“ОЧИҚ ЭШИКЛАР КУНИ” ЎТКАЗИЛДИ
Ўсиб келаётган ёш авлодни она Ватанга садоқат, истиқлол ғояларига ҳурмат-эҳтиром, ватанпарварлик ва халқпарварлик руҳида тарбиялаш, айниқса, улар онгига кўп миллатли халқимизга хос бўлган миллий-маънавий қадриятларни сингдириш янгиланаётган Ўзбекистоннинг ёшларга оид энг устувор сиёсати ҳисобланади ва бу таълим-тарбия соҳасида фаолият олиб борувчи ҳар бир ходимнинг зиммасидаги масъулиятли бурчидир.
Аслини олганда, кўп миллатли Ўзбекистон халқини миллий-маънавий қадриятлар бирлаштириб туради ва бу бирдамлик муҳити халқимиз ҳаётига гўзаллик, зийнат бағишлайди. Шу боис, халқимиз бирдамлик, миллатлараро тотувлик, ўзаро меҳр- оқибат туйғуларига йўғрилган байрамона тадбирларни қувонч ва тантана билан нишонлаб, бу каби тадбирлардан олам-олам завқ олишади.
Жорий йилнинг 15 сентябрь санасида Амударё туман Мактабгача ва мактаб таълими бўлимига қарашли “Баркамол авлод” болалар мактабида бўлиб ўтган “Бир бўлсак – ягона халқмиз, бирлашсак – Ватанмиз!” шиори остида бўлиб ўтган “Очиқ эшиклар куни” байрам тадбири ҳам халқлар дўстлиги, миллатлараро тотувлик, ватанпарварлик туйғулари улуғлангани билан ҳар бир қалбга қувонч ва шодлик бағишлади.
Чунки мазкур илм даргоҳи тўгараклари машғулотларида шуғулланаётган иқтидорли болалар Амударё туманида истиқомат қилаётган 10 дан ортиқ миллат вакилларининг фарзандлари ва набиралари бўлиб, улар бир ота-онанинг фарзандлари каби аҳил ва иноқликда, ягона эзгу мақсад – Янги Ўзбекистонга муносиб фарзанд сифатида камол топиш орзуси билан устозларидан таълим-тарбия оладилар.
Тадбир доирасида мактабнинг турли тўгараклар машғулотларида шуғулланувчи ўқувчи-ёшлар томонидан қўл меҳнати кўргазмаси намойиш этилди. Кўргазмадан жой олган тикувчилик намуналари, ранг-баранг гуллар, турли моделлар, қўлда тўқилган болалар ва ўсмирлар учун мўлжалланган бежирим ва замонавий кийим-кечаклар, юмшоқ ва қаттиқ ўйинчоқлар, шунингдек, ёғоч ўймакорлиги буюмлари, кулолчилик маҳсулотлари тадбирда иштирок этаётган ота-оналарда ўз фарзандларидан фахрланиш туйғуларини уйғотди.
“Баркамол авлод” болалар мактабида фаолият олиб борувчи тўгараклар раҳбарлари тадбир иштирокчиларига 2024-2025 ўқув йилида ташкил этилаётган тўгараклар ҳақида кенг тушунчалар беришиб, бу тўгараклар фаолияти хусусида батафсил маълумотлар ва рангли буклетлар тақдим этдилар. Шунингдек, ота-оналар мактабнинг бадиий ҳаваскорлик тўгараги тўғрисида янада яқинроқ танишишлари учун мактабда ташкил этилган “Шўх болалар” бадиий жамоаси томонидан тайёрланган концерт дастури ҳам намойиш этилди.
Шуни алоҳида таъкидлаш жоизки, мазкур жамоа мактаб ўқувчилари ўртасида анъанавий тарзда ўтказилиб келинаётган турли кўрик-танловларнинг доимий иштирокчиси ва совриндори саналади. Ватанпарварлик, дўстлик ва миллатлараро тотувлик, бирдамлик туйғулари улуғланган, “Бир бўлсак – ягона халқмиз, бирлашсак – Ватанмиз!” шиори остида, 2024-2025 ўқув йили бошланиши муносабати билан ўтказилган “Очиқ эшиклар куни” тантанали байрам тадбирида “Шўх болалар” бадиий жамоаси томонидан ижро этилган ўзбек, қорақалпоқ, қозоқ ва бошқа қардош халқларнинг куй ва қўшиқлари, шўх-шодон рақслари барчага хуш кайфият бағишлади.
Шу куннинг ўзида кўп миллатли Аму элининг илмга чанқоқ фарзандларини бағрига олган билим маскани тўгаракларида илк машғулотлар бошланди.
Шунингдек, “Баркамол авлод” болалар мактаби масъуллари томонидан Амударё туманининг чекка ҳудудидаги 29- ва 45-сонли умумтаълим мактабларида ҳам “Очиқ эшиклар куни” тадбирлари ўтказилиб, бу тадбирларга мазкур таълим-тарбия муассасалари ҳудудидаги ўқувчиларнинг ота оналари ҳам қамраб олинди. Тадбирларда иштирок этган ота-оналар ўз фарзандларининг замон талаблари даражасида таълим-тарбия олишлари учун давлатимиз томонидан яратиб берилган кенг имконият ва шарт-шароитлардан мамнун эканликларини билдирдилар.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
