Канал ва ариқларни бетонлашга бағишланган семинар ўтказилди
Мамлакатимизда қишлоқ хўжалигини ривожлантиришда мавжуд сув захираларидан самарали фойдаланишга катта эътибор қаратилмоқда. Сувнинг ҳар қатрасини тежаб, ундан оқилона фойдаланишни бугун ҳаётнинг ўзи тақозо этмоқда. Қишлоқ хўжалиги экинларидан мўл ҳосил олишда, экин ерларининг мелиоратив ҳолатини яхшилашда, уларнинг унумдорлигини оширишда сувнинг аҳамияти катта, албатта.
Қишлоқ хўжалигининг бошқа соҳалари қатори сув тизими ходимлари учун ҳам йилнинг тўрт фасли бирдек иш мавсуми ҳисобланади. Айни кунда сув хўжалиги ишчи ва мутахассислари кузги-қишки тадбирлар доирасида ариқ ва каналларни тозалаш, уларни бетонлаштириш ишларига эътибор қаратиб, шўр ювиш ва келгуси йилги вегетация мавсуми олдидан экин майдонларини сув билан узлуксиз таъминлашга замин яратмоқдалар. Сабаби, далаларнинг сувга бўлган талаби кескин камайган бугунги давр сув хўжалиги ходимлари учун долзарб иш мавсуми саналади. Айнан шу даврда ариқ ва каналлар ҳамда бошқа сув иншоотлари тартибга келтирилади, уларда таъмирлаш ишлари амалга оширилади.
Амударё туманида ҳам сувни тежаш, канал ва ариқларда сув йўқотилишининг олдини олиш учун хавзаларини бетонлаш ишларига катта эътибор қаратилмоқда. Бу борадаги ишларни янада жонлантириш, сув исрофини камайтириш учун бетонлашнинг аҳамиятига урғу қаратиш мақсадида туманнинг Чойкўл овули ҳудудидаги “Хадайберган Жабборович” масъулияти чекланган жамиятига қарашли ҳудудда семинар ўтказилди.
Семинарда Қорақалпоғистон Республикаси Жўқорғи Кенгеси Раисининг сув хўжалиги масалалари бўйича маслаҳатчиси Муродбой Абдиров, Сув хўжалиги вазири Бахтиёр Жузбоев, туман ҳокими Собир Хўжаметов, секторлар раҳбарлари, ҳоким ўринбосарлари, қишлоқ ва сув хўжалиги соҳалари масъуллари ҳамда фермерлар иштирок этдилар.
Семинарда сўзга чиққанлар қишлоқ хўжалиги соҳаси ривожида сув муҳим аҳамиятга эга эканлигини, уни исроф қилмасдан, тежаб ишлатиш ҳамда мавжуд сув захираларидан самарали фойдаланиш бугунги куннинг энг устувор вазифаларидан эканлигини таъкидладилар. Қишлоқ хўжалигида сувдан самарали фойдаланишда ариқ ва каналларни бетонлаштириш жуда катта аҳамиятга эга эканлиги қайд этилди.
Айтиш жоизки, давлатимиз раҳбари жорий йилнинг 7 октябрь куни сув ва энергия ресурсларидан оқилона фойдаланиш, шунингдек, қишлоқ хўжалигида йўқотишларни камайтириш чора-тадбирларига бағишланган йиғилишда сув танқислиги муаммосининг ягона тўғри ечими сувни тежовчи технологияларни жорий этиш ва ариқларни бетонлаш эканлигини қайд этиб, бу борадаги ишларни янада жадаллаштириш лозимлигини таъкидлаган эди. Йиғилишда 2025 йилда бу мақсадга 800 млрд сўм йўналтирилиши, бетонланган каналларда сув оқимини тезлаштириш ҳисобига кичик ГEСлар қурилиши қайд қилинди. Президентимиз ўтган давр мобайнида мамлакатимизда 550 километр канал ва ариқлар бетонлангани эвазига 200 минг гектар майдонда сув таъминоти яхшиланганини, йилига 450 миллион куб метр сув тежалаётганини таъкидлаб, фермер ва кластерлар томонидан ҳам 13 минг км ички сув йўллари бетонланганини, бу ишлар келгусида ҳам давом эттирилишини қайд этдилар.
Маълумот ўрнида айтиш жоизки, Амударё туманида 296,6 км узунликдаги хўжаликлараро каналлар, 1 минг 342 км ички хўжалик каналлари мавжуд. Сув ресурсларидан оқилона фойдаланиш, каналларда сув йўқотишларни камайтириш мақсадида туманда 2024-2025 йиллар куз-қиш мавсумида 40 км узунликда хўжаликлараро каналларни, 300 км узунликда ички хўжалик каналларни бетонлаш режалаштирилган. Шу кунгача 0,25 км узунликда ички хўжалик каналлари бетонланган бўлиб, бу борадаги ишлар узлуксиз давом эттирилмоқда. Семинарда ушбу йўналишдаги ишларни янада жадаллаштириш юзасидан тегишли масъулларга зарур кўрсатма ҳамда тавсиялар берилди.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
