44-сонли давлат МТТда ўтган ўқув йили давомида амалга оширилган ишлар таҳлил қилинди
Янги ўқув йили бошланиши муносабати билан Амударё туманидаги 44-сонли давлат мактабгача таълим ташкилотида муассаса директори Айнур Раҳмонова раислигида педагогик кенгаш йиғилиши ўтказилди. Тадбирда ташкилот директори, Кузатув кенгаши раиси, ташкилотнинг жами 25 нафар педагог ва 20 нафар техник ходимлари иштирок этишди.
Педагогик кенгаш йиғилишини муассаса раҳбари Айнур Раҳмонова табрик сўзи билан очди ва йиғилганларни кун тартибидаги масалалар билан таништирди. Ташкилот директори ўз нутқида барчани истиқлолимизнинг 33 йиллиги ва янги ўқув йили билан қизғин муборакбод этиб, тарбиячи ва педагог ходимларга кейинги иш фаолиятида муваффақиятлар тилади.
Педагогик кенгаш йиғилиши кун тартибига кўра, дастлаб, ўтган 2023-2024 ўқув йилида ташкилотда олиб борилган таълим-тарбиявий, соғломлаштириш ишлари, ходимларнинг жамоат ишларидаги иштироки ҳақидаги ташкилот услубчиси ва ҳамширасининг йиллик ҳисоботи тингланди. Шундан кейин янги ўқув йилидаги асосий вазифалар, педагог-коучернинг иш режаси ва амалий фаолияти, иш ҳужжатлари ва кўргазмали-дидактик материаллардан фойдаланиш бўйича тавсиялар тақдимотига навбат берилди. Шунингдек, педагоглар орасидан ташкилот Кузатув кенгашига номзодлар сайлаш масаласи ҳам Кенгаш томонидан кўриб чиқилди.
44-сонли давлат мактабгача таълим ташкилоти услубчиси, педагог-коучер Севара Шомуродова ўз маърузасида ўтган ўқув йилида ташкилотда олиб борилган ўқув-тарбиявий ишлар, ташкил этилган очиқ дарслар ва намунавий машғулотлар, байрам тадбирлари ва бадиий кечалар, уларнинг самарали натижаси ҳамда кузатилган камчиликлар тўғрисида фикр-мулоҳазаларини билдириб ўтди.
Муассаса ҳамшираси Зубайда Мадиёрова эса мактабгача таълим ташкилотининг йил давомидаги санитария-гигиеник ҳолати, тарбияланувчиларни соғлом овқатлантириш бўйича қилинган ишлар, мавсумий таомнома, тарбияланувчилар ҳамда ходимларнинг ўз вақтида тиббий кўрикдан ўтказилганлиги тўғрисидаги ҳисоботни тақдим этди. Шунингдек, ёзги соғломлаштириш даври режа асосида ташкил этилганлиги ва самарали олиб борилганлиги ҳақида батафсил тўхталиб ўтилди.
Тадбир давомида муассасанинг педагог-коучинг фаолияти таҳлил қилиниб, янги ўқув йили учун педагог-коучерлар ва ҳамкорлар сайлаш учун номзодлар эълон қилинди. Кўрсатилган талабга кўра, 5 йилдан ортиқ педагогик стажга эга педагоглар – педагог-коучерлар ва бошқа педагоглар – педагогик-коучинг ҳамкорлари деб белгиланди. Педагогик-коучинг иш режасини ва очиқ машғулотлар жадвалини ишлаб чиқиш вазифаси услубчи, педагог-коучер Севара Шомуродова зиммасига юклатилди.
Шундан кейин педагог-коучер Соҳиба Гулмирзаева сўзга чиқиб, педагогларга ташкилотнинг намунали кун тартиби тўғрисида видео-ролик тақдим қилди. Педагогик-коучинг ҳамкори, тарбиячи Дилфуза Досекеева ўз тақдимотида таълим-тарбия жараёнида инновацион усуллардан фойдаланиш тўғрисида фикр-мулоҳазаларини билдириб, “Менинг танловим” таблоси билан таништирди.
Тақдимотлар давомида педагогик-коучинг ҳамкори, тарбиячи Шоира Мадиёрова сўзга чиқиб, таълим-тарбия жараёнида кўргазмали-дидактик материаллардан фойдаланишнинг аҳамияти, бу каби материалларнинг мазмуни, улардан фойдаланиш тартиби ҳақида маъруза қилди.
Педагогик кенгаш-тадбирининг кейинги қисмида педагогик жамоа ўртасида иш ҳужжатлари ва таълим-тарбия жараёни, марказлардаги фаолият юзасидан ўзаро фикрлар алмашилди. Ташкилотнинг ёрдамчи тарбиячилари Шарофат Сафарбоева, Раушан Халиллаева, Муҳаббат Қурбонбоевалар томонидан тадбир давомида қилинган тақдимотлар юзасидан фикр-мулоҳазалар билдирилди. Шунингдек, педагогик-коучинг ҳамкорлари, тарбиячилар Барно Авезбаева ва Ҳилола Дурдибоева тайёрланган тақдимотлар юзасидан ўз таклифларини беришди.
Шу ўринда айтиш жоизки, Педагогик кенгаш замонавий ахборот технологияларидан унумли фойдаланган ҳолда, юқори савияда ташкил этилди ва ўтган ўқув йили давомида илғор ва фаол бўлган бир қатор педагог ва техник ходимлар ташкилот раҳбарининг ташаккурномалари билан тақдирланди.
Педагогик кенгаш якунида муассасанинг янги ўқув йили учун ишлаб чиқилган йиллик иш режалари, педагогларнинг иш ҳужжатлари тасдиқланди.
Соҳиба Гулмирзаева, 44-сонли давлат мактабгача таълим ташкилоти тарбиячиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
