“Янги Ўзбекистон мактаб остонасидан бошланади” шиори остида учинчи “Устозлар миллий форуми” ўтказилди
Мамлакатимиз инновацион тараққиёт йўлида шиддат билан ривожланиб бораётган бир даврда келажагимиз давомчилари бўлган ёшларнинг ижодий ғоялари ва ижодкорлигини ҳар томонлама қўллаб-қувватлаш, уларнинг билим, кўникма ва малакаларини давлат таълим стандартлари асосида шакллантириш ҳамда илғор хорижий тажрибалар, халқаро мезон ва талаблар асосида баҳолаш тизимини такомиллаштириш муҳим аҳамиятга эга. Шу мақсадда юртимизда таълим сифатини ошириш ва тизимда инновацион ёндашувларни жорий қилиш бўйича қатор ишлар амалга ошириб келинмоқда.
Педагогларнинг касбий ривожланишлари учун етарли шарт-шароитларни яратиш, тизимда ишлаётган ўқитувчиларни мунтазам тарзда янгиликлардан хабардор қилиш, илғор методикалар билан таништириш ва тажриба алмашиш мақсадида ҳар йили август ойида ўтказиладиган “Устозлар миллий форуми” ҳам шундай тадбирлардан биридир.
Тадбирда туман Мактабгача ва мактаб таълими бўлими бошлиғи Ялғаш Шомуратов, Мактаблар фаолиятини мувофиқлаштириш шўъбаси раҳбари Ибрагим Раджапов, мазкур шўъба методистлари Ҳабибулла Давлетяров, Райхон Якубова, тренер ўқитувчилар ҳамда умумий ўрта таълим мактаблардан барча фанлардан бир нафардан фан ўқитувчилари иштирок этишди.
Мазкур форум тизимда олиб борилаётган ислоҳотлар, таълим мазмунини такомиллаштириш борасида амалга оширилаётган ишлар билан таништириш, ўқув режалар, ўқув дастурлар, дарсликлар, янги баҳолаш тизими, шунингдек, ўқув жараёнига татбиқ этиладиган илғор методикаларнинг мазмун-моҳиятини соҳа ходимларига етказиш кўзлангани билан аҳамиятли ҳисобланади.
Бу йилги форум “Янги Ўзбекистон мактаб остонасидан бошланади” шиори остида ташкил этилди.
Амударё тумани Мактабгача ва мактаб таълими бўлими бошлиғи Ялғаш Шамуратов ўз сўзида форум иштирокчиларини яқинлашиб келаётган мустақиллигимизнинг 33 йиллиги ҳамда янги ўқув йили билан муборакбод этди ва мамлакатимизда “Янги Ўзбекистон мактаб остонасидан бошланади” деган эзгу ғоя асосида таълим-тарбия тизимини тубдан такомиллаштириш, эртанги кунимизнинг муносиб давомчиларини камолга етказишнинг мустаҳкам ташкилий-ҳуқуқий механизмини яратиш борасида амалга оширилаётган кенг кўламли ислоҳотларнинг мазмун-моҳияти ҳақида фикр-мулоҳазаларини билдирди.
Таъкидланганидек, соҳани янада ривожлантириш мақсадида қабул қилинган қатор давлат дастурлари, қонун ҳужжатлари асосида янги таълим муассасалари қурилмоқда ва энг замонавий ўқув анжомлари билан таъминланмоқда. Таълим-тарбия сифати ва самарадорлиги мактаблар моддий-техник базаси билан бирга ўқитувчи ва мураббийларимизнинг билими, малака ва тажрибасига, ўз касбига бўлган муҳаббатига ҳам боғлиқдир. Шу боис кейинги йилларда ўқитувчиларнинг жамиятдаги ўрни ва нуфузини ошириш, уларни давлат томонидан қўллаб-қувватлаш ва ижтимоий муҳофаза қилишга жуда катта эътибор қаратилмоқда.
Форум давомида бўлимнинг Мактаблар фаолиятини мувофиқлаштириш шўъбаси раҳбари Ибрагим Раджапов сўзга чиқиб, ўтган ўқув йили натижалари сарҳисобига тўхталиб ўтди ва янги ўқув йили учун белгиланган устувор вазифалар ҳақида гапирди.
Жорий йилда Ўзбекистон Республикасининг “Педагогнинг мақоми тўғрисида”ги қонуни қабул қилиниши билан устозларнинг ҳуқуқлари, шаъни, қадр-қиммати ва ишчанлик обрўси давлат ҳимоясида эканлиги ҳуқуқий жиҳатдан мустаҳкамлаб қўйилди. Ўқитувчининг меҳнати, билимига яраша моддий рағбатлантириб бориш энг устувор вазифа сифатида белгиланди. Бундан юзлаб ўқитувчиларимиз самарали фойдаланиб, моддий манфаатдорлиги ошмоқда.
Маърузалар якунланганидан сўнг тренер ўқитувчилар томонидан барча фан ўқитувчиларига шўъбалар кесимида тренинглар ташкил қилинди. Тренингларда ўқитувчилар мезонларга асосланган баҳолаш тизими, замонавий дарсликларнинг янги ёндашувлари ҳақида маълумотга эга бўлишлари билан бир қаторда амалий машғулотларда фаол иштирок этишди.
Замон шиддат билан ривожланаётган бир давда ҳар бир ўқитувчи-педагогдан ўз илм-маърифати билан ҳамиша жамиятнинг олдинги ўринларида бўлиш, тинимсиз шахсий ривожланиш талаб қилинади. Зеро, мактабни ўзгартирмасдан туриб жамиятни ўзгартириб бўлмайди. Таълим ва тарбиянинг асоси, пойдевори бу – боғча ва мактабдир. Бу биноларни муқаддас даргоҳ қиладиган куч, шубҳасиз, ўқитувчи-педагоглар ҳисобланади. Шундай экан, устоз ва мураббийларимизга янги ўқув йилида куч-қувват, омад ва муваффақиятлар ёр бўлишини, олий орзуларининг рўёбга чиқишини тилаб қоламиз!
Райҳон Якубова, туман Мактабгача ва мактаб таълими бўлимининг Мактаблар фаолиятини мувофиқлаштириш шўъбаси методисти
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
