Yoshlar kuni munosabati bilan tumanimizda “Yangi Oʻzbekiston yoshlari, birlashaylik!” shiori ostida katta bayram tadbiri oʻtkazildi

Yoshlik – tuganmas shijoat, aniq maqsadlar yoʻlida tinimsiz mehnat, mashaqqatlar va muvaffaqiyatlar fasli. Katta avlodning orzu-havaslari, ushalmagan niyatlari kuch-gʻayratga toʻla navqiron avlodning muvaffaqiyat yoʻlidagi dadil harakatlarida namoyon boʻladi goʻyo... Yoshlik hech qachon magʻlubiyatni tan olmaydi. Shuning uchun Yoshlik hamisha gʻoliblikka munosib.

Mamlakatimizning barcha hududlarida, xususan, Amudaryo tumanida ham 30-iyun – Yoshlar kuni zoʻr tantanalar bilan nishonlandi. Sana munosabati bilan Doʻstlik mahallasida joylashgan bolalar va oʻsmirlar markaziy oʻyingohida “Yangi Oʻzbekiston yoshlari, birlashaylik!” shiori ostida tashkil etilgan bayram dasturi yoshlarga koʻtarinki kayfiyat va unutilmas quvonchli lahzalarni baxsh etdi.

Bayram tadbirida tuman hokimi Sobir Xoʻjametov, sektor rahbarlari, hokim oʻrinbosarlari, sohaga masʼul mutasaddilar va tumanimiz yoshlari ishtirok etishdi.

Tabdir avvalida Oʻzbekiston va Qoraqalpogʻiston Respublikalarining Davlat madhiyalari yangradi. Navqiron avlod vakillari qoʻllarini koʻksiga qoʻyib, yurt madhini joʻr boʻlib kuylashdi.

Shundan keyin tuman hokimi Sobir Xoʻjametov soʻzga chiqib, yoshlarini bayram bilan samimiy muborakbod etdi. Tuman hokimi oʻzining tabrik nutqida mamlakatimizda amalga oshirilayotgan islohotlar natijasida yoshlar bilan ishlashning yangi tizimi yaratilganligi, ijtimoiy faol, Vatan va xalq taqdiriga daxldorlik tuygʻulari bilan yashayotgan yosh avlodning safi yildan-yilga tobora kengayib borayotganini taʼkidlab, yurtimizda yoshlarga yaratilgan zarur sharoit va imkoniyatlardan samarali foydalanib, muvaffaqiyatlarga erishib kelayotgan tumanimiz faxrli yoshlarining yutuqlarini alohida eʼtirof etib oʻtdi.

Darhaqiqat, mamlakatimizda aholining asosiy qismini yoshlar tashkil etadi. Shuning uchun Oʻzbekiston yoshlar mamlakati sifatida eʼtirof etiladi. Bundan yetti yil muqaddam – 2017-yilda Prezidentimiz tashabbuslari bilan 30-iyun “Yoshlar kuni” sifatida belgilangani nafaqat yoshlarimiz, balki butun xalqimiz hayotida tarixiy voqea boʻlgan edi. Joriy yilning yurtimizda “Yoshlar va biznesni qoʻllab-quvvatlash yili” sifatida belgilanishi ham Oʻzbekiston yoshlari hayotida yangi sahifalarni ochdi.

Bugun hayotimizning qaysi soha va tarmogʻini olmaylik, yoshlarga eʼtibor va gʻamxoʻrlik asosiy oʻringa koʻtarilib, ularga zarur sharoit va imkoniyatlar yaratib berilmoqda. Keyingi paytlarda hayotga tatbiq etilgan “Yoshlar daftari” va “Yoshlar dasturi” doirasida amalga oshirilgan ishlar natijasida koʻplab yoshlarning hayotidagi muammolari hal qilinishiga erishilmoqda.

Shu oʻrinda taʼkidlash joizki, mamlakat miqyosida oʻtkazilayotgan musobaqa va tanlovlarda tumanimiz yoshlarining erishgan yutuqlari bayram uchun munosib sovgʻa boʻldi. Xususan, Davlat xavfsizlik xizmati kubogi uchun oʻtkazilgan musobaqalarning Qoraqalpogʻiston Respublikasi bosqichida futbol boʻyicha Toʻlqin ovuli yigitlari jamoasi, mini futbol boʻyicha esa Xolimbeg ovuli qizlari jamoasi gʻolib chiqib, mamlakat miqyosidagi bosqichga yoʻllanma olgani amudaryolik sport ixlosmandlariga katta tuhfa boʻldi. Bundan tashqari, bayram arafasida amudaryolik Abbos Yoʻldoshevga shaxsan Prezidentimiz tomonidan “Mard oʻgʻlon” davlat mukofoti topshirilgani barchamizni xushnud etdi.

Kontsert dasturida tumanimizning taniqli estrada yulduzlari ijrosida yangragan shoʻx qoʻshiqlar yoshlarni zavqlantirib, raqsga chorladi. Sanʼantkorlar tomonidan kuylangan qoʻshiqlarda yoshlik, ona Vatan, doʻstlik, muhabbat tuygʻulari tarannum etildi. Ayniqsa, istedodli yosh estrada yulduzi Boburbek Arabboyev ijro qilgan shoʻx qoʻshiqlar yoshlar davrasini yanada jonlantirdi.

Fursatdan foydalanib, biz ham tumanimizning barcha yoshlarini 30-iyun – Yoshlar kuni bilan yana bir bor muborakbod etamiz. Oʻzbekiston yoshlarini Vatan ravnaqi uchun munosib xizmat qilishlarida kuch-gʻayrat va shijoat hech qachon tark etmasin!

Shohzod Qurbonboyev