HUQUQIY MAVZUGA BAGʻIShLANGAN SEMINAR MAShGʻULOT OʻTKAZILDI

Joriy yilning 19-oktyabr kuni Amudaryo tuman IIBning majlislar zalida Jinoyat ishlari boʻyicha Amudaryo tuman sudining raisi A.Safarov, Fuqarolik ishlari boʻyicha Amudaryo tuman sudining raisi Q.Atamuratov, Amudaryo tuman IIB boshligʻining birinchi oʻrinbosari, podpolkovnik Z.Saparbayev, Amudaryo tuman prokurorining yordamchisi S.Abdullayev, Amudaryo tuman Adliya boʻlimi boshligʻi vazifasini bajaruvchi N.Jumaniyazova, IJQKD Amudaryo tuman boʻlimi inspektori I.Sabirov, Amudaryo tuman DSI xodimi I.Ibragimov, Amudaryo tuman IIB huzuridagi tergov boʻlinmasi tergovchilari va IIB profilaktika inspektorlari, jami 52 kishi ishtirokida “Sud qarorlarining qonuniyligi, asosliligi va adolatliligini tekshirish istituti takomillashtirilishi munosabati bilan Oʻzbekiston Respublikasining Jinoyat protsessual Kodeksiga qoʻshimcha va oʻzgartirishlar kiritish toʻgʻrisida”gi 2023-yil 27-sentyabrdagi 869-sonli Oʻzbekiston Respublikasi Qonunining mazmun-mohiyatini huquqni muhofaza qilish organlari xodimlariga tushuntirish yuzasidan sayyor seminar mashgʻuloti boʻlib oʻtdi.

Seminarni, Amudaryo tuman IIB boshligʻining birinchi oʻrinbosari, podpolkovnik Z.Saparbayev ochdi va seminar kun tartibidagi masala yuzasidan qisqacha tushunchalar berdi.

Shundan soʻng, Jinoyat ishlari boʻyicha Amudaryo tuman sudining raisi A.Safarov Oʻzbekiston Respublikasi jinoyat-protsessual Kodeksiga oʻzgartirish va qoʻshimchalar kiritilayotganligi bu oʻzgartirish va qoʻshimchalarning mazmun-mohiyati haqida batafsil maʼlumot berdi.

Oʻtkazilgan sayyor seminar mashgʻulotida Amudaryo tuman IIB boshligʻining birinchi oʻrinbosari, podpolkovnik Z.Saparbayev va masʼullar tomonidan seminar mashgʻuloti qatnashchilariga kelgusida Oʻzbekiston Respublikasi jinoyat-protsessual Kodeksining 483-moddasida “Jinoyat ishini apellyatsiya, kassatsiya, taftish tartibida koʻrish doirasi”, yaʼni sud jinoyat ishini apellyatsiya, kassatsiya, taftish tartibida koʻrishda shikoyat yoki protest vajlari bilan chegaralanmasligini va ishni barcha mahkumlarga, shu jumladan tegishli shikoyatni bermagan shaxslarga yoki oʻziga nisbatan shikoyat (protest) berilmagan mahkumlarga nisbatan ham toʻla hajmda tekshirilishini, jinoyat ishini apellyatsiya, kassatsiya yoki taftish tartibida koʻrib chiqayotgan sud qaror qabul qilish chogʻida quyi instantsiya sudlari tomonidan tekshirilgan dalillarni ham, ishni koʻrishda apellyatsiya, kassatsiya instantsiyasi yoki tegishli taftish instantsiyasi sudiga taraflar tomonidan taqdim etilgan yoki ular tomonidan talab qilib olingan va tekshirilgan, eʼtiborga olinadigan yangi dalillarning ham tekshirilishi toʻgʻrisida misollar orqali batafsil tushunchalar berildi.

Bundan tashqari, Oʻzbekiston Respublikasi jinoyat-protsessual Kodeksining 497-11-moddasida “Birinchi instantsiya sudining ajrimi ustidan apellyatsiya tartibida shikoyat berish va protest bildirish”, yani birinchi va ikkinchi qismlari oʻzgartirilgan tahrirda bayon etilishini, yaʼni ish boʻyicha birinchi instantsiya sudining ajrimi ustidan ajrim chiqarilgan kundan eʼtiboran oʻn kunlik muddatda ushbu Kodeksning 497-2-moddasida nazarda tutilgan shaxslar tomonidan xususiy shikoyat berilishi yoki xususiy protest bildirilishi mumkinligini, hukm chiqarish bilan yakunlangan sud muhokamasi chogʻida chiqarilgan ajrim ustidan shikoyat berilgan yoki protest bildirilgan taqdirda ish faqat hukm ustidan xususiy shikoyat (xususiy protest) berish uchun belgilangan muddat tugaganidan keyin apellyatsiya instantsiyasi sudiga yuborilishi batafsil tushuntirildi.

Shuningdek, Oʻzbekiston Respublikasi jinoyat-protsessual Kodeksining 499-moddasida “Birinchi instantsiya sudining hukmi, ajrimi ustidan kassatsiya tartibida shikoyat berishga (protest bildirishga) boʻlgan huquq” bunda mahkum, uning himoyachisi, qonuniy vakili, jabrlanuvchi, uning vakili birinchi instantsiya sudining hukmi, ajrimi ustidan kassatsiya tartibida shikoyat berishga haqli ekanligi aytib oʻtildi.

Unga koʻra, Oʻzbekiston Respublikasi Bosh prokurori, Qoraqalpogʻiston Respublikasi prokurori, viloyatlar, Toshkent shahar prokurorlari, Oʻzbekiston Respublikasi Harbiy prokurori va ularga tenglashtirilgan prokurorlar, shuningdek, ularning oʻrinbosarlari birinchi instantsiya sudining hukmi, ajrimi ustidan kassatsiya tartibida protest bildirishga haqlidirlar. Fuqaroviy daʼvogar, fuqaroviy javobgar va ularning vakillari ham birinchi instantsiya sudi hukmining, ajrimining fuqaroviy daʼvoga daxldor qismi ustidan kassatsiya tartibida shikoyat berishga haqli boʻladilar.

 Seminar mashgʻuloti davomida sud tomonidan oqlangan shaxs, uning himoyachisi va qonuniy vakili birinchi instantsiya sudi hukmining, ajrimining oqlash sabablari va asoslariga doir qismi ustidan kassatsiya tartibida shikoyat berishga haqliligini, ishda taraf boʻlmagan shaxslar ham birinchi instantsiya sudi hukmining, ajrimining oʻz huquqlari hamda qonuniy manfaatlariga daxldor qismi ustidan kassatsiya tartibida shikoyat berishga haqli boʻlishi haqidagi va Oʻzbekiston Respublikasi jinoyat-protsessual Kodeksining 510-moddasida “Taftish tartibida qayta koʻrilishi mumkin boʻlgan sud hukmlari, ajrimlari”, yaʼni Qoraqalpogʻiston Respublikasi sudida, viloyatlar, Toshkent shahar sudlarida, Oʻzbekiston Respublikasi Harbiy sudida taftish tartibida jinoyat ishlari boʻyicha tuman (shahar) sudlarining, hududiy harbiy sudlarning apellyatsiya yoki kassatsiya tartibida koʻrib chiqilgan hukmlari, ajrimlari, ushbu sudlarning tuman (shahar) sudlari, hududiy harbiy sudlar tomonidan koʻrilgan ishlar boʻyicha apellyatsiya va kassatsiya instantsiyasida chiqarilgan hukmlari, ajrimlari koʻrib chiqilishi bilan bogʻliq bir qator oʻzgartirishlar va qoʻshimchalar toʻgʻrisida zarur maʼlumot va tushunchalar berildi.

Seminar mashgʻuloti soʻngida ishtirokchilar oʻzlarini qiziqtirgan sohaga oid savollariga javoblar oldilar. Seminar mashgʻuloti bahs va munozaralar, samimiy muloqot tarzida oʻtdi.

A.SAFAROV, Jinoyat ishlari boʻyicha Amudaryo tuman sudi raisi.