BARAKA URUGʻI QADALDI

27-mart kuni tumanimiz qishloq xoʻjaligi xodimlari, rahbarlari va mutaxassislari, dehqonlar, ilgʻor fermerlar, qishloq xoʻjaligiga xizmat qiluvchi korxona va tashkilotlar rahbarlari, soha mutaxassislar ishtirokida chigit ekish boʻyicha koʻrgazmali seminar-kengash boʻlib oʻtdi.

Koʻrgazmali seminar-kengash Choykul ovuli hududida joylashgan "Nurillayev Bunyodbek” fermer xoʻjaligida tashkil qilindi. Unda Qoraqalpogʻiston Respublikasi Joʻqorgʻi Kengesi Raisi M.Yerniyazov ishtirok etdi.

Seminar-kengash davomida mavsumda qatnashadigan qishloq xoʻjalik texnikalari va ulardan samarali foydalanish boʻyicha mutaxassislar tomonidan tushuntirish ishlari olib borildi. Soʻngra paxta maydonida chigit ekish amaliyoti namoyish etildi.

Bu yil tumanimiz paxtakorlari 15950 gektar yerga chigit ekishni rejalashtirmoqda. Faoliyat koʻrsatayotgan 17 ta muqobil mashina traktor parklari va 260 ta fermer xoʻjaliklari chigit ekish mavsumiga har tomonlama puxta hozirlik koʻrdilar. Yerlarning shoʻri yuvilib, texnikalar mavsumga shay qilindi, urugʻlik chigitlar tegishli shoxobchalarga keltirilib, ekishga tayyor qilindi.

Mazkur xoʻjaliklardagi mavjud 43 dona yuqori unumli, 82 dona oddiy surim traktorlari, 385 ta chopiq va 180 ta transport traktorlari, 65 dona pluglar, 60 ta chizel, 293 dona mola va 1700 dona boronalar hamda 211 ta chigit ekish agregatlarini oʻzida jamlagan 60 ta otryad chigit ekish davrida kecha kunduz dala boshida boʻlib, ishning unumini taʼminlaydi.

Oʻz tarkibiga tajribali va malakali qishloq xoʻjalik mutaxassislarini biriktirgan 33 ta sifat guruhlari yerlarning ekishga sifatli tayyorlanishi va sifatli ekilishiga masʼul qilib biriktirildi. Ularga oqar suv va yonilgʻi-moylash materiallari sarfini kamaytirish uchun bu yilgi sharoitda qayta ekishga yoʻl qoʻymay, chigit ekish mavsumini juda qisqa muddatda tamomlash topshirigʻi berildi.

Joriy yil qish oylarida ob-havo koʻp yillik oʻrtacha haroratga nisbatan sovuq, seryogʻin kelganligi bois ekin maydonlari tuprogʻining namlanish darajasi ham nisbatan yuqori boʻlishi kuzatilmoqda. Bunday sharoitda chigit ekish mavsumini qisqa muddatda uyushqoqlik bilan oʻtkazish katta samara beradi. Buni yaxshi tushungan tumanimiz dehqonlari yerlarni chigit ekishga tayyorlash, mavjud texnikalarni, shu jumladan ekish agregatlarini rostlash, chigitni ekishga sifatli qilib tayyorlash ishlarini samarali amalga oshirmoqdalar.

Bu yil 6905 gektar maydonga qoʻshqator usulda chigit ekiladi. Tajribalardan koʻrinadiki, chigitni qoʻshqator usulda ekishning afzalligi koʻp. Shuning bilan birga qoʻshqator usulda ekilgan gʻoʻzani parvarishlashning oʻziga xos jihatlari ham bor. Masalan, qoʻsh qatorlab chigit ekish uchun ball boniteti 40-50 balldan yuqori boʻlmagan tekis, mexanik tarkibi yengil va oʻrta tuproqli, begona oʻtlar keng tarqalmagan maydonlar ajratilishi kerak, bu usulda koʻchatlar soni odatdagi bir qatorlab ekishga nisbatan tuproq unumdorligini hisobga olgan holda 20-30 foizgacha, yengil va qumoq tuproqlarda 30-40 foizgacha koʻp qoldiriladi,. Natijada koʻsaklar tez yetilib, 8-10 kun erta ochiladi va hosilni 10-15-oktyabrgacha toʻliq terib olish imkoni yaratiladi. Bu yil 7850 gektar maydonga gʻoʻzaning "S-4727”, 7 ming gektar maydonga "Sulton”, 1100 gektar maydonga boshqa yangi navlar ekiladi. Ekish mavsumi davomida 29 ta koʻchma ustaxonalar texnik xizmat koʻrsatadi va 16 ta chigit tarqatish shoxobchalari uzluksiz ish olib boradi.

Muhimi, chigit ekishni qulay ob-havo sharoitida yerdan nam ketmasdan, tobida, sifatli yakunlagan dehqonning urugʻi bexato unib chiqishi tayin. Shunda hosil moʻl, daromad koʻp boʻladi. Bugun tumanimiz paxtakorlari mamlakatimizning ulkan oq oltin xirmoniga oʻzlarining munosib hissalarini qoʻshish umidi bilan yerga baraka urugʻini qadamoqdalar. Shunday qilib, tumanimiz xoʻjaliklarida chigit ekish mavsumi boshlandi.

Gʻ.YeShNIYoZOV.

M.ShOMURODOV olgan suratlar.