Tuman Adliya boʻlimi xodimlari uyma-uy yurib, aholiga bepul yuridik yordam hamda huquqiy maslahatlar bermoqda

Bugungi kunda mamlakatimizda “Xalq davlat idoralariga emas, davlat idoralari xalqqa xizmat qilishi kerak”, degan tamoyil har bir rahbar xodim uchun oltin qoidaga aylandi. Chunki uyma-uy yurib, xalq bilan samimiy muloqotda boʻlish, ularning muammolarini joyiga chiqqan holda oʻrganish va hal etish, zarur holatlarda qoʻllab-quvvatlashdek xalqona siyosatni muhtaram Prezidentimizning shaxsan oʻzlari boshlab berdilar. Ayniqsa, ijro etuvchi hokimiyat organlari xodimlarining oʻz faoliyatlarini samarali tashkil qilishlari, xalqning huquqiy madaniyatini oshirish, ularga koʻrsatilayotgan huquqiy xizmatlar sifati va koʻlamini kengaytirish, kundalik hayotida uchraydigan huquqiy muammolarni joylariga chiqqan holda oʻrganish hamda tizimli hal etish borasidagi saʼy-harakatlari oʻzining ijobiy natijasini bermoqda.

Oʻzbekiston Respublikasi Prezidentining 2024-yil 24-maydagi "Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida"gi Farmoni ijrosini taʼminlashga qaratilgan amaliy ishlar, xalq bilan yuzma-yuz muloqotlar esa ijro etuvchi hokimiyat organlari xodimlari bilan oddiy xalqni bir-biriga yanada yaqinlashtirdi. Buni Amudaryo tuman Adliya boʻlimi tomonidan amalga oshirilayotgan xalq orasidagi huquqiy maslahatlar, huquqiy savodxonlik mavzusidagi davra suhbatlari, fuqarolarga bepul birlamchi huquqiy yordam koʻrsatish, davlat organlari va tashkilotlari, mahalliy davlat organlari hamda ovul va mahallalarda oʻtkazilayotgan tadbirlarda yaqqol koʻrish mumkin. Ushbu tadbirlar, Prezidentimiz talab qilganlariday, yagona huquqni qoʻllash amaliyotini shakllantirish, aholiga uslubiy yordam koʻrsatish maqsadida muntazam ravishda oʻtkazib kelinmoqda.

Ana shunday tadbirlardan biri Mangʻit shahridagi Navoiy nomli maahalla fuqarolar yigʻinida ham oʻtkazildi. “Uyma-uy yurish” aktsiyasi doirasida Amudaryo tumani Adliya boʻlimi boshligʻi Mansur Sadikov “Mahalla yettiligi” aʼzolari va fuqarolar vakillari bilan uchrashdi.

Uchrashuvda Amudaryo tuman Adliya boʻlimi mutaxassislari, tuman Davlat xizmatlari markazi xodimlari, Navoiy nomli MFY masʼullari, fuqarolar yigʻini vakillari va yoshlar ishtirok etdilar. Mansur Sadikov MFY masʼullari bilan birgalikda mahalla fuqarolar yigʻini hududidagi xonadonlarga kirib, aholi bilan muloqotda boʻldi. Yuzma-yuz muloqotlar jarayonida mahalladagi Toshkent, Andijon va Ajiniyoz koʻchalarida istiqomat qiluvchi fuqarolarning kundalik hayotida uchraydigan huquqiy muammolari aniqlanib, tahlil qilindi va ularni bartaraf etish choralari koʻrildi.

Mahalla fuqarolari bilan boʻlib oʻtgan samimiy muloqotlar jarayonida masʼullar Oʻzbekiston Respublikasi Prezidentining 2024-yil 24-maydagi "Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida"gi Farmoni mazmun-mohiyati, ushbu Farmon ijrosini taʼminlash maqsadida Amudaryo tuman Adliya boʻlimi tomonidan amalga oshirilayotgan huquqiy-maʼrifiy ishlar xususida batafsil maʼlumotlar berdi.

“Uyma-uy yurish”, “Huquqiy koʻmak” aktsiyalarini oʻtkazish, “Mahalla yettiligi”ga qonunchilik hujjatlarining mazmun-mohiyati va ahamiyatini xalqona tilda yetkazish, “Online mahalla” platformasiga kiritilgan aholining kundalik hayotidagi huquqiy masalalarga oid muammolarini hal etishda koʻmaklashish tuman Adliya boʻlimi xodimlarining zimmasidagi masʼuliyatli vazifalar ekanligi alohida taʼkidlandi. Shu bilan birga, ijtimoiy daftarlar hamda “Ijtimoiy himoya yagona reyestri” axborot tizimiga kiritilgan fuqarolarga bepul birlamchi yuridik yordamlar koʻrsatilib, huquqiy maslahatlar berildi.

Shuningdek, aktsiya davomida aniqlangan huquqiy muammolar keyinchalik Adliya boʻlimi tomonidan huquqiy koʻmak berish maqsadida alohida roʻyxatga olinib, maxsus tasdiqlangan anketa-soʻrovnomaga kiritildi va fuqarolarga bu muammolarning ijobiy hal etilishida imkon qadar amaliy yordam koʻsatish haqida zarur tushuntirish ishlari olib borildi.

Bundan tashqari, ijtimoiy himoyaga muhtoj shaxslarni qonunchilik hujjatlarida belgilangan imtiyozlar, subsidiyalar, grantlar hamda davlat tomonidan qoʻllab-quvvatlashning boshqa turlaridan foydalanish tartibi haqida xabardor qilish maqsadida mahalla hududida istiqomat qiluvchi nogironligi bor boʻlgan fuqarolar holidan xabar olinib, ularga davlatimiz tomonidan koʻrsatilayotgan eʼtibor va gʻamxoʻrliklar, yaratilayotgan imkoniyatlar hamda imtiyozlar xususida huquqiy tushunchalar, zarur tavsiyalar ham berildi.

Tadbir davomida tuman Davlat xizmatlari markazi xodimlari tomonidan fuqarolarga davlat xizmatlari koʻrsatish sohasidagi oʻzgarishlar, yangiliklar xususida tushuntirish ishlari ham olib borilib, mahalla fuqarolariga sayyor tartibda davlat xizmatlari koʻrsatildi.

Robiya Yoʻldosheva.