AMUDARYo TUMANIDA KUTUBXONAChILAR UChUN “BIBTEXNIKA” VOSITALARINI AMALIY QOʻLLASh BOʻYIChA SEMINAR TAShKIL ETILDI

Yurtimizda Maktabgacha va maktab taʼlimi vazirligi tomonidan umumtaʼlim maktablari kutubxonalari moddiy-texnik bazasini mustahkamlash maqsadida barcha hududlarga “bibtexnika” jamlanmalari yetkazib berildi. Endilikda ushbu vositalar maktablardagi kutubxonalar faoliyatini yanada takomillashtirishda muhim ahamiyat kasb etadi.
Amudaryo tumanida ham umumtaʼlim maktablaridagi kutubxonalar xodimlari ishtirokida mazkur “bibtexnika” vositalarini amaliy qoʻllash boʻyicha tushunchalar berishga qaratilgan oʻquv seminar boʻlib oʻtdi.
10-fevral kuni Qipchoq ovulidagi 11-sonli maktabda boʻlib oʻtgan ushbu seminarda tumandagi 32-, 33-, 28-, 42-, 47-, 18-, 75-, 39-, 65-, 61, 74- va 29-sonli maktablarning kutubxona mudiralari va kutubxonachilari ishtirok etishdi. Oʻquv seminarni 11-sonli maktabning kutubxona mudirasi Mehribon Yoʻldosheva hamda kutubxonachisi Raʼno Yeshmurodovalar olib borishdi.
Umumtaʼlim maktablaridagi kutubxonalar faoliyatini yanada rivojlantirish, kutubxonachilarning kasbiy mahoratini oshirish va kitobxonlarga sifatli kutubxona xizmatini koʻrsatishni yoʻlga qoʻyish kabi maqsadlar koʻzlangan seminar davomida mazkur vositalar yordamida endilikda maktab kutubxonalari faoliyati yanada takomillashtirilishi, moddiy-texnika bazasi mustahkamlab borilishi toʻgʻrisida soʻz yuritildi.
Kutubxonachilar ham shu paytga qadar ish yurituvi uchun zarur boʻlgan hujjatlarni oʻz imkoniyatlaridan kelib chiqqan holda tayyorlab kelishgani, kitobxonlarga sifatli xizmat koʻrsatish, soha xodimlari faoliyatini samarali yuritishda “bibtexnika” vositalarining oʻrni kattaligini eʼtirof etib oʻtishdi.
Taʼkidlab oʻtilganidek, “bibtexnika” jamlanmasida jamlanma kitobi, inventar kitobi, kundalik daftari, kitobxon formulyari, “choʻntakcha”, alifboli kartochka, qaytaruv varaqasi hamda toʻplam gʻilofi singari kutubxonalar uchun zarur vositalar oʻrin olgan. Shu paytgacha kutubxonachilarimiz bunday vositalarni oʻzlari yasab yoki taʼlim muassasalari imkoniyatidan kelib chiqib, tayyorlab kelishgan. Endi esa respublikamiz boʻyicha barcha taʼlim muassasalarida kutubxonalar ishini tashkil etish va yuritishda bir xil talab va standart yoʻlga qoʻyilmoqda. Bu, albatta, kutubxonalar ish samaradorligini oshirishga xizmat qiladi.
Seminarda yoshlar qalbida kitobga mehr uygʻotish, kitobxonlar safini oshirish masalalariga ham toʻxtalib oʻtildi. Shuningdek, Maktabgacha va maktab taʼlimi vazirligi tomonidan umumtaʼlim maktablari kitob fondini koʻpaytirish, yangi oʻquv va badiiy adabiyotlar bilan boyitishga qaratilgan keng koʻlamli ishlar olib borilayotganligi, ushbu kitoblar oʻquvchi-yoshlarning dunyoqarashni kengaytirish, bilimlarini yanada oshirishda muhim ahamiyat kasb etishi xususida fikrlar bildirildi.
Oʻquvchi-yoshlar qalbida yuksak maʼnaviyatni shakllantirishda kitob va kitobxonlikning ahamiyati beqiyosdir. Shu bois yurtimizda yoshlarning kitobxonlik madaniyatini oshirish borasida keng turdagi islohotlar amalga oshirilmoqda. Binobarin, kelajak avlodning kamoloti, ilm olishi, bilimli boʻlishi bir jihatdan ularning kitobxonligi bilan ham belgilanadi. Kitob asrlarni-asrlarga, zamonlarni-zamonlarga, rishtalarni-rishtalarga ulovchi vosita. Shuning uchun har bir yoshda kitob oʻqish, axborot olish madaniyatini yanada rivojlantirish juda katta ahamiyat kasb etadi.
Maktab kutubxonalari faoliyatini takomillashtirishga bagʻishlangan mazkur seminarda ana shunday fikr-mulohazalar bildirildi va “bibtexnika” vositalaridan foydalanish boʻyicha kutubxonachilarga zarur tavsiyalar berildi.

O.Xudoyberganova.