Yongʻin xavfsizligini taʼminlash boʻyicha dolzarb 30 kunlik doirasida aholi xonadonlari oʻrganilmoqda

Qoraqalpogʻiston Respublikasi Vazirlar Kengashi Raisining 2024-yil 24-iyun kungi va Amudaryo tumani hokimi, fuqaro muhofazasi boshligʻining 2024-yil 28-iyun kungi farmoyishlari ijrosini taʼminlash maqsadida joriy yilning 1-iyul sanasidan 1-avgust sanasiga qadar “Yongʻin xavfsizligini taʼminlash boʻyicha dolzarb 30 kun” tadbirini oʻtkazish belgilangan.

Ushbu hujjatlar ijrosini taʼminlash maqsadida Amudaryo tumani Favqulodda vaziyatlar boʻlimi xodimlari va tegishli soha vakillari oʻzaro hamkorlikda Respublikamiz hududida fuqarolarning ehtiyotsizliklari tufayli soʻnggi vaqtlarda kuzatilayotgan yongʻinlar va ularning salbiy oqibatlarini hisobga olib, yongʻin xavfi yuqori boʻlgan obʼektlarda, ayniqsa, oromgohlar, oʻrmonlar, uy-joylar hamda taʼlim obʼektlarida yongʻin xavfsizligini taʼminlash, fuqarolarning hayoti, mol-mulkining daxlsizligini saqlash maqsadida barcha hududlarda istiqomat qiluvchi aholi xonadonlariga kirib, favqulodda hodisalar yuz berganda yoki bemavrid yongʻin hodisasi sodir boʻlganda qanday harakat qilish zarurligi, shuningdek, kuz-qish mavsumiga tayyorgarlik koʻrish yuzasidan zarur tushuntirish ishlarini olib borishmoqda.

Xususan, aholi xonadonlaridagi isitish tizimlarining holati koʻzdan kechirilib, uy xonalarida havo almashinishi, isitish qozonlarining qay darajada sozligi oʻrganilmoqda hamda agar isitish qozonlari uylar ichkarisida joylashgan boʻlsa, kuz-qish mavsumidan oldin, xavfsizlik nuqtai nazaridan ularni uy tashqarisidagi qulay joyga oʻrnatish yuzasidan zarur tushuntirish ishlari olib borilmoqda.

Amudaryo tumani Irrigatsiya boʻlimida Favqulodda vaziyatlar boʻlimi xodimlari va tegishli soha vakillari bilan hamkorlikda oʻtkazilgan tadbirda ham turli koʻrinishdagi favqulodda vaziyatlar – zilzila, suv toshqini, kuchli shamollar va yongʻin bilan bogʻliq hodisalar sodir boʻlganda toʻgʻri harakatlanish boʻyicha oʻquv amaliy-taktik mashqi oʻtkazildi.

Oʻquv mashgʻulotlarida favqulodda vaziyatlar sodir boʻlganda, eng avvalo, yosh bolalarni va keksa kishilarni qutqarish choralarini koʻrish, maboda, ular zararlangan taqdirda birinchi yordam koʻrsatish, yongʻinni bartaraf etish, asosan yongʻin kelib chiqishining oldini olishga qaratilgan saʼy-harakatlar amalda koʻrsatib berildi. Shu bilan birga, aholi xonadonlarida, muassasa va tashkilotlarda, bolalar oromgohlarida yongʻin xavfsizligini taʼminlashga qaratilgan chor-tadbirlar yuzasidan ishtirokchilarga zarur tavsiyalar, tushunchalar berildi.

Tadbir davomida Xizr eli mahallasi hududida joylashgan 46-sonli maktabning 300-oʻrinli qoʻshimcha binosi qurilishini amalga oshirayotgan “Sanjar-Diyor building” MChJ quruvchilari tomonidan mazkur qurilish obʼektida amalga oshirilayotgan ishlar yongʻin xavfsizligi qoidalariga qay darajada javob berishi, ishchi-xodimlarning favqulodda vaziyatlarda qanday harakat qilish zarurligi toʻgʻrisidagi bilim va malakalari oʻrganildi.

Favqulodda vaziyatlar boʻlimi xodimlari va tegishli soha mutaxassislari mazkur qurilish boʻyicha loyiha hujjatlari bilan ham tanishib, bajarilayotgan ishlar loyihada koʻrsatilgan qurilish meʼyoriy talablariga mos kelish-kelmasligi bilan batafsil tanishib chiqdilar hamda quruvchilarga aniqlangan kamchiliklar yuzasidan kerakli maslahatlar berdilar. Bu boʻyicha eslatmalar ham tarqatilib, qurilish obʼektida ish jarayonida texnika xavfsizligi qoidalariga qatʼiy amal qilish, qurilish olib borilayotgan hududda keraksiz chiqindilarni yoqmaslik, vaqtinchalik tortilgan elektr simlardan foydalanmaslik boʻyicha amaliy tushuntirish ishlari olib borildi.

Ayni kunlarda tumanimizda “Yongʻin xavfsizligini taʼminlash boʻyicha dolzarb 30 kun” tadbirlari Favqulodda vaziyatlar boʻlimi xodimlari va tegishli soha mutaxassislari tomonidan ovul va mahallalarda, muassasa va tashkilotlarda keng miqyosda amalga oshirilmoqda. Oʻtkazilayotgan amaliy tadbirlardan koʻzlangan maqsad esa bitta – xalqimizni har qanday koʻrinishdagi favqulodda vaziyatlarda ishonchli himoya qilish, ayniqsa, yongʻin xavfsizligini taʼminlash, jamiyatimizda tinch, xotirjam va osoyishta, farovon hayot barqarorligi uchun munosib hissa qoʻshishdir.

Robiya Yoʻldosheva