BANDLIK – DOIMIY DAROMADGA EGA BOʻLISh DEMAKDIR

Soʻnggi yillarda mamlakatimizda ish bilan band boʻlmagan aholi, shu jumladan, xotin-qizlarning va yoshlarning bandligini taʼminlash, ijtimoiy himoyaga muhtoj, turmush sharoiti ogʻir, kasb-hunarga ega boʻlmagan, huquqiy va maʼnaviy qoʻllab-quvvatlashga muhtoj fuqarolarga davlatimiz tomonidan manzilli koʻmak berish boʻyicha tizimli ishlar amalga oshirilmoqda.

Tuman Kambagʻallikni qisqartirish va bandlikka koʻmaklashish boʻlimi tomonidan aholi turmushi  sifatini oshirish borasida ehtiyojmand oilalar manzilli qoʻllab-quvvatlanib, ish bilan band boʻlmagan, ishlash istagida boʻlgan ayol-qizlar, yoshlarning bandligini taʼminlanib, doimiy daromadga ega boʻlishlari uchun yil davomida 7-marta mehnat yarmarkalari oʻtkazildi. Unda tumandagi 261ta korxona va tashkilotlar oʻzlaridagi mavjud 825ta boʻsh ish oʻrinlari bilan qatnashdilar. Yarmarkalarga 493 nafar fuqarolar jalb etildi. Ularning 208 nafari doimiy ishga joylashish uchun yoʻllanma olishdi, 228 nafari ishga joylashdi.

Shu yilning 18-dekabr holatiga tuman boʻyicha 3793 nafar fuqarolar boʻsh ish oʻrinlariga joylashtirildi. 86 nafar fuqaro kvota ish oʻrinlariga ishga qabul qilindi, 581 nafar fuqaro haq toʻlanadigan jamoat ishlariga jalb qilindi va 20 nafar fuqaroga ishsizlik nafaqasi tayinlanib, toʻlandi. Stipendiyali kasb-hunarga 40 nafar fuqarolar oʻqitildi, kunlik mehnat markazi orqali esa 559 nafar fuqaro kunlik ishlarga jalb qilindi.

Mamlakatimizda nogironligi boʻlgan shaxslarga ham teng imkoniyatlar yaratish, ularning hayot sifatini oshirish, iqtidoriga koʻra ish bilan mashgʻul qilib, ijtimoiy faolligini yuksaltirishga ham alohida eʼtibor qaratilayapti. Joriy yilning shu davrigacha 151 nafar  imkoniyati cheklangan fuqarolarning bandligi taʼminlandi va boʻsh ish oʻrinlariga ishga joylashtirildi. Milliy  dasturga asosan esa 31 nafar imkoniyati cheklangan fuqarolar jamoat ishlariga jalb qilindi, 7 nafari korxona-tashkilotlarga ishga joylashtirilib, nogironlarni ishga qabul qilganligi uchun korxona-tashkilotlarga subsidiyalar ajratib berildi.

Shuningdek, yangi ish oʻrinlari yaratish dasturi doirasida 2023-yilda aholini doimiy, mavsumiy va vaqtinchalik band qilish uchun 23 553ta ish oʻrin yaratish reja qilingan edi. Mazkur ish oʻrinlari investitsiyalarni jalb qilish, mahalliy sanoatni rivojlantirish, xizmat koʻrsatish va tadbirkorlikni rivojlantirish, qishloq xoʻjaligi, qurilish va kommunal xizmat koʻrsatish sohalarida yaratilishi belgilangan edi. Oʻtgan 11 oy ichida faoliyatni legallashtirish (qonuniy asosda qayta tashkil  etish) hisobiga 3221ta, shuningdek, 6790ta doimiy, 18090ta mavsumiy va vaqtinchalik, jami 28111ta ish oʻrni yaratildi. Shu kungacha 272 nafar ishsiz, ishlash istagidagi fuqarolar kasbga tayyorlash va qayta tayyorlash kurslarida oʻqitilib, 57 nafari ishga joylashtirildi, 215 nafari oʻzini oʻzi band qildi.

Tuman Kambagʻallikni qisqartirish va bandlikka koʻmaklashish boʻlimi tumanimiz aholisining turmushi sifatini oshirish, farovon yashashiga erishish borasida xizmat koʻrsatib, yurtimizda inson  shaʼni, qadr-qimmati yuksak tutilayotganini amalda ifoda etib kelmoqda.

Rashid SALAYeV,

tuman Kambagʻallikni qisqartirish va

aholi bandligiga koʻmaklashish boʻlimi boshligʻi.