IS GAZIDAN ZAHARLANIShNING OLDINI OLISh BOʻYIChA PROFILATIK TADBIR OʻTKAZILDI

Maʼlumki, is gazi – rangsiz, hidsiz, koʻp uchraydigan zaharli birikma – tabiiy gaz, yoqilgʻi, koʻmir, oʻtin choʻgʻlari toʻliq yonmasligi yoki chala yonishi oqibatida vujudga keladi. Insonlarning hayoti xavf ostida qolishiga sababchi boʻladigan is gazidan zaharlanish holatlari esa aksariyat hollarda xavfsizlik qoidalariga amal qilmaslik va eʼtiborsizlik natijasida kelib chiqadi.

Joriy yilning 12-mart kuni Amudaryo tumani Favqulodda vaziyatlar boʻlimi tomonidan soʻnggi paytlarda koʻp sodir boʻlayotgan is gazidan zaharlanish va uning zararli oqibatlarining oldini olish boʻyicha tegishli chora-tadbirlarni belgilab olishga qaratilgan yigʻilish oʻtkazildi.

Yigʻilishda Qoraqalpogʻiston Respublikasi Favqulodda vaziyatlar boshqarmasi boshligʻi oʻrinbosari polkovnik Mahmud Seydullayev, tuman hokimi oʻrinbosari Bahodir Ernazarov, tuman Favqulodda vaziyatlar boʻlimi boshligʻi kapitan Zafar Ahmedov, gaz taʼminoti korxonasi tuman boʻlimi boshligʻi Jasur Yermetov, elektr taʼminoti korxonasi tuman boshligʻi Mansur Xudoyberganov, Milliy gvardiyaning tumandagi Qoʻriqlash boʻlimi xodimlari hamda ishchi guruhning boshqa aʼzolari ishtirok etishdi.

Yigʻilish davomida joriy yilning 9-mart kuni Fargʻona shahri, Ahmad Yassaviy koʻchasida istiqomat qiluvchi fuqarolarning is-gazidan zaharlanish oqibatida vafot etganligi toʻgʻrisida maʼlumot berilib, amalga oshirilishi lozim boʻlgan profilaktik chora-tadbirlarni yanada kuchaytirish kerakligi boʻyicha tegishli vazifalar belgilab olinishi kerakligi taʼkidlandi.

Amudaryo tumanida ham 2023-2024-yillarning kuz-qish mavsumi davrida har xil turdagi favqulodda vaziyatlarning oldini olish maqsadida tuman hududida joylashgan yakka tartibdagi hamda koʻp kvartirali turar joylarda isitish qurilmalari va ularning dudburonlarining sozligiga  mahalla faollari ishtirokida har bir xonadonlarda oʻrganish ishlari olib borilayotganini, oʻrganishlar jarayonida aniqlangan kamchiliklar tegishliligi boʻyicha joyida bartaraf qilinayotgani maʼlum qilindi.

Shu bilan birga, tuman hokimligida tuzilgan Favqulodda vaziyatlar boʻlimi, gaz, elektr tarmoqlari va boshqa tegishli idoralar vakillaridan iborat ishchi guruh tomonidan tungi vaqtda ijtimoiy soha obʼektlarining holati oʻrganib chiqilayotgani eʼtirof etilib, oʻrganish davomida joylardagi masʼullarga tavsiyalar berilayotgani, maʼlumotnoma rasmiylashtirilgan holda Qoraqalpogʻiston Respublikasi Favqulodda vaziyatlar boshqarmasiga nazorat uchun kiritilayotgani eʼtirof etildi.

Bu boradagi ishlarni yana davom ettirish, fuqarolarga is-gazidan zaharlanishning oldini olish boʻyicha profilaktik tushuntirish ishlarini yanada jadallashtirish kerakligi, ularga eslatma materiallari tarqatilib, xavfsizlik qoidalari toʻgʻrisida maʼlumotlar berilib borilishi lozimligi aytilib, tegishli vazifalar belgilab berildi.

Shundan soʻng, Qoraqalpogʻiston Respublikasi Favqulodda vaziyatlar boshqarmasi boshligʻi oʻrinbosari Mahmud Seydullayev tomonidan xizmat qilayotgan harbiy va texnik xizmatchilar, ularning oila aʼzolari uchun sayyor qabul oʻtkazdi. Sayyor qabulda Amudaryo tumani Favqulodda vaziyatlar boʻlimi xodimlarining sohadagi muammolar yuzasidan murojaat va takliflari tinglandi. Bayon etilgan masalalar yuzasidan murojaatlar masʼullar ishtirokida koʻrib chiqildi. Asosiy eʼtibor murojaatlarni oʻz vaqtida hal etishga qaratilib, mutasaddi rahbarlarga aniq vazifalar yuklatilib, ushbu topshiriqlarning ijrosi nazoratga olinishi taʼkidlandi.

O.Xudoyberganova.