HARBIYLAR VA YoShLAR IShTIROKIDA DAVRA SUHBATI TAShKIL ETILDI

Qilichboy ovulida Davlat xavfsizlik xizmati chegara qoʻshinlariga qarashli harbiy qismlarda faoliyat olib borayotgan bir guruh harbiy xizmatchilar va maktab oʻquvchilari ishtirokida “Armiya va xalq yakdil” shiori ostida harbiy-vatanparvarlik tadbiri oʻtkazildi.

26-yanvar kuni ovuldagi Madaniyat markazida davra suhbati tarzida oʻtkazilgan ushbu tadbirning asosiy maqsadi oʻsib kelayotgan yoshlarni komil inson sifatida voyaga yetkazish, ularda ona Vatanga sadoqat va muhabbat hissini shakllantirish, Milliy armiyamizga va qurolli kuchlar sohasiga qiziqishini yanada orttirishga qaratildi.

Soʻzga chiqqan harbiylar suhbat davomida mamlakatimiz yoshlari uchun armiya jasorat, matonat va haqiqiy qahramonlik maktabiga aylanib borayotgani alohida taʼkidlandi. Shuningdek, yoshlarga Oʻzbekiston Qurolli Kuchlarida soʻnggi yillarda olib borilayotgan islohotlar va ularning samaralari, Davlat xavfsizlik xizmati chegara qoʻshinlariga qarashli “Yosh chegarachi” akademik-litseyi haqida batafsil maʼlumotlar berishdi. Ushbu bilim dargohiga qabul qilish tartibi, oʻqish jarayoni va oʻquvchilarga yaratilgan imkoniyatlar, bitiruvchilarga beriladigan imtiyozlar haqida toʻxtalib oʻtishdi. Vatan himoyasi muqaddas va sharafli burch, armiya va yoshlar hamisha birdam, yoshlar Vatan tinchligi va osoyishtaligi uchun masʼul ekanligi xususida soʻz yuritishdi.

Taʼkidlanganidek, bugungi kunda yoshlarimizda yot gʻoyalarga qarshi mafkuraviy immunitetni shakllantirish, ona yurt taqdiri uchun masʼuliyat tuygʻusini mustahkamlash, ularni oʻz kasbiga sadoqatli va har tomonlama yetuk kadrlar etib tarbiyalash boʻyicha aniq chora-tadbirlar koʻrib chiqilgan. Shu bois taʼlim muassasalari, mehnat jamoalari va mahallalarda yosh avlod vakillari bilan harbiy-vatanparvarlik yoʻnalishidagi tadbirlar tizimli olib borilmoqda.

Davra suhbati davomida internet nashrlari va ijtimoiy tarmoqlardan toʻgʻri foydalanish, qimor oʻyinlari va tavakkalchilikka asoslangan boshqa oʻyinlarning yomon oqibatlari yuzasidan ham maʼruzalar tinglandi. Shuningdek, yosh avlodni ezgu qadriyatlarimizga hurmat ruhida tarbiyalash, ajdodlarimizning boy maʼnaviy merosini asrab-avaylash har bir fuqaroning asosiy burchiga aylanishi zarurligi alohida taʼkidlandi.

Tadbirda harbiy xizmatchilar davlat tomonidan ularning oila aʼzolariga yaratib berilayotgan shart-sharoitlar haqida keng toʻxtalib, ijtimoiy qoʻllab-quvvatlash maqsadida mamlakatimizda ishlab chiqarilgan yengil avtotransport vositalarini sotib olish uchun imtiyozli kreditlar berilayotgani, Qurolli kuchlar tarkibiga kiruvchi vazirlik va idoralarning xizmatdagi ofitserlari, shartnoma boʻyicha xizmat qilayotgan serjantlar va oddiy askarlar tarkibi farzandlari uchun respublika oliy taʼlim muassasalari hamda harbiy oliy taʼlim muassasalariga kirish uchun qoʻshimcha qabul kvotalari ajratilayotgani xususida ham maʼlumotlar berib oʻtishdi.

Suhbat jarayonida yoshlar oʻrtasida interaktiv soʻrovnomalar oʻtkazilib, harbiy sohada xizmat qilishga nafaqat yigitlar, balki koʻplab qizlarning ishiyoqi baland ekanligi aniqlandi. Kelajakda ushbu kasb egasi boʻlish istagini bildirgan barcha yoshlarga mutaxassislar tomonidan koʻrsatmalar berildi. Qizgʻin suhbatlarga boy boʻlgan tadbirda yoshlar oʻzlarini qiziqtirgan barcha savollarga yetarli javoblar olishdi.

“Armiya va xalq yakdil” shiori ostida boʻlib oʻtgan ushbu harbiy-vatanparvarlik tadbiri davomida yoshlarda ona Vatanga muhabbat va harbiy sohaga qiziqishi yanada ortdi.

Ozoda Xudoyberganova.