиз ишлаши ҳосилдорлик ва меҳнат самарадорлигига бевосита таъсир кўрсатади. Шу боис замонавий талабларга жавоб берадиган, ишончли ва узоқ муддат фойдаланиш имкониятига эга эҳтиёт қисмларини таклиф қиладиган савдо шохобчаларининг кўпайиши соҳанинг янада ривожланишига хизмат қилади.
Янги “Agro-dizel” номли савдо шохобчасининг фаолияти нафақат тадбиркорлар ва фермерлар, балки бутун туманнинг иқтисодий ривожига ҳисса қўшади. Замонавий ва талабгир маҳсулотлар билан таъминлайдиган бундай масканлар деҳқонлар меҳнатини енгиллаштириб, техника ва қишлоқ хўжалигининг ривожига хизмат қилади. Энг асосийси, бу каби ташаббуслар аҳоли турмуш даражасини яхшилаб, янги иш ўринлари яратилишига ҳисса қўшади.
Қишлоқ хўжалиги – мамлакатимиз иқтисодиётининг таянчи. Ушбу соҳа ривожи йўлидаги бундай ташаббуслар фермер ва тадбиркорлар учун янги имкониятлар эшигини очиши шубҳасиз.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
