VATANPARVARLIK OYLIGI DOIRASIDA TADBIRLAR DAVOM ETMOQDA

Oʻzbekiston Respublikasi Prezidentining 2023-yil 14-dekabr kungi Farmoyishiga asosan 2023-yil 25-dekabr kuni Amudaryo tumani Mudofaa ishlari boʻlimi tomonidan Oʻzbekiston Qurolli Kuchlari tashkil etilganligining 32 yilligi, Vatan himoyachilari kuni bayrami hamda Vatanparvarlik oyligi munosabati bilan turli tadbirlar oʻtkazilmoqda.

Vatanparvarlik oyligi doirasidagi navbatdagi tadbir Amudaryo tumani Madaniyat boʻlimi binosida oʻtkazildi. Maʼlumki, mamlakatimiz boʻylab 2023-yil 15-dekabrdan 2024-yil 15-yanvargacha Vatanparvarlik oyligi oʻtkazilmoqda. Oylik doirasida yoshlarni harbiy-vatanparvarlik ruhida tarbiyalash, ularni Vatan himoyasidek sharafli kasbga yoʻnaltirish maqsadida Jaloliddin Manguberdi nomidagi harbiy akademik litseyi rahbariyati bilan hamkorlikda oʻtkazilgan ushbu tadbirdan koʻzlangan maqsal harbiy akademik litsey faoliyatini keng jamoatchilikka tanishtirish va 9-sinf bitiruvchilaridan iqtidorli oʻquvchilarni oʻqishga taklif qilishdan iborat boʻldi.

Mazkur targʻibot tadbiri davomida Jaloliddin Manguberdi harbiy akademik litseyi oʻqituvchilari Sherzod Roʻzmetov hamda Shaxzod Jumaniyozovlar seminar-trening oʻtkazishdi. Unda Amudaryo tumani Mudofaa ishlari boʻlimi boshligʻi, podpolkovnik Sherzod Murodov, Mudofaa ishlari boʻlimi boshligʻining tarbiyaviy va mafkuraviy ishlar boʻyicha oʻrinbosari, Qurolli Kuchlar xizmatchisi Zokir Saʼdullayev, Oʻzbekiston Respublikasi "Veteran" jangchi-faxriy va nogironlari birlashmasi Qoraqalpogʻiston Respublikasi baynalmilal jangchilari Amudaryo tumanidagi vakili Bahodir Jumaniyozov va faxriy jangchilar, umumtaʼlim maktablarining chaqiriqqacha boʻlgan tayyorgarlik fani oʻqituvchilari va 9-sinf oʻquvchilari ishtirok etdilar.

Tumandagi umumtaʼlim maktablarining 9-sinf oʻquvchilari Jaloliddin Manguberdi nomidagi harbiy akademik litseyning amaliy va nazariy oʻquv mashgʻulotlari, mazkur litsey bitiruvchilarining Oliy Harbiy bilim yurtlariga oʻqishga kirishda qanday imtiyozlarga ega boʻlishlari, shuningdek, harbiy akademik litsey kursantlariga qoʻyiladigan asosiy talablar boʻyicha savollar bilan murojaat qildilar.

Aytish joizki, mazkur litseyning asosiy vazifasi oʻquvchilarda xalqimizning maʼnaviy-maʼrifiy qadriyatlariga, madaniyati va urf-odatlariga chuqur hurmatni, ularda halollik, vijdoniylik, vatanparvarlik, sadoqat, fidokorlik singari insoniy fazilatlarni shakllantirish hisoblanadi.

Shuningdek, oʻquvchilarda keng dunyoqarash, intellektual salohiyat, ijodiy hamda tahliliy fikrlashni rivojlantirish, tabiiy va aniq fanlar, xorijiy tillar va zamonaviy axborot texnologiyalari boʻyicha mustahkam bilimlarni shakllantirish, shuningdek, ularga harbiy ishdagi boshlangʻich bilimlarni singdirish, Qurolli Kuchlar va davlat xizmati uchun kadrlar zaxirasini shakllantirish maqsadida respublikaning oliy, oliy harbiy va harbiylashtirilgan taʼlim muassasalariga oʻqishga kirishi uchun munosib nomzodlarni tayyorlash ham litseyning vazifalari sirasiga kiradi.

Litsey oʻrta maxsus taʼlim muassasasi hisoblanadi, litseyga qabul va oʻquv jarayoni 2023/2024 oʻquv yilidan boshlangan. Litseyda oʻquv jarayoni davomiyligi ikki yil boʻlib, yillik qabul kvotasi 150 nafarni tashkil etadi.

Targʻibot seminar-trening davomida masʼullar ishtirokchilarning barcha savollariga javob berdilar. Tadbir soʻngida videorolik namoyish etildi.

Robiya YOʻLDOShEVA.