“Nazarxon” paxta qabul qilish maskanida amaliy-taktik oʻquv mashqi oʻtkazildi

Yongʻin xavfsizligi mashqlari va mashgʻulotlari, ayniqsa paxta qabul qilish kabi muhim infrastruktura obʼektlarida yongʻin xavfsizligi boʻyicha shaxsiy tarkibning malakasini oshirish va ularning jangovar tayyorgarligini mustahkamlash uchun juda muhimdir. Bu kabi mashqlar yongʻin sodir boʻlganda tezkor va samarali harakat qilish uchun zarur boʻlgan koʻnikmalarni rivojlantirishga yordam beradi.

Shu sababli Qoraqalpogʻiston Respublikasi Favqulodda vaziyatlar boshqarmasi tomonidan tasdiqlangan ish-rejaga muvofiq “Amudaryotex” xorijiy korxonasiga qarashli “Nazarxon” paxta qabul qilish maskanida amaliy-taktik oʻquv mashqi oʻtkazildi.

Amudaryo tumani Favqulodda vaziyatlar boʻlimi hamda boʻlimning 4-kasbiylashtirilgan yongʻin-qutqaruv qismi tomonidan tashkil qilingan ushbu amaliy-taktik oʻquv mashqidan koʻzlangan asosiy maqsad – paxta qabul qilish maskanlaridagi buntlarda yongʻin sodir boʻlganda shaxsiy tarkibning jangovor yoyilishlari va harakatlarini koʻzdan kechirish, mavjud kuch va vositalardan toʻgʻri foydalanishlarini yana bir marta sinovdan oʻtkazishdir.

Aytish joizki, mamlakatimizda paxta qabul qilish maskanlarida yongʻin xavfsizligini taʼminlash, aholi va ishchilarning hayoti va sogʻligʻini himoya qilish, shuningdek, muhim iqtisodiy resurslarni saqlash borasida zarur tavsiyalar ishlab chiqilib, masʼullarga tegishli majburiyatlar yuklangan. Oʻzbekiston Respublikasi Vazirlar Mahkamasining 2020-yil 20-oktyabrdagi 649-sonli qarorida yongʻin xavfsizligi qoidalari va talablari belgilab qoʻyilgan. Ushbu qarorda bu kabi maskanlarda yongʻin xavfsizligini taʼminlash uchun yongʻinga qarshi asbob-uskunalarning mavjudligi, xodimlarning yongʻin xavfsizligi boʻyicha tayyorgarligi va tegishli yongʻin-texnik komissiyalarning faoliyat yuritishi lozimligi belgilab qoʻyilgan.

Shuningdek, yongʻin xavfsizligi standartlariga rioya qilinishi, oʻt oʻchirish vositalarining muntazam ravishda tekshirilishi va yangilanishi xavfsiz ish muhitini taʼminlashda muhim ahamiyatga ega.

Paxta qabul qilish maskanlari nafaqat mavsumga tayyorlanish jarayonida, balki yil davomida paxtani saqlash jarayonida ham yongʻin xavfsizligi chora-tadbirlari alohida eʼtiborga olinishi kerak boʻlgan obʼektlar sirasiga kiradi. Shu sababli maskanlarning yongʻin xavfsizligi talablariga muvofiqligi Oʻzbekiston Respublikasi Favqulodda vaziyatlar vazirligi tomonidan muntazam ravishda nazorat qilinadi va bu borada davlat tomonidan belgilangan standartlarga amal qilish talab etiladi.

Ushbu  amaliy-taktik oʻquv mashqi yongʻin oʻchirish ekipajlarining jangovar tayyorgarligini sinovdan oʻtkazish uchun ham ajoyib imkoniyat boʻldi. Bu jarayonda yongʻin oʻchirish ekipajlari oʻz vaqtida yetib kelish va yongʻinni bartaraf etish boʻyicha oʻzlarining mahoratini namoyish etdilar.

Mashq davomida maskan xodimlari tomonidan shartli yongʻinning butun maskan boʻylab tarqalishining oldini olish uchun ichki yongʻin oʻchirish moslamalaridan foydalanildi, bu esa yongʻin oʻchirish ekipajlarining kelishiga qadar vaziyatni nazorat qilishga yordam berdi.

Shuningdek, mashqlar davomida yongʻin oʻchirish uchun zarur boʻlgan suv zaxirasini taʼminlash maqsadida Nazarxon paxta qabul qilish maskanida mavjud boʻlgan ikkita yongʻinga qarshi suv saqlash xovuzlari ham koʻzdan kechirildi.

Amaliy-taktik oʻquv mashqida tuman elektr tarmoqlari korxonasi, tuman gaz taʼminoti korxonasi, “Tez tibbiy yordam” va Ichki ishlar boʻlimi xodimlari hamkorlikda faol ishtirok etdi.

Amaliy oʻquv mashqi yakunida oʻquv mashqi rahbari Amudaryo tumani Favqulodda vaziyatlar boʻlimi boshligʻi oʻrinbosari, kapitan Sherzod Tursinboyev tomonidan ishtirokchilarga, jumladan maskan xodimlariga mashq davomida yoʻl qoʻyilgan kamchiliklar koʻrsatilib, kelgusi mashqlarda ularni bartaraf etish boʻyicha tavsiyalar berildi. Bu kabi mashqlar, yongʻin xavfsizligi boʻyicha shaxsiy tarkibning malakasini oshirish hamda ularning jangovar tayyorgarligini mustahkamlashda muhim vosita boʻldi.

Rashid Kazakov, Amudaryo tumani Favqulodda vaziyatlar boʻlimi 4-Kasbiylashtirilgan yongʻin-qutqaruv qismi boshligʻi