GRANT LOYIHASI DOIRASIDA TADBIR OʻTKAZILDI
Yurtimizda oʻsib kelayotgan yosh avlodni maʼnaviy-axloqiy, jismoniy sogʻlom qilib tarbiyalash, ularni barcha sohalarda izchillik bilan tatbiq etilayotgan islohotlarning faol ishtirokchisiga aylantirishga qaratilgan chora-tadbirlar amalga oshirilmoqda. Ular ongiga Vatanga sodiqlik va kelajagi uchun daxldorlik hissini singdirish, qalbida yot gʻoya va qarashlarning salbiy taʼsiriga nisbatan mafkuraviy immunitetni shakllantirishga hissa qoʻshish, ekstremizm va terrorizmning buzgʻunchi gʻoyalariga nisbatan murosasizlikni shakllantirish juda muhim.
Yosh avlod taʼlim-tarbiyasi maktabgacha va umumiy oʻrta taʼlim muassasalarininggina emas, keng jamoatchilik, davlat va nodavlat tashkilotlarining ham vazifasidir.
Amudaryo televideniyesi buningdek ulugʻvor maqsad ijrosiga hissa qoʻshish maqsadida Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat Fondi taʼsis etgan “Yoshlarning maʼnaviy-ruhiy va intellektual salohiyatini oshirish” yoʻnalishidagi davlat granti tanlovida “Yuksak maʼnaviyatli va axloqli yoshlar – kelajak poydevori” nomli loyihasi bilan qatnashib, gʻolib boʻlgan edi va loyihani muvaffaqiyatli amalga oshirib kelmoqda.
Shu yilning 23-noyabrida voyaga yetmaganlar oʻrtasida nazoratsizlik va huquqbuzarliklarning oldini olish, yoshlarning tungi vaqtlarda koʻngilochar maskanlarda ota-onalari yoki ularning oʻrnini bosuvchi shaxslarsiz yurishlariga, oʻquvchilarning uzrli sabablarsiz dars qoldirishlariga yoʻl qoʻymaslik borasida yaxshi natijalarga erishayotgan tumandagi ovul – mahalla fuqarolar yigʻinlari tajribasini ommalashtirish maqsadida mazkur grant loyihasi doirasida Amudaryo telekanali ijodiy jamoasi Toʻlqin ovulida boʻldi.
Mazkur ovulda uchta umumiy oʻrta taʼlim maktablari, 3ta maktabgacha taʼlim tashkilotlarida voyaga yetmaganlarga taʼlim-tarbiya berilmoqda. Ularning boʻsh vaqtlarini mazmunli tashkil etish, intellektual qobiliyatlarini rivojlantirish va davrimizga munosib boʻlib voyaga yetishlari yoʻlida taʼlim-tarbiya muassasalari fuqarolar yigʻini, profilaktika inspektori va Ichki ishlar boʻlimidagi jamoat xavfsizligi xizmati huquqbuzarliklar profilaktikasi boʻlinmasining voyaga yetmaganlar masalalari bilan shugʻullanuvchi hududiy inspektor-psixologi bilan hamkorlikda tizimli saʼy-harakatlar olib borishayapti. Natijada hududda voyaga yetmaganlar orasida huquqbuzarlik, nazoratsiz bemahal koʻngilochar joylarda yurish holatlariga yoʻl qoʻyilmadi.
Oʻquvchilarning turli ijodiy tanlovlarda, bilimlar va sport bellashuvlarida yuqori natijalarni qayd etayotgani barchani quvontiradi. Maktablar oʻquvchilari orasida “Besh tashabbus olimpiadasi”ning respublika bosqichi gʻoliblari ham bor. Bitiruvchilarning oliy taʼlim muassasalariga oʻqishga kirish koʻrsatkichlari yildan yilga oshmoqda. Erishilayotgan natijalarga qaramasdan voyaga yetmaganlar xulq-atvorini yetarli nazorat qilib, ularni qunt bilan oʻqib-oʻrganishga va salohiyatini rivojlantirishga ragʻbatlantirish juda muhim.
Bu haqda ovul fuqarolar yigʻini faollar zalida boʻlib oʻtgan yigʻilishda ham batafsil soʻz yuritildi. Unda Amudaryo telekanali ijodiy xodimlari, fuqarolar yigʻini masʼullari, profilaktika inspektori, hudud inspektor-psixologi, ovul faollari, ota-onalar, yoshlar ishtirok etdilar.
Tadbirni ovul xotin-qizlar faoli Gavhar Bobotoyeva ochdi va olib bordi.
Kun tartibidagi mavzu yuzasidan hudud inspektor psixologi Husniddin Safarboyev, 32-sonli maktab direktorining maʼnaviy-maʼrifiy ishlar boʻyicha oʻrinbosari Xudoyor Xoʻjamurodov, ovul faollaridan Gulchehra Tillayeva, Dilbar Matyoqubova, Nabijon Yusupovlar soʻzga chiqdilar. Ular yosh avlod kamoli yoʻlidagi ovulda olib borilayotgan ishlarga keng toʻxtaldilar. Shuningdek, bolalarni nazoratsiz qoldirmaslik, ularning qiziqishlariga eʼtibor berib, qoʻshimcha oʻqishlari uchun kitoblar bilan taʼminlash zarurligini taʼkidladilar.
Tadbirda bu boradagi ishlarni yana ham jonlantirish boʻyicha takliflar bildirildi.
Oygul RAJABOVA
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
