Qoraqalpoq tili – qoraqalpoq xalqining milliy gʻururi

Til – har bir millatning ulkan boyligi, benazir qadriyati va bebaho mulki hisoblanadi. Har bir xalq, har bir elat, oʻzi hurmat va ehtirom qiladigan tilga ega. Tilda ana shu tilning ijodkori boʻlgan xalq, elatning tarixi va madaniyati aks etadi. Ayni zamonda, til ijtimoiy taraqqiyotda ulugʻvor ahamiyat kasb etadi. Til – har bir millat oʻzligining ajralmas belgisidir.

1989-yil 1-dekabr — Qoraqalpogʻiston tarixidagi muhim sanalardan biridir. Shu kuni qoraqalpoq tiliga davlat tili maqomi berilgan. Har yili bu sana keng nishonlanib kelinadi.

Ushbu sana munosabati bilan 23-noyabr kuni Amudaryo tumanidagi 76-sonli maktab faollar zalida “Ana tilim – milliy maqtanishim» deb nomlangan tadbir boʻlib oʻtdi. Unda maktabning ustoz-murabbiylari hamda oʻquvchilari, ota-onalar ishtirok etdilar.

Tadbirni maktab direktorining maʼnaviy-maʼrifiy ishlari boʻyicha oʻrinbosari Dilfuza Yakubova ochib berdi hamda oʻquvchilarni ushbu muhim sana bilan tabrikladi.

Taʼkidlanganidek, til – bu xalqning tarixini, madaniy merosini, turmush tarzini, urf-odat va anʼanalarini oʻzida mujassam etgan bebaho xazinadir. Shu bois ham soʻnggi yillarda yurtimizda qoraqalpoq tilini asrab-avaylashga, uni yanada boyitishga davlat siyosati darajasida eʼtibor qaratilmoqda.

Buning misoli tariqasida qoraqalpoq tilidagi yangi darsliklar va qoʻllanmalarning, badiiy kitoblarning, monografiyalarning nashrdan chiqarilayotgani, mazkur tilni rivojlantirishga bagʻishlangan ilmiy anjumanlar va boshqa tadbirlarning tashkil etilayotgani, Ibroyim Yusupov nomidagi qoraqalpoq tili va adabiyoti fanini chuqur oʻrgatishga ixtisoslashgan ijod maktabining faoliyati yoʻlga qoʻyilganganini alohida qayd etish zarur.

Shuningdek, lotin alifbosidagi «Qoraqalpoq tilining orfografik lugʻati» chop etilgani qoraqalpoq tilini rivojlantirishga boʻlgan yuksak eʼtibor va gʻamxoʻrlik ifodasidir.

Mazkur tadbirda maktabning 5-, 6-, 7-sinflar oʻquvchilari faol qatnashdilar. Oʻquvchilar tomonidan qoraqalpoq tilida sheʼrlar ijro etildi, uni asrab-avaylash bilan bogʻliq mulohazalar bildirildi.

Tadbir davomida soʻzga chiqqan oʻqituvchilar qoraqalpoq tili necha asrlardan buyon ajdodlarimizdan bizga bezavol oʻtib kelayotgani, xalqimizning oʻzligini namoyon qilishida, Qoraqalpogʻistonning ijtimoiy-siyosiy, maʼnaviy-maʼrifiy taraqqiyotida, jamiyatning rivojlanishida muhim oʻrin egallab kelayotgani, uning bebaho meros, yurtimiz tarixini, milliy qadriyatlarimiz, urf-odat va dasturlarimizni oʻzida mujassam etgan bebaho xazina ekanligini taʼkidlab oʻtdilar.

Tadbirda yurtimizda qoraqalpoq tili va adabiyotini yanada rivojlantirishga qaratilgan eʼtibor tobora kuchayib borayotgani, qoraqalpoq adabiyoti vakillarining ijod maktablari tashkil etilishi qoraqalpoq tili va adabiyotining boy xazinasi, nafosatini yosh avlod qalbiga singdirishda muhim ahamiyat kasb etayotgani xususida soʻz yuritildi.

«Ana tilim – milliy maqtanishim» deb nomlangan tadbir barcha oʻquvchilarda katta taassurotlar qoldirdi. 5-, 8-sinflar oʻquvchilari qoraqaloq adabiyoti namunalaridan ajoyib sheʼrlar hamda kuy-qoʻshiqlar ijro qildilar. Tadbir koʻtarinki ruhda hamda bayramona tarzda oʻtdi.

Sevara Ismoilova