Is gazidan zaharlanishning oldini olish boʻyicha profilaktik tadbirlar oʻtkazilmoqda

Qoraqalpogʻiston Respublikasi Vazirlar Kengashining 2023-yil 19-sentyabr kungi hamda Amudaryo tumani hokimining 2023-yil 22-sentyabr kungi yigʻilish bayonlariga muvofiq tuman hududida kuz-qish mavsumini betalofat oʻtkazish boʻyicha profilaktik tadbirlar oʻtkazilmoqda.

Navbatdagi shu kabi tadbirda Oʻzbekiston Respublikasi Favqulodda vaziyatlar vazirligi, Qoraqalpogʻiston Respublikasi Favqulodda vaziyatlar boshqarmasi  va tuman Favqulodda vaziyatlar boʻlimi mutasaddilari hamda fuqarolar yigʻinlari masʼullari ishtirok etdilar. Mutasaddilar tumanimiz ovul va mahallalarida istiqomat qiluvchi aholi xonadonlarida ayni qishning sovuq kunlarida tabiiy gazda va elektr energiyasida ishlovchi isitish vositalaridan qay tarzda foydalanilayotganini koʻzdan kechirdilar.

Tuman Favqulodda vaziyatlar boʻlimi binosi oldida oʻtkazilgan saf koʻrigi davomida soha masʼullariga profilaktik koʻriklardan koʻzlangan maqsad, koʻriklarni amalga oshirish tartibi va zarur hollarda koʻrilishi lozim boʻlgan choralar haqida maʼlumotlar berildi.

Tadbir davomida Oʻzbekiston Respublikasi Favqulodda vaziyatlar vazirligi boshqarma boshligʻi soʻzga chiqib, qish mavsumida havoning keskin sovib ketishi oqibatida insonlar hayoti xavfsizligini taʼminlash va is gazidan zaharlanishining oldini olish chora-tadbirlarini kuchaytirish muhim masalalardan biri ekanligini taʼkidlab oʻtdi.

Tuman hokimligida kuz-qish mavsumini talofatsiz oʻtkazish maqsadida  tashkil qilingan shtabga tashrif chogʻida shtab aʼzolari va ishchi guruh tarkibi bilan suhbatlar oʻtkazilib, zarur tushunchalar berildi.

Mutasaddilar Amudaryo tumani hokimi Sobir Xoʻjametovning qabulida ham boʻlib, tumanda qish mavsumida yuzaga kelishi mumkin boʻlgan favqulodda hodisalarning oldini olish boʻyicha koʻrilayotgan choralar haqida suhbatlashdilar.

Tumanimiz hududida kuz-qish mavsumini betafolat oʻtkazish hamda aholining is gazidan zaharlanishi kabi sodir boʻlishi mumkin boʻlgan favqulodda holatlarning oldini olish boʻyicha oʻtkazilayotgan bu kabi profilaktik tadbirlarning ahamiyati juda katta.

Bu galgi tadbir davomida ham tabiiy gazning toʻliq yonmasligi, bexosdan uzilib qolishi, xona ichida toʻplanishi, yoqib qarovsiz qoldirilishi, uskunalarni ulashda xavfsizlik qoidalariga rioya qilmaslik oqibatida portlash, yongʻin hamda tabiiy va is gazidan zaharlanish holatlari kabi favqulodda vaziyatlar yuzaga kelishi haqida masʼullar tomonidan aholiga keng tushunchalar berildi.

Shuningdek, masʼullar bunday holatlar hatto insonlarning turli xil darajadagi tan jarohati olishi yoki oʻlimi bilan yakunlanayotganligi haqida hayotiy misollar keltirdilar.

Mazkur profilaktik tadbir davomida maxsus ishchi guruh tomonidan tumanimizning Navoiy, Chordara, Boʻston va Oybek mahallalarida istiqomat qiluvchi jami 532ta aholi xonadonlari oʻrganilib chiqildi. Oʻrganishlar davomida mutasaddilar tomonidan kam taʼminlangan, ijtimoiy himoyaga muhtoj oilalarga oziq-ovqat mahsulotlari ham sovgʻa qilindi.

Tegishli masʼullarga aholi xonadonlarida aniqlangan kamchiliklarni bartaraf etish boʻyicha tegishli topshiriqlar berilib, xonadonlarni isitish maqsadida turli xil nostandart vositalardan foydalanmaslik, isitish va gaz uskunalaridan toʻgʻri foydalanish boʻyicha koʻrsatma va tavsiyalar berildi.

Profilaktik tadbirlar yakunida ijtimoiy soha obʼektlari, ayniqsa, maktab, maktabgacha taʼlim tashkilotlari va tibbiyot muassasalarida hamda aholi xonadonlarida yongʻinga qarshi profilaktika ishlarini oʻtkazish, ularning tayyorgarlik jarayonlarini yanada kuchaytirish choralarini koʻrish boʻyicha vazifalar belgilandi.

Tuman hokimligi Axborot xizmati