Toshqalʼadagi “Gʻoyib ota” qabristoni obodonlashtirilib, atrofiga manzarali daraxt koʻchatlari ekildi

Yurtimizga bahor fasli kirib kelishi bilan yurtdoshlarimiz chor-atrofni tozalash va obodonlashtirish ishlariga uyushqoqlik bilan kirishadilar. Zero, obodlik bor joyda qut-baraka boʻladi. Bu hikmatli soʻzni hayoti va faoliyatiga shior qilib olgan amudaryoliklar joriy yilgi bahor faslini ham hasharlar bilan boshlab, hovli va koʻchalarini, mahalla va guzarlarni obod qilish, koʻkalamzorlashtirish ishlariga munosib hissa qoʻshmoqdalar.

Tumanning Qilichboy ovulidagi Toshqalʼa mahallasi hududida ham hasharlar oʻtkazilib, “Yashil makon” umummilliy loyihasi doirasida koʻchat ekish ishlari yuqori surʼatda, sifatli tarzda amalga oshirilmoqda.

Ramazon oyi munosabati bilan mahalla ahli fuqarolar yigʻini masʼullarining tashabbusi asosida yana bir xayrli ishga qoʻl urdilar. Navbatdagi hashar davomida hududda joylashgan “Gʻoyib ota” qabristoni atrofi obodonlashtirilib, daraxtlarga shakl berildi va ohaklandi. Qabriston hududi begona oʻtlardan, xas-hashaklardan tozalanib, yoʻlaklar tartibga keltirildi.

Muqaddas islom dinimizda qabristonni ziyorat qilish katta savoblar qatoriga kiritilgan. Marhumlar abadiy qoʻnim topgan maskanlarni ziyorat qilish va ularning haqlariga duoda boʻlish har birimizning insoniy burchimizdir. Shu sababli ham har bir yurtdoshimiz doimo milliy va diniy qadriyatlarimizni asrashga, oʻtgan ajdodlarimiz xotirasini ulugʻlashga, ularga hurmat-ehtirom koʻrsatishga intiladilar.

Ramazon hayiti bayrami tobora yaqinlashib kelayotgan shu kunlarda oʻtkazilgan ushbu hashar esa ziyoratga keluvchilarga sharoitlar yaratish, aholi yuradigan yoʻlaklarni tartibga keltirishga qaratilgani bilan nihoyatda ahamiyatlidir.

Hashar davomida qabriston atrofidagi 30 sotix tashlandiq yer haydalib, fermerlar tomonidan ajratilgan texnikalar yordamida yerga ishlov berildi. Ushbu maydonga va qabriston atrofiga “Yashil makon” umummilliy loyihasi doirasida 700 tup tut, 500 tup terak va yana 500 tupdan ortiq boshqa manzarali daraxtlar qalamchalari ekildi.

“Yashil makon” umummilliy loyihasi doirasida tuman hokimligi tomonidan tasdiqlangan rejaga muvofiq Toshqalʼa mahallasi hududiga jami 3785 tup koʻchat va qalamchalar ekish rejalashtirilgan boʻlsa, shu kungacha ekilgan nihollar soni 4 ming tupdan oshib ketdi.

Obodonlashtirish va koʻkalamzorlashtirish maqsadida tashkil qilingan hasharda mahalla faollari, nuroniylari va yoshlar birdamlikda faollik koʻrsatdilar. Yoshi ulugʻ nuroniylar yoshlarga hayotiy maslahatlar berib, umr yoʻllari davomida boshidan oʻtkazgan azob-uqubatlari, tortgan mashaqqatlari haqida soʻzlab berdilar. Yoshlar esa gʻayrat va shijoatini, shu aziz Vatanimizga sadoqatini amalda namoyish qilib, hasharda jonbozlik koʻrsatdilar.

Hashar soʻngida mahalla faoli, faxriy oʻqituvchi Sanobar Bobojonova, yoshlar yetakchisi Izzat Qurbonboyev va qabriston shayxi Tursunboy Eshbekovlar obodonlashtirish ishlarida qatnashganlarga oʻz minnatdorchiligini bildirdilar.

Gʻ.Yeshniyozov