Футбол бўйича қизлар ўртасида мусобақа ташкил этилди
Спорт инсон саломатлиги ва жамият тараққиётининг муҳим омили ҳисобланади. Хусусан, аёл-қизларнинг спорт билан шуғулланиши жамиятда соғлом турмуш тарзини шакллантиришга, ёшларнинг жисмоний ҳамда маънавий камолотига хизмат қилади.
Яқинда Амударё тумани спорт мактаби ташаббуси билан Холимбег овули ҳудудидаги сунъий қопламали мини-футбол майдончасида футбол бўйича аёл-қизлар ўртасида мусобақа ташкил этилди. Муросасиз кечган баҳслар спортчилар учун катта тажриба мактаби бўлиб, қизлар футболи ривожи йўлида муҳим аҳамият касб этди.
Турнирда Хоразм вилояти ҳамда Қўнғирот ва Хўжайли туманларидан келган тажрибали спортчилардан иборат жамоалар иштирок этишди. Мусобақада 8та жамоа ғалаба учун ўзаро куч синашди. Ҳар бир ўйин мухлислар учун жозибадор ва муросасиз беллашувларга бой бўлди.
Футбол анъанавий равишда кўпроқ эркаклар ўйини сифатида қаралса-да, бугунги кунда аёл-қизлар ҳам ушбу спорт турига катта қизиқиш билдирмоқда. Ўзбекистонда аёл-қизлар футболига бўлган эътибор тобора ортиб, турли мусобақалар ташкил этилмоқда. Туманимизда ўтказилган мазкур мусобақа ҳам шу йўналишдаги муҳим тадбирлардан бири бўлди.
Ҳар бир жамоа майдонда ўзининг кучли томонларини намойиш этишга интилди. Мусобақа давомида тезкор ҳужумлар, чиройли паслар ва мустаҳкам ҳимоя кўзга ташланди. Айниқса, жамоалар тактик жиҳатдан мукаммал ўйин кўрсатишга ҳаракат қилишди.
Қизғин кечган баҳслар якунида Хўжайли тумани футболчи қизлари 1-ўринни қўлга киритди. Улар яхши ўйини, тўпни тўғри назорат қилиши ва кучли ҳимояси билан рақибларидан устун келди. Амударё жамоаси эса 2-ўринни эгаллади, туманимиз спортчилари меҳмон жамоаларга муносиб қаршилик кўрсатиб, ўз кучини намойиш этишди. Қўнғирот жамоаси эса мусобақа давомида яхши ҳаракат қилиб, кучли рақибларга жиддий қаршилик кўрсатган ҳолда 3-ўринни қўлга киритди.
Мусобақа якунида ғолиб жамоалар Амударё тумани спорт мактаби томонидан диплом ва эсдалик совғалари билан тақдирланди. Тадбир ташкилотчилари, жумладан, туман спорт мактаби раҳбарияти мусобақа иштирокчиларининг келгусида янада юқори марраларни забт этишларига тилакдош бўлдилар.
Мураббийлар эса ўйин давомида йўл қўйилган хатоларга эътибор қаратиб, жамоаларга бир қатор тавсиялар беришди. Жумладан, тўпни оширишда аниқликка эътибор қаратиш, ҳужумда янада самарали ҳаракат қилиш, ҳимояда эътиборлироқ бўлиш каби муҳим жиҳатлар алоҳида таъкидланди. Келгуси мусобақаларда иштирокчилар ўз хатолари устида ишлаб, янада кучлироқ жамоа сифатида майдонга чиқишларига шубҳа йўқ.
Бундай мусобақалар нафақат ёш спортчиларга тажриба орттириш имконини беради, балки аёл-қизлар футболига бўлган қизиқишни оширишга ҳам хизмат қилади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
