DAVR TALABIGA MOS IShLASh - BURChIMIZ

Mustaqil davlatimizning strategik kelajagini bugungi davr yoshlarining kuch va salohiyati, bilim darajasi belgilaydi. Shu tufayli mamlakatimizda yoshlar hayotiga doir barcha masalalar davlat siyosatining ustuvor yoʻnalishlaridan biri hisoblanadi. Yoshlarning ijtimoiy-maʼnaviy hamda siyosiy-ijtimoiy jihatdan faolligini oshirish, ularning toʻlaqonli bilim olishlari, fan asoslarini chuqur egallashlari, oʻzlari xohlagan kasb-hunar yoʻnalishi boʻyicha tahsil olib, hayotga faol aralashuvini taʼminlash maqsadida keng qamrovli imkoniyatlar yaratib berilgan.

Bugungi kunda oʻrta umumtaʼlim maktablarini tugatgan yoshlarning barchasi akademik litsey va kasb-hunar kollejlariga, uzluksiz taʼlimning keyingi bosqichiga toʻliq qamrab olingan. Oʻquvchi-yoshlarning taʼlim-tarbiya olishlari uchun bu oʻquv maskanlarida barcha zarur shart-sharoitlar mavjud. Ayniqsa, oʻquvchi-yoshlarning darsdan boʻsh vaqtlarini mazmunli oʻtkazishlarini taʼminlash maqsadida turli xil adabiy-badiiy tadbirlar, sport musobaqalari, har xil mavzudagi intellektual oʻyinlarning avval maktab, litsey va kollejlarda, keyinchalik hududiy va tuman bosqichlarida oʻtkazilishi, yoshlarimiz oʻrtasida yangi-yangi iqtidor va qobiliyat sohiblarini kashf etish imkonini bermoqda.

Hozirgi globallashuv jarayonida yoshlar bilan ishlashish, ularning intilishlarini oʻz vaqtida qoʻllab-quvvatlash, fikrlarini tinglab, yoʻl-yoʻriq va maslahatlar berish har birimizdan katta kuch va bilim talab qiladi. Ayniqsa, umumtaʼlim maktablaridagi "Kamalak” bolalar va oʻsmirlar tashkilotlari yetakchilari bilan "Kamolot” YoIH boshlangʻich tashkilotlari rahbarlarining hamkorlikdagi ishlari yoshlar hayotiga oid koʻpdan-koʻp muammolarni hal etish imkonini beradi. Chunki bugungi oʻsmir ertaga kollej va litsey oʻquvchisiga aylanadi. Shu bois, ayniqsa, "Kamalak” bolalar va oʻsmirlar tashkiloti yetakchilari oʻquvchi-yoshlarning kasb tanlashlarida, oʻzlari tanlagan kasb yoʻnalishlari boʻyicha taʼlimning keyingi bosqichiga yoʻllanma olishlarida eng yaqin maslahatgoʻy boʻlmoqlari lozim. Oʻquvchi-yoshlarni biron bir kasbga yoʻnaltirishda ularning orzu initilishlariga eʼtiborli boʻlish talab etiladi. Bunda maktablarda turli xil toʻgaraklar faoliyati muhim oʻrin tutadi. Toʻgaraklardagi mashgʻulotlar oʻquvchi-yoshlarning va oʻsmirlarning qiziqishlari hamda iqtidorini yuzaga chiqarishda eng muhim vosita hisoblanadi. Alohida qobiliyatli oʻsmir-yoshlarni har xil maqsadli tadbirlarga jalb etish, bellashuvlarga tayyorlash, ularning iqtidorini munosib ragʻbatlantirib borish – har bir toʻgarak rahbari, qolaversa, "Kamalak” yetakchilari va "Kamolot” YoIH boshlangʻich tashkilotlari rahbarlarining masʼuliyatli vazifasidir.

Maktablar, akademik litsey va kollej oʻquvchi-yoshlari oʻrtasida giyohvandlik va uning ogʻir oqibatlari, huquqbuzarlikning oldini olish, yoshlar oʻrtasida "ommaviy madaniyat”ning har qanday koʻrinishlariga qarshi kurashish, salomatlik – sogʻlom turmush tarzi kabi mavzularda davlat hamda nodavlat notijorat tashkilotlari, shuningdekjamoatchilik tuzilmalari bilan hamkorlikda seminarlar, davra suhbatlari uyushtirish, bunday uchrashuv-yigʻilishlarida yoshlarning ishtirokini taʼminlash bugungi davr yoshlarining ijtimoiy faolligini oshirishda eng muhim omil hisoblanadi.

Demak, umumtaʼlim maktablaridagi "Kamalak” oʻquvchi-oʻsmirlar tashkilotlari hamda "Kamolot” YoIH boshlangʻich tashkilotlari rahbarlari qogʻoz qoralash, ish stoliga yopishib oʻtirib har xil rasmiy xujjatlar tuzishdan amaliy faoliyatga oʻtmogʻi, hayotning har bir daqiqasidan unumli foydalanib, oʻsmir-yoshlar bilan hamnafas, hamqadam ish olib bormoqlari joiz.

"Kamalak” tashkiloti aʼzolari darsdan boʻsh vaqtlarida nima bilan mashgʻul? "Kamolot” YoIH aʼzolari-chi? Ularning orasida bir-biriga loqayd va beparvo kayfiyatli yoshlar yoʻqmi? Ularning qiziqishlari qanday? Muammolari boʻlsa, yoshlar yetakchilari ularni hal qilish uchun qanday tadbirlar, rejalar ishlab chiqayotir?

Bugungi oʻsmir-yoshlar yetakchilari ana shunday savollarga oʻz amaliy faoliyatlari bilan javob bera oladigan bilim va salohiyatga ega boʻlmoqlari shart va zarur! Bu – davr, zamon talabi.

Mansur OʻROZBOYeV, "Kamolot” YoIH tuman Kengashi raisi.

(Foto - http://tanlov.uz)