Алишер Навоий таваллуди муносабати билан 62-сонли мактабда тадбир ўтказилди
Ҳар йили ўзбек адабиёти ва маданиятининг буюк намояндаси, улуғ шоир ва мутафаккир Алишер Навоий таваллуди юртимиз бўйлаб кенг нишонланади. Маълумки, Навоийнинг илмга бўлган иштиёқи эрта уйғонади, у 4 ёшида мактабда таълим ола бошлаган. 7 ёшида Фаридиддин Атторнинг "Мантиқ ут-тайр" асарини ёддан билган. Шу билан бирга, 7-8 ёшларидан бошлаб ғазаллар ёза бошлаган. Бу йил буюк мутафаккир бобомизнинг таваллудига 584 йил тўлди.
Шу муносабат билан туманимиздаги 62-сонли мактабда “Буюк зотга таъзим” деб номланган бадиий кеча ўтказилди. Мактабнинг бошланғич синф ўқитувчиси Б.Арикова томонидан ташкиллаштирилган тадбирни мактабнинг маънавий-маърифий ишлар бўйича директор ўринбосари З.Атаев очиб берди. У ўз сўзида Алишер Навоий ижодининг аҳамияти ва унинг бугунги ёш авлод тарбиясидаги ўрнига тўхталиб ўтди. Тадбир давомида мактабнинг бошланғич синф ўқувчилари фаол иштирок этишди. Айниқса, 4-синф ўқувчилари ўз чиқишлари билан барчага манзур бўлди. Ўқувчилар ўзлари ёд олган ўзбек адабиётининг бебаҳо дурдоналари бўлмиш Навоий ғазаллари, ҳикматли сўзлари ва рубоийларини айтиб беришди.
Дарҳақиқат, ўқитувчиларнинг ва ўқувчиларнинг бу каби тадбирларни ўтказишдаги ташаббускорлиги ва фаоллиги Навоий даҳосига эҳтиром тимсоли ҳамда шоирнинг адабий меросининг бардавомлигини таъминлайди. Шу жиҳатдан, “Буюк зотга таъзим” номли ушбу тадбир ёшлар қалбида Навоийга бўлган ҳурмат ва муҳаббатни янада мустаҳкамлагани билан аҳамиятли бўлди.
Алишер Навоий нафақат ўзбек адабиётининг, балки бутун Шарқ цивилизациясининг улуғ сиймоларидан бири саналади. Унинг асарлари фақат бир давр ёки халққа эмас, балки бутун инсониятга дахлдор эканлиги бугунги кунда ҳам ўз исботини топмоқда. Айниқса, бобокалонимизнинг турли халқлар ўртасида тинчлик ва дўстликни мустаҳкамлаш, башариятнинг ёруғ келажагини биргаликда қуришга чорлайдиган ғоя ва қарашларининг аҳамияти ҳозирги таҳликали даврда тобора ортиб бормоқда. Шунингдек, унинг бебаҳо ижодий мероси ҳақли равишда жаҳон адабиёти даҳоларининг буюк асарлари билан бир қаторда туриши бизга чексиз ғурур ва ифтихор бағишлайди. Шу боис, бундай тадбирларнинг ташкил этилиши нафақат адабий меросимизни тарғиб қилиш, балки ёш авлодни эзгуликка, тафаккурга, ватанпарварликка чорлаш йўлида муҳим аҳамият касб этади.
Мадина Жабборова, ҚДУ 3-босқич талабаси, таҳририят амалиётчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
