Hokim va yoshlar uchrashuvi boʻlib oʻtdi

Bugungi kun yoshlari har tomonlama salohiyatga va iqtidorga ega ekanliklarini barcha jabhalardagi yutuqlari bilan amalda isbotlamoqdalar. Turli soha va yoʻnalishlarda yutuqlarni qoʻlga kiritayotgan oʻgʻil-qizlarning muvafaqqiyati soʻzimizga yaqqol isbot boʻla oladi.

Ammo, yaratilayotgan imkoniyatlar va sharoitlarga qaramasdan turli muammo va toʻsiqlarga duch kelayotgan, oʻz qiziqishi boʻyicha kasb yoki hunar egallasa-da, iqtidorini namoyon qila olmayotgan yoshlar soni ham kam emas. Ana shunday yoshlarni qoʻllab-quvvatlash masalasi esa Amudaryo tumanining turli hududlarida jadval asosida oʻtkazilayotgan hokim va yoshlar uchrashuvlari orqali hal qilinmoqda.

21-dekabr kuni tuman Madaniyat boʻlimi tomoshalar zalida navbatdagi hokim va yoshlar uchrashuvi boʻlib oʻtdi.

Ochiq muloqoqt tarzida oʻtkazilgan uchrashuvda tuman hokimi Sobir Xoʻjametov, sektorlar rahbarlari, Mudofaa ishlari boʻlimi boshligʻi Sherzod Murodov, Yoshlar ishlari agentligi tuman boʻlimi boshligʻi Sardor Ismoilov, mutasaddi tashkilotlar rahbarlari, tuman, respublika miqyosida gʻoliblikni qoʻlga kiritgan sportchi yoshlar, koʻplab natijalarga erishgan maktab oʻquvchilari, ovul va mahallalardagi yoshlar yetakchilari hamda faol yoshlar ishtirok etdilar.

Uchrashuv avvalida tuman hokimi Sobir Xoʻjametov ovul va mahallalardagi ishsiz yoshlarga oʻz mehnat faoliyatlarini boshlashlari uchun subsidiya asosida mehnat qurollarini topshirildi.

Shundan soʻng, tuman va respublika miqyosida turli musobaqalarda gʻoliblikni qoʻlga kiritib kelayotgan sportchi yoshlar hamda koʻplab natijalarga erishgan maktab oʻquvchilariga diplom va qimmatbaholi sovgʻalar topshirildi.

Uchrashuvda tuman hokimi Sobir Xoʻjametov davlatimiz va hukumatimiz tomonidan yoshlarni qoʻllab-quvvatlash maqsadida qabul qilingan barcha qaror va farmonlar negizida Vatan kelajagini oʻz taqdirida koʻruvchi fidoiy yoshlarni tarbiyalab, voyaga yetkazishdek ezgu maqsadlar majassam ekanini taʼkidladi.

Qayd etilganidek, bugun mamlakatimizda yoshlarni har jihatdan barkamol qilib tarbiyalash, ularning salomatligini mustahkamlash, qobiliyatlarini roʻyobga chiqarish va bandligini taʼminlashga koʻmaklashish, boʻsh vaqtini mazmunli oʻtkazish, barcha sohalarda olib borilayotgan islohotlar jarayonidagi ishtirokini kengaytirish masalasiga davlat siyosati darajasida eʼtibor qaratilmoqda.

Ayniqsa, yuksak maʼnaviyatli, mustaqil fikrlovchi, qatʼiy hayotiy pozitsiyasi, keng dunyoqarash va chuqur bilimlarga ega boʻlgan vatanparvar yoshlarni tarbiyalash, ularda turli mafkuraviy tahdidlarga qarshi immunitetni shakllantirish, sportga jalb qilish orqali ular orasida sogʻlom turmush tarzini targʻib qilish borasida hayotga tatbiq etilayotgan islohotlar oʻz samarasini bermoqda.

Uchrashuvda Yoshlar ishlari agentligi tuman boʻlimi boshligʻi Sardor Ismoilov Vatan kelajagi faqat yoshlar qoʻlida ekanligi, ularni har tomonlama qoʻllab-quvvatlash, muammolarini hal qilish uchun tumanimizdagi barcha tashkilotlar rahbarlari masʼul ekanligini aytib oʻtdi.

Shundan soʻng yoshlar va ularning ota-onalari tuman hokimiga oʻz muammo va takliflari bilan murojaat qildilar. Uchrashuvda yoshlar tomonidan turli mazmundagi murojaatlar kelib tushdi. Xususan, oliy taʼlim muassasalarida toʻlov-kontrakt asosida oʻqiyotgan talabalardan kontrakt toʻlovini toʻlashga yordam berish, subsidiya asosida mehnat qurollarini olish, bandlik hamda oʻz tadbirkorlik faoliyatini yoʻlga qoʻyish uchun imtiyozli kredit olish kabi masalalarda murojaatlar kelib tushdi.

 Joyida hal qilish imkoni boʻlgan murojaatlar, taklif va tashabbuslar yuzasidan yoshlarning talablari qanoatlantirildi. Atroflicha oʻrganishni taqozo etadigan dolzarb masalalarni hal etish yuzasidan Yoshlar ishlari agentligi tuman boʻlimi hamda aloqador muassasa-tashkilot, idoralar rahbarlariga muddatlar belgilanib, topshiriqlar berildi. Murojaat va savollar barobarida uchrashuvda ishtirok etgan yoshlar tuman hokimiga oʻz takliflarini ham berishdi.

Uchrashuv soʻngida tumanimizdagi fayzli “Sher” toʻyxonasida yoshlar uchun dasturxon yozilib, tuman Madaniyat boʻlimi tomonidan kontsert dasturi namoyish etildi.

Tuman hokimligi Axborot xizmati