SARANJOM-SARIShTA, YaShIL MASKANGA AYLANAYoTGAN MAKTAB

Ayni kunlarda tumanimizning qaysi hududiga bormang, kuzgi koʻchat ekish, obodonlashtirish ishlariga guvoh boʻlasiz. Ayniqsa, “Yashil makon” umummilliy dasturi doirasida amalga oshirilayotgan ishlardan koʻzingiz quvonadi.

Darvoqe, koʻchat ekib, bogʻ yaratish xalqimiz uchun azaliy qadriyat. Shu bois, oilada farzand tugʻilsa, har bir yangi tugʻilgan chaqaloqqa atab mevali va manzarali daraxt koʻchatlari oʻtkaziladi. Buning oʻz ramziy maʼnosi bor, albatta. Bolada tabiatga mehr uygʻotish, oʻz bogʻi, chorbogʻini yaratishga oʻrgatish, qolaversa, unib-oʻsib, hovli-joyga koʻrk, fayz bagʻishlagan daraxt soyasi-yu mevasidan el-yurt bahra olsin, degan ezgu niyatlar mujassam bu bobomeros qadriyatda.

Kundan-kunga obod va farovon boʻlib borayotgan mahallalar, idora va tashkilotlar, umumtaʼlim muassasalari atrofida barpo etilayotgan yashil hududlar xalqimiz uchun bitmas-tuganmas musaffo havo – kislorod fabrikasidir. Musaffo havo esa sogʻlom hayot manbai, bu manbani yaratishga hissa qoʻshish har bir sogʻlom fikrli insonning zimmasidagi masʼuliyatli burchi hisoblanadi.

Amudaryo tuman Maktabgacha va maktab taʼlimi boʻlimiga qarashli 56-sonli maktab atrofi ham yil sayin obodon va koʻklamzor hududga aylanib bormoqda. Orzigul Xudoyberganova rahbarligidagi mazkur pedagogik jamoa ayni kunlarda “Yashil makon” umummilliy loyihasi doirasida maktab hududidagi dov-daraxtlarni asrab-avaylash, gul urugʻlari va sovuqqa chidamsiz gul koʻchatlarini bahorgi ekish mavsumiga tayyorlab qoʻyish, mavjud mevali va manzarali daraxtlarga kuzgi shakl va ishlov berish bilan bir qatorda muassasa hududida yangidan bogʻ yaratish ishlariga alohida eʼtibor qaratishmoqda.

Avvalo maktabning texnik xodimlari tomonidan hududdagi ariqlar xas-xashaklardan tozalanib, koʻchat oʻtqaziladigan yer qondirib sugʻorib qoʻyildi. Tuman hokimligi va Durunki MFY tomonidan yetkazib berilgan 192 tup mevali va manzarali daraxt koʻchatlari maktab bogʻboni Mansur Haytanov, texnik xodimlar Manzura Qodirova, Oltinoy Xoʻjamurodova, Manzura Kamolova, Gulmira Hayitboyeva, Mavluda Julanova, Jasur Haytanovlar tomonidan maktab bogʻiga va muassasa atrofidagi ariqlar boʻylariga sifatli qilib ekildi. Oʻtqazilgan har bir tup koʻchatning tuproqqa ildiz qoʻyib, toʻliq rivojlanib ketishini taʼminlash maqsadida maktab bogʻboni Mansur Haytanov boshchiligidagi texnik xodimlar koʻchatlarni oʻgʻitlab, suv quyib chiqdilar. Qishning sovuq va izhirinli kunlarida ekilgan koʻchatlarning ildizlari zararlanmasligi uchun tuplariga yaxshilab tuproq tortilib, zichlandi.

Ayni paytda esa maktab bogʻboni va texnik xodimlar avvalgi yillarda oʻtqazilgan daraxtlarning tuplarini oqlash, ortiqcha shox-shabbalardan tozalash, maktab bogʻidagi ekindan boʻshagan yerlardagi har xil begona oʻtlar chiqindilarini bogʻ hududidan chiqarib tashlash kabi kuzgi-qishgi yumushlarni ado etishmoqda. Muassasa atrofi esa kech kuz boʻlishiga qaramay, ozoda va sarishta. Xazonlardan tozalangan, yangi ekilgan koʻchatlar bir tekis saf tortgan, chiroyli shakl berilgan dov-darajtlar nafaqat mazkur taʼlim-tarbiya maskaniga, balki Durunki mahallasiga ham fayz bagʻishlab turibdi.

Robiya YOʻLDOShEVA.