FAROVON MAHALLASI YoShLAR YeTAKChISI DOIM YoShLAR ORASIDA

Tumanning Farovon mahallasida turli yoʻnalishlardagi tadbirkorlik sohalarida muvaffaqiyatlarga erishayotgan, oʻzini-oʻzi band qilish tamoyili asosida yakka tadbirkorlik, kasanachilik, hunarmandchilik bilan shugʻullanib, doimiy  daromad manbaiga ega boʻlganlar talaygina. 14 yoshdan 30 yoshgacha boʻlgan 823 nafar yoshlardan 364 nafarining doimiy ish bilan bandligi taʼminlangan boʻlib, ularning oʻz faoliyatlarini hech qanday toʻsiqlarsiz amalga oshirishlari uchun mahalla yetakchisi Shohruh Roʻzmetov doimo masʼul, yaqin koʻmakdosh.

Shohruh Roʻzmetovning ish kunlari deyarli har kuni mahalla yoshlari hayotidagi muammolarni hal etishga qaratilgan saʼy-harakatlar bilan oʻtadi.

Xususan, “Yoshlar daftari” roʻyxatiga kiritilgan 63 nafar yoshlarning muammolarini joyiga chiqqan holda oʻrganish, ularni oʻzlari qiziqqan yoʻnalishlar boʻyicha kasbga oʻqitish, kam taʼminlangan oilalarning farzandlari boʻlgan yoshlarning oʻqishi, kasb-korli boʻlishiga koʻmaklashish  maqsadida mahalladagi hokim yordamchisi Muqaddas Beknazarova hamda MFY raisi Madamin Kazakov bilan doimiy hamkorlikda, bamaslahat ish olib boradi. Ana shunday hamkorlikning natijasi oʻlaroq, 2023-yil davomida 1 nafar yoshning haydovchilik oʻquv markazida oʻqib, haydovchilik guvohnomasi olishi uchun sharoit yaratildi va unga BHMning 4 baravari miqdorida subsidiya ajratildi. Ijtimoiy yordamga muhtoj oilaning farzandi boʻlgan yana 1 nafar yoshning safarbarlik chaqiruv rezervi badali toʻliq qoplab berildi.

Mahalla yetakchisi nafaqat “Yoshlar daftari”, balki “Ayollar daftari” roʻyxatidagi fuqarolar turmush tarziga ham alohida eʼtibor qaratadi. Chunki ayol-qizlar bekorga bu daftarga kiritilmasligini yetakchi yaxshi biladi. Balki ularning nogironligi boʻlgan farzandlari bordir, balki oʻgʻil-qizlarini OTMlarda oʻqitishda qiynalayotgandir. Nima boʻlganda ham “Ayollar daftari” roʻyxatidagi mahalla ayollari hayotiga doir muammolarga yoshlar yetakchisi eʼtibor qaratishi shart.

Shohruh Roʻzmetov bu borada mahalla xotin-qizlar faoli bilan bamaslahat ish yuritadi. Hamkorlik natijasida  “Ayollar daftari” roʻyxatida turgan, kam taʼminlangan oilalar farzandlari boʻlgan 11 nafar yoshlarning OTMlardagi oʻqishi uchun shartnoma mablagʻining 30 foizi toʻlab berildi. 1 nafar yoshning salomatligini tiklashi uchun davolanish xarajatlariga subsidiya ajratildi. Bundan tashqari, dehqonchilik qilish istagida boʻlgan 1 nafar ishsiz yoshga 10 yillik muddat bilan 0,5 gektar yer ajratilishiga koʻmaklashdi. Ijtimoiy himoyaga muhtoj 8 nafar yoshlar doimiy ishga joylashtirilib, “Yoshlar daftari” roʻyxatidan chiqarildi.

Mahalla yoshlar yetakchisining faoliyat koʻlami, kundalik ish rejalari bu bilan cheklanmaydi. Mahalla yoshlarining boʻsh vaqtlarini mazmunli oʻtkazish, hududdagi taʼlim-tarbiya muassasalari bilan hamkorlikda turli sport musobaqalarini tashkil etish, oʻquvchi-yoshlarning uzrli sabablarsiz dars qoldirishlari, mahalla hududida huquqbuzarliklar sodir etilishining oldini olishga qaratilgan nazorat tadbirlarini oʻtkazish kabi ishlar uning doimiy diqqat markazida. Hududiy profilaktika inspektori va inspektor-psixologlari, taʼlim-tarbiya muassasalarining amaliyotchi-psixologlari hamda ota-onalar  bilan oʻzaro hamkorlikda muntazam ravishda oʻtkazilib kelinayotgan “Xavfsiz tun”, “Tigʻ”, “Davomat” hamda “Biz ommaviy madaniyat unsurlariga qarshimiz!” mavzularidagi profilaktik-nazorat tadbirlari  oʻzining ijobiy samaralarini bermoqda. Shu bois, mahalla yoshlari, oʻquvchi-yoshlar orasida huquqbuzarlikka moyillik holatlari yoʻq hisobi.

Shunday boʻlsa-da, 27 nafar tarbiyasi ogʻir yoshlar bilan alohida profilaktik suhbatlar olib borish, ularning qiziqishlarini inobatga olgan holda ish yuritishga alohida eʼtibor qaratiladi. Ularni sogʻlom hayotga qaytarish maqsadida ushbu yoshlar uchun masʼul qilib biriktirilgan tashkilotlar masʼullari bilan hamkorlikda barchasining muammolari tizimli ravishda oʻrganilib, aniqlangan kamchiliklarni bartaraf etish choralari koʻrilmoqda. Xususan, ularni nazoratsiz qoldirmaslik maqsadida turli sport toʻgaraklariga  jalb etish, kitobxonlikka qiziqtirish borasida amaliy choralar koʻrilayotgani oʻzining ijobiy samarasini bermoqda.

Ayni paytda Shohruh Roʻzmetovning mahalla yoshlari hayotiga oid rejaviy ishlari ancha tigʻiz pallaga kirgan. Sababi, hademay bahor keladi. Yana bir-ikki haftadan soʻng, koʻklamga tayyorgarlik, obodonlashtirish tadbirlari boshlanib ketadi. Farovon mahallasi yoshlari esa bu kabi tadbirlarga ertadan kirishishadi. Mahalla hududini koʻkalamzor goʻshaga aylantirish maqsadida barcha koʻchalar boʻylaridagi ariqlarni tozalash, uy-hovlilarning fasad qismlarini obodonlashtirish ishlarini hamjihatlik bilan amalga oshirishga allaqachon kirishib ketishgan.

– Koʻchat ekish mavsumini hech qiyinchiliksiz oʻtkazish uchun bu juda muhim, – deydi Shohruh Roʻzmetov. – Qolaversa, ahillikda qilingan ish koʻngillarga zavq bagʻishlaydi.

Robiya YOʻLDOShEVA .