ДХХ Чегара қўшинларига қарашли ҳарбий қисмда “Очиқ эшиклар куни” ўтказилди
Жаҳонда юз бераётган мураккаб сиёсий жараёнлар, турли хил таҳдидлар ҳар бир мамлакатни Қуролли кучлар салоҳиятини оширишга, мудофаа ишларини ислоҳ қилишга ва энг аввало тинчлик неъматининг қадрига етишга ҳамда уни асраб-авайлашга даъват этади. Юртимизда ҳам бу борада олиб борилаётган ислоҳотлар кун келиб ўзининг ижобий самарасини бериши шубҳасиз.
2025 йилга мўлжалланган давлат дастури лойиҳасида умумтаълим ташкилотларида чақирувга қадар бошланғич тайёргарлик фанини ўқув-услубий ва дастурий жиҳатдан такомиллаштириб бориш, фан ўқитувчиларининг фаолиятини янада қўллаб-қувватлаш, шунингдек, белгиланган тартибда босқичма-босқич моддий-техник жиҳатдан таъминлаб бориш белгилаб қўйилган. Маълумки, мактабларда ўтилаётган чақирувга қадар бошланғич тайёргарлик фани ўқувчи ёшларда Армия ҳақидаги дастлабки, назарий тасаввурларни уйғотса, ДХХ чегара қўшинларига қарашли ҳарбий қисмларда ўтказилиб келинаётган “Очиқ эшиклар куни” тадбирлари ўқувчиларда бу бўйича амалий кўникмаларни шакллантиради. Яъни ўқувчилар ҳарбий қисмга ташриф баробарида аскарларимизнинг ҳарбий ҳаёти билан яқиндан танишадилар.
Яқинда Амударё тумани ДХХ Чегара қўшинларига қарашли ҳарбий қисмлардан бирида “Очиқ эшиклар куни” тадбири ўтказилди. Тадбирда масъул офицер Отабек Мадолимов, ДХХ чегара қўшинлари ҳарбий хизматчиси Миржаҳон Мажидов, туман Мудофаа ишлари бўлими бошлиғи, майор Шуҳрат Маматов, Нукус ҳарбий Прокуратурасининг прокурор ёрдамчиси Улуғбек Даубаев ҳамда туманимиздаги 4-, 22-, 36-сонли умумтаълим мактаблари ва ихтисослаштирилган мактаб ўқувчилари иштирок этдилар.
Тадбирнинг асосий мақсади ёшларни ватанпарварлик руҳида камол топтириш, уларда шу юрт тақдирига ва келажагига дахлдорлик туйғусини уйғотиш ҳамда чинакам ватан ҳимоячиларини кашф этишдан иборат бўлиб, ўқувчилар тадбир давомида муддатли ҳарбий хизматни ўтаётган аскарларимизнинг яшаш жойлари, уларга яратилган шароитлар билан яқиндан танишдилар. Шу билан бирга, улар ҳарбий техникалардан, қурол-аслаҳалардан, хизмат отлари ва хизмат итларидан фойдаланиш, улар билан қай тартибда ишлаш бўйича маълумотга эга бўлдилар.
Жорий йилда Ўзбекистон армияси дунёнинг энг кучли армиялари рейтингида 145 мамлакат ичида 58-ўринни эгаллади. Шунингдек, Ўзбекистон мазкур натижа билан ўтган йилги кўрсаткичидан 7 поғона юқорилаган. Албатта, бу юртимизда Қуролли кучларга қаратилаётган эътиборнинг ёрқин намунасидир.
Армия сафида йигитлик бурчини аъло даражада ўтаётган, ватанига сидқидилдан хизмат қилаётган ўғлонларимизни рағбатлантириб бориш, уларнинг сафини кенгайтириш ҳам муҳим ўрин тутади. Тадбир давомида Фарғона вилоятининг Сўх туманида ҳарбий хизматни ўтаётган, хизмат давомида сафдошларига намуна бўлаётган амударёлик йигитлар – оддий аскарлар Шоҳрух Ахматов ҳамда Аброр Мадатовларнинг ота-оналарига Чегара Қўшинлари Қўмондони томонидан миннатдорчилик хатлари топширилди.
“Очиқ эшиклар куни”да мактаб ўқувчиларига она юрт сарҳадларида собит қадам бўлиб, ўзи туғилиб ўсган диёрнинг тинчлиги ва осойишталигини сақлаш ҳар бир фарзанднинг муқаддас бурчи эканини алоҳида таъкидланди. Шунингдек, ватан тинчлиги йўлида фидокорона хизмат қилиб, мардларча ҳалок бўлган бир қатор ҳарбийларимизнинг шарафли умр йўлини ўқувчиларга ибрат сифатида келтириб ўтилди. Жараён давомида тадбир иштирокчилари ҳарбийлардан ўзларини қизиқтирган саволларга тегишлича жавоблар олдилар.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
