Ovul va mahallalarda “Turmush” profilaktik targʻibot-tushuntirish tadbirlari oʻtkazilmoqda

Maʼlumki, Oʻzbekiston mahallalari uyushmasi hamda Oʻzbekiston Respublikasi Ichki ishlar vazirligi oʻrtasida joriy yilning 5-may kuni oʻzaro hamkorlik Memorandumi imzolangan edi. Mazkur hujjatda belgilangan vazifalarni amalga oshirish, jamiyatda sogʻlom ijtimoiy-maʼnaviy muhitni saqlash, aholi orasida milliy qadriyatlar, xalqimizga xos urf-odat va anʼanalarni keng targʻib qilish maqsadida tegishli soha vakillari tomonidan Amudaryo tumanidagi ovul va mahallalarda “Turmush” profilaktik tadbirlari tashkil qilinyapti.

Ovul va mahallalar “yettiligi” hamda tuman Ichki ishlar boʻlimi xodimlari bilan hamkorlikda huquqbuzarlik sodir etish va undan jabrlanish ehtimoli yuqori boʻlgan shaxslarga qoʻllaniladigan ijtimoiy profilaktika chora-tadbirlarini amalga oshirish, huquqbuzarlik sodir etishga moyil shaxslarni aniqlash, bunday toifadagi fuqarolar bilan yakka tartibda profilaktik ishlarni tashkil etish yuzasidan koʻrilayotgan chora-tadbirlar natijasida jinoyatlarning barvaqt oldini olishga erishilmoqda.

Amudaryo tumanidagi Doʻstlik mahallasi hamda Oʻrta qalʼa ovulida tashkil qilingan profilaktik tadbirlar ham oila-turmush munosabatlari doirasida sodir etilishi mumkin boʻlgan huquqbuzarliklarning barvaqt oldini olishga qaratilganligi bilan muhim ahamiyat kasb etadi.

Oila – muqaddas qoʻrgʻon. Uning tinchligi, ravnaqi va barqarorligi, jamiyatdagi sogʻlom muhit asosi va yurt farovonligi hisoblanadi. Biroq baʼzi holatlarda oilaviy nizolar sabab hayotimizda koʻplab koʻngilsiz voqealar sodir boʻlyapti. Shuning uchun nuroniylarning: “bir kun janjal boʻlgan uydan qirq kun baraka ketadi”, deb nasihat qilishlari bejizga emas.

Belgilangan vazifalarga koʻra, oilaviy munosabatlar doirasida tez-tez nizolar kuzatiladigan notinch oilalar roʻyxati shakllantirilib, ular bilan profilaktik suhbatlar olib borilyapti va mavjud muammolarni hal qilish yuzasidan manzilli ishlar amalga oshirilmoqda. Shuningdek, oilaviy munosabatlar doirasida jinoyat va maʼmuriy huquqbuzarlik sodir etgan fuqarolarning xonadonida sogʻlom turmush tarzini taʼminlash yuzasidan chora tadbirlar yanada kuchaytirildi.

Xususan, oilaviy-maishiy zoʻrovonliklar boʻyicha maʼmuriy huquqbuzarlik sodir etgan 27 nafar fuqaroga nisbatan jinoyat ishlari boʻyicha Amudaryo tumani sudi tomonidan Maʼmuriy javobgarlik toʻgʻrisidagi Kodeksning tegishli moddalari bilan jarima jazolari qoʻllanilgan. Tazyiq va zoʻravonlikka uchragan 170dan ortiq xotin-qizlarga himoya orderi berilib, tuman Ichki ishlar boʻlimi tomonidan doimiy nazoratga olingan. Bu toifadagi fuqarolarga Xotin-qizlarni kasbga tayyorlash monomarkazlarida oʻqishlari uchun amaliy yordam berib kelinmoqda. Tazyiq va zoʻravonliklar oqibatida sogʻligi yomonlashgan xotin-qizlarning tuman Tibbiyot birlashmasida salomatliklarini tiklashlari uchun yordam koʻrsatilmoqda. Shuningdek, bu kabi 2ta oilaning farzandlariga oromgohlarda dam olishlari uchun yoʻllanma berilgan.

Taʼkidlash joizki, yurtimizda oila hamisha davlat himoyasida va oliy qadriyat sifatida eʼzozlanadi. Yosh avlodning jismonan sogʻlom, maʼnan yetuk inson boʻlib ulgʻayishlarida oila va jamiyatdagi sogʻlom muhitni taʼminlash har birimizning inson sifatidagi yuksak burchimizdir.

I. Oʻrozmatova, Amudaryo tumani IIB jamoat xavfsizligi xizmati huquqbuzarliklar profilaktikasi boʻlinmasi xotin-qizlar masalasi boʻyicha katta inspektori.