SOBIQ SINFDOShLAR 35-YILDAN SOʻNG UChRAShDILAR

Bolalik – begʻuborlik, yoshlik–bahor, deydilar. Shu bois, inson bir umr bolalik va yoshlik xotiralari ogʻushida yashaydi, ana shu xotiralardan maʼnaviy kuch oladi, qilgan xatolarini toʻgʻrilashga, ezgu ishlarini bir-bir xayol koʻzgusidan oʻtkazib, sarhisob qilishga, hayotidan koʻngli toʻlganida ana shu bolalik va yoshlik damlariga oshno doʻstlari bilan diydorlashishga intiladi. Ayniqsa, bolalikdagi qadrdon doʻstlari bilan uchrashganda bu xotiralar uygʻonadi, bor boʻy-basti bilan namoyon boʻladi. Doʻstona, samimiy suhbatlar, qadrdonlik mehri ularni yanada jipslashtiradi,

Bundan 35-yil avval Amudaryo tumanidagi 20-sonli umumtaʼlim maktabini bitirib, mustaqil hayotga yoʻllanma olgan sobiq sinfdosh doʻstlar yana oʻzlariga taʼlim-tarbiya berib, oq-qorani tanitgan, mustaqil hayot sari parvoz maydoni vazifasini oʻtagan jonajon maktabi bagʻrida jam-ul jam boʻldilar.

Baland gujumlar soya solgan maktab hovlisida uchrashib, bolalik xotiralari ogʻushida bir muddat sayr qilgan qadrdon doʻstlarni qoʻngʻiroq jaranggi yana sinfxonalarga chorladi. Sobiq sinfdoshlar bundan 35-yil avval ustozlaridan ilm sirlaridan saboqlar olgan partalarga oʻtirib, begʻubor bolalik shoʻxliklarini esladilar. Oʻzlariga taʼlim tarbiya bergan ustozlarining oʻgit-nasihatlarini tinglab, dildan suhbatlashdilar.

Hayot tasodiflarga, bemavrid yoʻqotishlarga toʻla. Sinfxonadagi boʻsh partalarga qadalgan doʻstlarning nigohi Allohning irodasi bilan maʼlum sabablarga koʻra hayotdan erta ketgan qadrdonlarini izladi. Sinfdoshlar doʻstlari haqidagi xotiralarni yodga olishib, oʻtganlarning ruhlarini shod etish maqsadida qabrlarini ziyorat qildilar. Uchrashuv tadbiri davomida oʻtganlarning ruhlariga Qurʼon oyatlaridan tilovatlar qilindi.

Shundan soʻng uchrashuv ustoz-u shogirdlar va tadbir mehmonlari bilan fayzli dasturxon atrofida davom etdi. Soʻlim Amudaryo sohilida, ona tabiat bagʻrida sobiq sinfdoshlar davrasi yanada maroqli taassurotlarga boy boʻldi.

Qadrdon doʻstlar bir-birlariga, ustozlariga oʻzlari hayotda erishgan yutuqlari, ayniqsa, oilasi, farzandlari xususida soʻzlab berdilar. Kuy-qoʻshiqlar tinglab, 35-yildan keyingi diydorlashuv onlaridan mamnun boʻlishib, raqsga tushdilar.

Uchrashuv yakunida turmush taqozosiga koʻra, har qaysisi Amudaryo tumanining va mamlakatimizning turli hududlarida umrguzaronlik qilayotgan sobiq sinfdoshlarni bitta davra atrofida jamlab, diydorlashuv tadbirini tashkil qilishda fidoyilik koʻrsatgan Gulshodaxon, Gʻulomjon va Qumrixon sinfdoshlariga chin dildan minnatdorchilik bildirishdi.

Sobiq sinfdoshlarning diydorlashuv tadbiri biri-biridan shirin taassurotlar ogʻushida oʻtdi va oʻzaro mehr-oqibat tuygʻularidan koʻngillar obod, yana uzoq yillar eslab yurishga arzigulik farahli onlarga boy boʻldi.

Robiya Yoʻldosheva.