ONALAR VA BOLALAR SALOMATLIGINI TAʼMINLASh – KELAJAKKA MUSTAHKAM POYDEVOR

Mamlakatimizda aholi salomatligi, onalik va bolalikni muhofaza qilish, maʼnan yetuk, jismonan sogʻlom yosh avlodni voyaga yetkazish alohida eʼtibordagi, davlat siyosati darajasidagi masala hisoblanadi. Ayniqsa, onalar va bolalar sogʻligʻini muhofaza etishga, sogʻlom bola tugʻilishi, jismoniy va maʼnaviy barkamol avlodni voyaga yetkazishga ustuvor ahamiyat berilmoqda.

Amudaryo tumanidagi tibbiyot tizimida ham xizmatlar sifati va qulayligini yanada yaxshilash, onalar va bolalar salomatligini muhofaza qilishni kuchaytirish, sogʻlom turmush tarzini ommalashtirish borasida belgilab berilgan vazifalar izchil amalga oshirilmoqda. 

Bugungi kunda aholiga tibbiy xizmat koʻrsatilayotgan tuman Tibbiyot birlashmasining tugʻruq kompleksi 95-oʻringa moʻljallangan. Kompleksning tugʻruq boʻlimi 60-oʻrin, homiladorlar patologiyasi boʻlimi  35-oʻrindan iborat. Muassasada 5ta tugʻruq zali, 2ta operatsiya xonasi mavjud. Har bir palata 4-oʻrinli. 

Tugʻruq kompleksida ayni paytda 1 nafar boʻlim mudirasi  va navbatchi  akusher-ginekologlar, 10 nafar shifokor xizmat koʻrsatadi. Shifokorlarning 9 nafari oliy toifali, 1 nafari 1-toifali, 1 nafari 2-toifali. Shuningdek, 152 nafar oʻrta tibbiyot xodimlari, 52 nafar kichik tibbiyot xodimlari, jami 225 nafar tibbiy xodimlar onalar va chaqaloqlar salomatligiga masʼul.

Tugʻruq boʻlimida joriy yilning 10 oyi davomida qabul qilish rejasi 2740ta boʻlib, amalda 4098 nafar homilador ayollarga tibbiy xizmat koʻrsatildi. Boʻlimda  homilador, tugʻadigan va tuqqan ayollar uchun  barcha shart-sharoitlar yaratilgan.

Aholi va tugʻruqlar sonining tabiiy koʻpayayotgani yangidan zamon talablariga mos tugʻruqxona kompleksini qurish zaruratini keltirib chiqardi. Bu masala Prezidentimizga Qoraqalpogʻistonga tashrifi davomida yetkazilganidan soʻng, taklif eʼtiborga olinib, tegishli dasturga kiritildi.

Shundan soʻng, Tibbiyot birlashmasida yangi – qiymati 14,4 mlrd. soʻmga teng boʻlgan 90-oʻrinli 4 qavatli tugʻruq kompleksi zamonaviy loyihasi tasdiqlandi va qurilish ishlari boshlab yuborildi. Hozirgi vaqtda davom etayotgan qurilish ishlari “Temir beton” MChJ tomonidan  olib borilmoqda. Ushbu obʼekt uchun 14,4 mlrd. soʻm mablagʻ ajratilib, zamonaviy koʻrinishdagi bino qad rostladi. Katta hajmda olib borilgan qurilish ishlari davomida ushbu binoda barcha shart-sharoitlar yaratildi.

Endilikda yangi majmuada ayollarni tugʻruqqa tayyorlash, kutilmagan homiladorlikning oldini olish borasida malakali shifokorlar maslahatxonalari, homiladorlarni qabul qilish, alohida koʻrik, bogʻlov xonalari tashkil etiladi. Eng asosiysi, dunyoga yangi kelgan chaqaloqlarni parvarishlash, sogʻligʻini qatʼiy nazorat ostiga olish, zarur hollarda kerakli muolajalarni oʻtkazish uchun yanada yaxshi sharoitlar, imkoniyatlar yaratiladi. Shuningdek, yangi loyiha asosida qurilgan mazkur zamonaviy imoratdagi isitish va sovutish tarmoqlari ilgʻor texnologiyalar asosida takomillashtirilib, eng zamonaviy tibbiyot asbob-uskunalari bilan jihozlanadi.

Tumanimizda onalar va bolalar salomatligini muhofaza qilish, koʻrsatilayotgan perinatal xizmatlar sifati va samaradorligini oshirish borasida amalga oshirilayotgan bu kabi keng koʻlamli ishlar tibbiy xizmat sifatini yanada yaxshilashga xizmat qiladi. Onalar sogʻligiga gʻamxoʻrlik koʻrsatib kelayotgan, ertamiz egalarining sogʻlom tugʻilishiga masʼul boʻlgan tibbiyot xodimlariga kasb bayrami muborak boʻlsin!

Ozoda Xudoyberganova.