“BIR NURONIY – OʻN YoShGA MASʼUL” TAMOYILI ASOSIDA FAOLIYaT OLIB BORAYoTGAN NURONIYLAR OʻRTASIDA KOʻRIK-TANLOV OʻTKAZILDI

Amudaryo tumanida “Bir nuroniy – oʻn yoshga masʼul" tamoyili asosida oʻzlariga biriktirilgan 10 nafar tarbiyasi ogʻir, maʼnaviy koʻmakka muhtoj, uyushmagan, ishsiz yoshlarga yaqindan yordam berib kelayotgan nuroniylar oʻrtasida shu nomdagi koʻrik-tanlovning tuman bosqichi boʻlib oʻtdi.

Koʻrik-tanlovda Qoraqalpogʻiston Respublikasi “Nuroniy” jamgʻarmasi boshligʻi Tursunboy Abdujabbarov, Amudaryo tumani hokimining Oila va xotin-qizlar boʻyicha oʻrinbosari Goʻzal Soburovalar ishtirok etib, tanlov avvalida yigʻilganlarga Prezidentimiz tomonidan yoshlarga berilayotgan eʼtibor hamda yoshlar tarbiyasiga masʼuliyat bilan yondashayotgan faol nuroniylar tomonidan hamkor tashkilotlar bilan birgalikda amalga oshirilayotgan ibratli ishlar toʻgʻrisida maʼlumotlar berdilar.

Mamlakatimizda yoshlar bilan ishlashning yangicha boshqaruv mexanizmlarini joriy etish, ular bilan ishlashning vertikal tizimini yaratish, yoshlar muammolarining bevosita mahallalarda hal etilishi, taʼlim muassasalarida maʼnaviy-maʼrifiy va tarbiyaviy ishlarning samaradorligini yanada oshirish maqsadida mahallalarda tizimli ishlar amalga oshirilmoqda. Ayniqsa, “Bir nuroniy – oʻn yoshga masʼul” tamoyili asosida uyushmagan yoshlar bilan ishlashishning yangicha tizimi yaratilishi bu borada muhim ahamiyat kasb etmoqda.

Albatta, bunda Oʻzbekiston Respublikasi Prezidentining 2022-yil 19-yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi hamda 2023-yil 11-martdagi “Keksa avlod vakillarini har tomonlama qoʻllab-quvvatlash hamda ularning ijtimoiy faolligini oshirishga doir qoʻshimcha chora- tadbirlar toʻgʻrisida”gi Qarorlari har bir mahallada rahbarlikka olinib, ushbu Qarorlar ijrosini taʼminlashga qaratilgan rejali saʼy-harakatlar boshlab yuborilgani oʻzining ijobiy samarasini berdi.

Keksa avlod vakillarining yoshlar bilan samimiy muloqotlari, ular hayotiga doir muammolarni ijobiy hal etish borasidagi qimmatli maslahat va tajribalari bois, koʻplab tarbiyasi ogʻir, maʼnaviy koʻmakka muhtoj yoshlarning hayoti yaxshi va ijobiy tomonga oʻzgarib, xalqning mahalla institutiga boʻlgan ishonchi yanada ortdi. Chunki maʼnaviy koʻmakka muhtoj yoshlar bilan ishlash, ijtimoiy-maʼnaviy muhitni barqarorlashtirish, yoshlarni Vatanga muhabbat, ezgulik va rahmdillik ruhida tarbiyalashga, nuroniylarning yoshlar oʻrtasida milliy va umuminsoniy qadriyatlarni asrab-avaylash borasidagi faoliyatini yanada takomillashtirishga qaratilgan maʼnaviy-maʼrifiy chora-tadbirlar, muammoli yoshlar bilan nuroniylarning yakkama-yakka suhbatlari tufayli har bir ovul va mahallada oʻnlab yoshlar oʻz hayotlarini toʻgʻri yoʻlga solib oldilar hamda zarur kasb-kor egalari boʻldilar.

Amudaryo tumanida ham “Bir nuroniy – oʻn yoshga masʼul” tamoyili asosida fuqarolar yigʻinlarida yurtimizning ijtimoiy-siyosiy hayotiga oʻzining munosib hissasini qoʻshib kelayotgan, obroʻ-eʼtiborli, yuqori hayotiy tajribaga ega boʻlgan faol nuroniylar va faxriylarga hududlar boʻylab 10 nafardan tarbiyasi ogʻir, maʼnaviy koʻmakka muhtoj, uyushmagan, ishsiz yoshlar biriktirib berilgan.

Har biri oʻn nafar yoshga masʼul boʻlgan faol nuroniylar ishtirokidagi koʻrik-tanlov uch shart boʻyicha oʻtkazildi. Nuroniylar oʻzlariga biriktirilgan yoshlar bilan ishlash jarayonlari, ularni ish bilan taʼminlash, biror bir kasbni egallashi uchun kasbga oʻqitish, davlat tomonidan yoʻnaltirilgan subsidiya mablagʻlarini jalb qilish orqali yoshlar bandligini taʼminlash, oilaviy ajrashish va nizolarning oldini olish boʻyicha amalga oshirayotgan ishlari haqidagi fotoalbomlari bilan qatnashdilar.

Koʻrik-tanlov yakuniga koʻra, Boʻz solma MFYning faol nuroniysi Salomat Madaminova 124 ball bilan 1-oʻrinni, Durunki MFY faol nuroniysi Amangul Kayupova 113 ball 2-oʻrinni, Toʻlqin ovullik faol nuroniy Rahima Xudoyberganova esa 112 ball bilan faxrli 3-oʻrinni egallashdi hamda Qoraqalpogʻiston Respublikasi “Nuroniy” jamgʻarmasi boʻlimi tomonidan pul mukofotlari va diplom bilan taqdirlandilar.

Koʻrik-tanlovda faol ishtirok etgan barcha nuroniylarga Amudaryo tumani “Nuroniy” jamgʻarmasi boʻlimi tomonidan esdalik sovgʻalari topshirildi.

Robiya Yoʻldosheva.